Azərbaycan-Fransa parlamentlərarası əlaqələr qrupu nə vaxt ləğv olunur?..
Təbriz Musayev: "İki ölkə arasında dostluqdan əsər-əlamət qalmayıb"
Məlum olduğu kimi, Fransa açıq şəkildə Azərbaycana qarşı düşmənçilik siyasəti aparır və hər vasitə ilə bunu körükləməyə çalışır. Yanvarın 17-də Fransa Senatı az qala yekdilliklə Azərbaycana qarşı sanksiyaların tətbiqini tələb edən qətnamə qəbul edib.
Qətnamədə, həmçinin, Ermənistanın ərazi bütövlüyünə dəstək ifadə edilir və Azərbaycanın 19-20 sentyabr 2023-cü il tarixlərindəki Qarabağa qarşı "təcavüz"ü pislənir. Sənəddə ermənilərin Qarabağa qayıtması və onların təhlükəsizliyinə zəmanət də tələb olunur. O cümlədən, digər bu kimi mənasız tələblər qətnamədə öz əksini tapıb.
Onu da qeyd edək ki, bu, Fransa Senatının ilk belə qətnaməsi deyil. Analoji qətnamə Azərbaycanın 2020-ci ildə İkinci Qarabağ müharibəsində qələbəsindən sonra da qəbul edilib.
O da məlumdur ki, Azərbaycan-Fransa parlamentlərarası dostluq qrupu var. Əgər Fransanın hər iki palatası bizə qarşı düşmənçilik edirsə, hər iki palata bizə qarşı qətnamə qəbul edirsə, o zaman hansı dostluqdan söhbət gedə bilər? Azərbaycan-Fransa parlamentlərarası dostluq qrupu niyə buraxılmır?
"Fransa bundan artıq bizə nə etməlidir ki, bizim parlament bu yöndə qərar versin?"
Sözügedən məsələni "Bakı-Xəbər" şərh edən İrəvan Azadlıq Təşkilatının sədri Təbriz Musayev hesab edir ki, iki ölkə arasında bu cür qərəzli yanaşmadan sonra dostluq qrupu buraxılmalıdır: "İndiyə qədər bunun baş verməməsi təəccüb doğurur. Fransa bundan artıq bizə nə etməlidir ki, bizim parlament bu yöndə qərar versin? Düzdür, ötən ilin oktyabrında Azərbaycan-Fransa parlamentlərarası əlaqələr üzrə işçi qrupu fəaliyyətini dayandırıb, amma qrup buraxılmayıb. Özü də birinci Fransa Senatı bənzər addım atdı, sonra bizimkilər buna analoji formada cavab verdilər. Hesab edirəm ki, bu yetərli sayıla bilməz. Ümumiyyətlə, Azərbaycan-Fransa parlamentlərarası əlaqələr üzrə dostluq qrupu buraxılmalıdır. Çünki iki ölkə arasında dostluqdan əsər-əlamət qalmayıb. Fransa faktiki olaraq Azərbaycana qarşı düşmənçilik fəaliyyətinə başlayıb və hər keçən gün bunu daha da alovlandırır. 10 noyabr 2020-ci ildə 44 günlük müharibə dayanan kimi, Fransa Senatı erməni separatçıların "tanınması" barədə qərar qəbul etdi. O zaman müharibə təzə bitdiyi üçün bunu hardasa düşünülməmiş emosianal siyasi addım saymaq olardı. Ancaq məsələ ondadır ki, ötən 3 ildə Fransanın Azərbaycana qarşı düşmənçiliyi azalmadı, əksinə, daha da gücləndi. Fransa bir neçə dəfə BMT Təhlükəsizlik Şurası müstəvisində Azərbaycana qarşı qətnamə qəbul edilməsinə cəhd edib. Nəinki BMT, digər beynəlxalq müstəvilərdə də bunu etməyə çalışdılar. Daha sonra Fransa Ermənistanın silahlandırılmasına qərar verdi. Özü də nəinki müdafiə xarakterli, hücum xarakterli silahların verilməsinə başladılar. Məhz Fransanın bilavasitə təşəbbüsü ilə Avropa İttifaqının hərbçilərdən ibarət müşahidə missiyası Ermənistana göndərildi. İndi onların həm sayı artırılır, həm də fəaliyyət dairəsi genişləndirilir. Bütün bunlar Fransanın Azərbaycana yönəlik düşmənçiliyi deyil bəs nədir? Ümumilikdə, nəinki parlament səviyyəsində, bütün müstəvilərdə Fransa ilə əlaqələrə yenidən baxılmalıdır. Fransanın bizə qarşı düşmənçiliyinin bir nümunəsi də casus şəbəkəsinin ifşa olunması ilə bağlıdır. Bir sözlə, Fransa bütün körpüləri yandırdığı üçün daha sərt addımlar atmalıyıq".
Vidadi ORDAHALLI
