Müttəhim general Ermənistanın Qarabağda basdırdığı minanı markasına kimi etiraf etdi…
Tural İsmayılov: “Məhkəməyə çıxarılan separatçılar Ermənistan hakimiyyətinin törətdiyi cinayətləri bir-bir etiraf edir”
Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.
Ötən məhkəmələrin birində Ermənistan silahlı qüvvələrinin hərbi qulluqçusu olmuş, general-mayor ali hərbi rütbəsində xidmət etmiş, həmin ölkənin vətəndaşı David Manukyan dövlət ittihamçısının suallarını cavablandıran zaman Azərbaycanın vaxtilə işğal olunmuş ərazilərində hərbi xidmətdə ikən Ermənistan Respublikası tərəfindən Rusiyadakı Frunze adına Hərbi Akademiyaya təhsil almağa göndərildiyini bildirib. Təqsirləndirilən şəxs “komandir”i olduğu “Ağdərə rayonunun 7-ci müdafiə xətti”nin hərbçilərinin Goranboy rayonunun Gülüstan kəndi istiqamətində mina basdırıldıqlarını da etiraf edərək deyib: “Səhv eləmirəmsə, PMN-1 minaları idi”.
Qeyd edək ki, ermənilər dəfələrlə işğal etdikləri torpaqlara mina basdırmadıqlarını demişdilər. Ancaq Bakıda keçirilən məhkəmə prosesi zamanı təqsirləndirilən şəxslər o torpaqlara mina basdırdıqlarını etiraf edirlər.
“Mina terroruna qarşı qlobal həmrəylik olmalıdır, bu sahədə mübarizə ən üst səviyyədə aparılmalıdır”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, məhkəməyə çıxarılan separatçılar Ermənistan hakimiyyətinin törətdiyi cinayətləri bir-bir etiraf edir: “Onlar bildirir ki, Ermənistan Azərbaycan torpaqlarını işğal altında saxladığı zaman çoxsaylı dövlət cinayətləri törədib. Ermənilər xalqımıza qarşı etnik, ağlasığmaz cinayətlərə əl atıb. Ermənilərin terrorçu olduğu növbəti dəfə sübut olundu. Məlumdur ki, bir neçə gün əvvəl vətəndaşlarımız Ağdam və Cəbrayıl istiqamətində mina terrorunun qurbanı olub. Təəssüflər olsun ki, mina terroruna qarşı beynəlxalq ictimaiyyət heç bir addım atmır. Ortada çoxsaylı sübutlar, faktlar var. Hətta David Manukyan da Azərbaycan torpaqlarında mina yerləşdirdiyini etiraf edib. Həmçinin, Ermənistanın müxtəlif siyasətçi geyimi geymiş ictimai şəxslərinin də mina ilə bağlı açıqlamaları var. Onlar Ermənistanın dövlət cinayətlərini həm ardıcıl formada etiraf edir, həm də ifşa edirlər. Bu baxımdan hesab edirəm ki, mina terroruna qarşı qlobal həmrəylik olmalıdır. Bu sahədə mübarizə ən üst səviyyədə aparılmalıdır. Erməni cinayəti bütün beynəlxalq platformalarda pislənməlidir”.
Günel CƏLİLOVA
