Makron hələ də Əliyevin əsaslı ittihamlarına susur...
Tural İsmayılov: "Çünki başdan-ayağa yeritdikləri səhv siyasətin, erməni lobbisinin girovuna çevriliblər"
Prezident İlham Əliyev Parlamentlərarası İttifaqın Baş katibi Martin Çunqonqla görüşdə deyib ki, Fransanın regiondakı cəhdləri uğursuzdur. Fransanın regionda dağıdıcı siyasət həyata keçirərək od üstünə benzin tökmək prinsipindən çıxış etdiyini, Ermənistanın militarizasiya siyasətini apardığını, geosiyasi intriqaların təşəbbüskarı olduğunu deyən Prezident İlham Əliyev rəsmi Parisin regionda vəziyyətin gərginləşməsinin səbəbkarı olduğunu, müxtəlif beynəlxalq təşkilatlarda və parlament müstəvilərində anti-Azərbaycan siyasət yürütdüyünü də diqqətə çatdırıb.
Dövlət başçısı Fransanın Cənubi Qafqaz regionunda aparıcı mövqeyə nail olmaq və nüfuzunu gücləndirmək məqsədilə siyasət yürütdüyünü, lakin onların bu istiqamətdəki cəhdlərinin əbəs olduğunu vurğulayıb.
Burada diqqəti çəkən məqam həm də odur ki, artıq Azərbaycandan neçənci dəfədir ən yüksək səviyyədə Fransaya qarşı əsaslı, ciddi ittihamlar səsləndirilir. Parisin siyasəti vurulur, amma Fransada ən yüksək səviyyələrdə bu ittihamlara hələ heç bir reaksiya yoxdur. Niyə? Bu, nə ilə izah oluna bilər?
Sözügedən məsələyə aydınlıq gətirən politoloq Tural İsmayılov baki-xeber.com-a açıqlamasında bununla bağlı bir sıra məqamlara toxundu: "Əlbəttə ki, bu gün Azərbaycan-Fransa münasibətlərinin bu qədər korlanmağının və belə bir pis vəziyyətə gəlib çıxmağının ən böyük günahkarı Parisdir. Fransa özü də fərqindədir ki, bölgədə yeritdiyi siyasət vəziyyətin belə dözülməz bir həddə gəlıb çatmasına səbəb olub. Paris bu gün Azərbaycanın qlobal miqyasda Fransanın neokolonializminə qarşı apardığı mübarizəyə qıcıq olur. Hesab edirəm ki, Bakı Təşəbbüs Qrupunun Fransa neokoloniyalarındakı özbaşınalıqlarına qarşı apardığı mübarizə rəsmi Parisi narahat edir. Korsikada yaradılan Nazioni Azadlıq Hərəkatı və digər azadlıq mübarizələrində Azərbaycanın adı xüsusi vurğulanır. Yeni Kaledoniyada oranın bayraqları ilə yanaşı, Azərbaycan bayraqları qaldırılır. Bu gün dünyanın bir çox imperialist dairələri, təbii olaraq imperialist olduqlarına görə, Fransanın qətliamlarına və bu ölkənin apardığı faşist siyasətə göz yumarkən, yeganə olaraq Azərbaycan bu siyasətə qarşı ciddi bir mübarizə formalaşdırıb. Ona görə də prezident Emmanuel Makron başda olmaqla Fransa rəhbərliyinin Azərbaycan qarşısında deyəcək bir sözü qalmayıb. Çünki başdan-ayağa yeritdikləri səhv siyasətin, erməni lobbisinin girovuna çevriliblər. Ortaya qoya biləcəkləri tutarlı arqument yoxdur. Prinsipcə, bütün dünya belə siyasi nizam üzərində qurulub ki, gərək mütləq qarşı tərəfə həmişə cavab verəsən. Özü də dünyada özünün coğrafi sərhədlərinə aid olmayan adalarda neomüstəmləkəçilik siyasəti yeridən bir ölkənin Qarabağ erməniləri adı altında Azərbaycanın ərazi bütövlüyünə qəsd etməsi qəbuledilən deyildi. Fransanın buna nə siyasi, nə də hüquqi və mənəvi haqqı yoxdur. Cavab verməmələrinin bir səbəbi də odur ki, hökumət səviyyəsində bütün körpüləri yandırmaq istəmirlər. Son dövrlər Fransa rəsmilərinin Azərbaycanla bağlı açıqlamalarında bir ehtiyatlı yanaşma hiss olunur. Onları buna sövq edən də ölkəmizin uğurlu siyasi gedişləridir".
Vidadi ORDAHALLI
