Fransa Bakı Təşəbbüs Qrupunu tanımaqdan imtina etdi...
Əli Orucov: "Dünyaya demokratiya dərsi keçən Parisin iç üzü açılır, onun müstəmləkələrində törətdikləri əməlləri ifşa olunur"
Fransanın xarici işlər naziri Manuel Vals Azərbaycan dövlətinin dəstəklədiyi Bakı Təşəbbüs Qrupunun Yeni Kaledoniyanın institusional gələcəyi ilə bağlı danışıqlarda vasitəçilik təklif edən məktubundan sonra yeni “sabitliyi pozmaq cəhdlərini” pisləyib.
"Birliyimizə yönəlmiş bu sabitliyi pozmaq cəhdləri ilə üzləşən Fransa həmişəki kimi qəti və sərt cavab verəcək",- deyib Valls, Le Figaro xəbər verir .
O, həmçinin qeyd edib ki, Fransa Azərbaycan ərazisindən “Fransanın xaricdəki strateji maraqlarına” qarşı yönəlmiş tədbirlər həyata keçirən Bakı Təşəbbüs Qrupunu tanımır.
Vallsa göndərdiyi məktubda Bakı qrupu “müzakirələrə yeni nəfəs vermək və onları dəstəkləmək məqsədi ilə Fransa hökuməti ilə kanakilər (müstəqillik hərəkatı tərəfindən Yeni Kaledoniyaya verilən ad – red.) arasında qərəzsiz vasitəçilik təşəbbüsü” təklif edildiyini bildirib.
Paris aylardır ki, Fransanın Azərbaycanın tarixi rəqibi olan Ermənistanı dəstəkləməsi ilə bağlı iki paytaxt arasında gərginlik fonunda Bakını Yeni Kaledoniya və digər xarici ərazilərin işlərinə qarışmaqda və manipulyasiya etməkdə ittiham edir.
Fransanın Bakı Təşəbbüs Qrupunu tanıyıb-tanımamasının nə kimi əhəmiyyət var? Paris Bakıya qarşı hansı sərt cavab tədbirləri görə bilər?
Baki-xeber.com-un sualını cavablandıran politoloq Əli Orucov bildirdi ki, Qoşulmama Hərəkatının Əlaqələndirmə Ofisinin Nazirlər Toplantısı çərçivəsində Bakıda keçirilmiş dəyirmi masa zamanı 6 iyul 2023-cü ildə yaradılan Bakı Təşəbbüs Qrupunun məqsədi müstəmləkəçilikdə olan dünyanın müxtəlif bölgələrində yerləşən xalqların azadlıq uğrunda apardıqları mübarizəyə dəstək verməkdi: "İndiyədək həmin Qrup bu istiqamətdə xeyli işlər görüb, koloniyaların nümayəndələrinin iştirakı ilə beynəlxalq konfranslar təşkil edib, azadlıq uğunda mübarizə aparan, müstəmləkə şəraitində yaşayan insanlara hər cür dətəyini ifadə edib. Hazırda Fransanın müstəmləkəsi atında əzilən Dənizaşırı Ərazilər və digər koloniyalarda yaşayan 3.5 milyondan çox insan, yəni Parisin kiçik bacısi adlandırdığı Ermənistanın bütün əhalisi qədər insan əzilir, amansızcasına istismar edilir, təbii resursları sümürülür. Onların azadlıq və müstəqillik arzuları boğulur, süngü və işgəncələrlə susdurulur. Yeni Kaledoniyada müstəqllik tərəfdarlarının kütləvi etirazlarının Paris tərəfindən necə qəddarcasına və sərt şəkildə yatırılmasından elə də çox vaxt keçməyib. Hələ də həmin adada Fransanın cəza qüvvələri qalmaqdadır. Təəssüflər olsun ki, dünya birliyi, xüsusən də Qərb Fransanın on illərlə müstəmləkədə əzdiyi, məhv etdiyi aborigen xalqların taleyinə biganəlik göstərməkdədir. Bakının humanist və umumbəşəri dəyərlərə söykənərək həmin xalqların müstəqillik mübarizəsinə dəstək verməsinə Fransanın qıcıqlanması və aqressivləşməsi təsadüfi deyil. Dünyaya demokratiya dərsi keçən Parisin iç üzü açılır, onun müstəmləkələrində törətdikləri əməlləri ifşa olunur.
Eyni zamanda, həmin xalqların Azərbaycanın simasında güclü bir dayaq hiss etmələri onları müstəmləkəçiliyə qarşı çıxmağa daha da cəzarətləndirir. Fransanın Bakı Təşəbbüs Qrupunu tanıyacağı onsuz da gözlənilən deyil. Lakin bu heç nəyi dəyişmir. Fransanın etirazlarına və hədələrinə baxmayaraq, Azərbaycan düşünmürəm ki, müstəmləkədə olan xalqlara dəstəyindən imtina edəcək. Bu, Bakının üzərinə götürdüyü xeyirxh bir missiyadır. Azərbaycan xalqı uzun illər imperiya əsarətində olan bir xalq kimi bunun nə demək olduğunu bilir. Məhz bu baxımdan da metropoliyalarda sərvətləri sümürülən milyonlarla insanın taleyinə biganə qala bilmədiyini fəaliyyəti ilə bir daha təsdiqləyib. Yaxşı olardı ki, Fransa Azərbaycanı təhdid etməkdənsə Bakı Təşəbbüs Qrupu ilə əməkdaşlıq edib, problemlərin həlli istiqamətində çalışardı. Necə olur ki, Paris bir ovuc erməni üçün hay-həşir salır, ancaq hələ də onun müstəmləkəsi altında olan 3.5 milyondan çox yerli xalqların hüquq və azadlıqlarına göstərilən dəstəyə dözümsüzlük göstərərək, bunu Bakının “sabitliyi pozmaq cəhdləri” kimi xarakterizə edir? Fransanın yüksək rəsmi şəxslərinin bununla bağlı Azərbaycanı hədələməsi və haqsız suçlaması ilk deyil. Bundan əvvəl Fransanın Daxili işlər naziri də analoji bəyanat vermişdi. Erməniləri silahlandıran, maliyyələşdirən, himayədarlıq edən, bununla da Cənubi Qafqazda gərginliyi tətikləyərək kövrək sabitliyi pozmağa çalışan bir ölkənin sabitlikdən danışması absurddu. Həmçinin Azərbaycan təhdid və hədə dilində danışılacaq bir ölkə də deyil. Fransa, Bakıya qarşı təsirində olan bütün vasitələrinin hərəkətə gətirməsinə baxmayaraq istəyinə indiyədək müvəffəq ola bilməyib və bundan sonra da nəyəsə nail ola biləcəyini düşünmürəm. Mən hesab edirəm ki, Bakı Təşəbbüs Qrupunun göstərdiyi fəaliyyət müstəmləkə xalqlarının müstəqlillik qazanamasında müstəsna rol oynayacaq. Fransanı da qorxudan və narahat edən məhz bu amildir.
Dəniz NƏSİRLİ
