Ermənistan XİN-in "900 xəritə yalanı" onu hərbi cinayət məsuliyyətindən qurtara bilməz...
İbrahim Rüstəmli: “Ermənistan XİN-in sözçüsü çox söz deyə, çox saxtakarlıq edə bilər, amma bu qətiyyən reallığı əks etdirmir”
Ermənistanın ərazilərimizdə həyata keçirdiyi mina terrorunun faciələri bu gün də yaşanır. Azərbaycanın azad ərazilərində ermənilərin kütləvi şəkildə basdırdığı minalardan vətəndaşlarımız ciddi əziyyət çəkir.
Lakin rəsmi Bakı Ermənistandan mina xəritələrini tələb etsə də, dəfələrlə bu barədə o ölkənin rəhbərliyinə çağırışlar etsə də, Ermənistan minalanmış ərazilərin dəqiq xəritəsini verməkdən imtina edir. Bu ondan qaynaqlanır ki, Ermənistana beynəlxalq təzyiq yoxdur.
Ermənistan tərəfin indiyə qədər verdiyi xəritələrin heç biri dəqiq olmayıb və nəticə də göz qabağındadır.
Ermənistan Xarici İşlər Nazirliyinin mətbuat katibi Ani Badalyan iddia edib ki, Ermənistan guya 2021-ci il 12 iyun, 3 iyul, 19 oktyabr, 1 noyabr və 29 noyabr tarixlərində “birtərəfli qaydada heç bir şərt olmadan Azərbaycanı 972 minalanmış sahə xəritəsi ilə təmin edib”.
Badalyan iddia edib ki, Ermənistan guya humanitar məsələlərdə əməkdaşlıq prinsiplərinə “sadiq qalaraq” sorğular vasitəsilə 2024-cü ilin əvvəlində “yeni mina sahəsi xəritələrini tərtib edib” və Azərbaycana ötürüb.
Guya Azərbaycan xəritələrin düzgünlüyünü şübhə altına alır.
“Ermənistan Azərbaycana minlərlə xəritə verə bilər, o xəritələr reallığı əks etdirmirsə onların bizim üçün heç bir əhəmiyyəti yoxdur”
Ermənistan XİN sözçüsünün iddialarına münasibət bildirən hərbi ekspert İbrahim Rüstəmli “Bakı-Xəbər”ə açıqlamasında dedi ki, yalan danışmaq, riyakarlıq, saxtakarlıq Ermənistanın dövlət siyasətidir. “Əgər doğrudan da özünün siyasi, iqtisadi kursu, dövlətçilik ənənəsi olan Ermənistan adlı bir dövlət varsa, bu ölkənin xarakterinə uyğun başqa bir söz tapa bilmirəm. Ermənistan bütün dövrlərdə istisnasız olaraq vassal bir dövlət kimi çıxış edir. Ermənistan bölgədə gah Rusiyanın, gah İranın, gah ABŞ-ın, bir sözlə, başqa-başqa dövlətlərin mövqeyindən çıxış edib. Onun özünün konkret mövqeyi, siyasi kursu, ideoloji prinsipləri yoxdur. Bu “dövlət” həmişə onun-bunun dili ilə danışıb. Ona görə də bu gün mina xəritələri ilə bağlı çox ciddi bir problemlə üz-üzə qalmışıq. Mina çox ciddi problemli bir məsələdir. Bütün müharibələr dövründə o müharibələrin iştirakçısı olan dövlətlər yüz illər keçməsinə baxmayaraq əziyyət çəkiblər. Azərbaycan bu gün də bu problemi yaşayır. Daha dəqiq desək, Birinci Qarabağ müharibəsindən başlayaraq indiyə qədər Ermənistanın bu və digər şəkildə yaratdığı problemləri aradan qaldırmaqla məşğuldur. Ermənistanın yaratdığı ən böyük və təhlükəli problemlərindən biri mina problemidir. Mina problemi zaman-zaman insanların həyatına son qoymasına, ağır yaralanmasına, şikəst olmasına, rahatlığının pozulmasına səbəb olub. Ermənistan nə qədər ki belə riyakarlıq edib saxta xəbərlər yayacaq, dəqiq mina xəritələrini Azərbaycana təhvil verməyəcək, bu problem hələ də yaşanacaq. Ermənistan hələ ki, minaların basdırıldığı ərazilərlə bağlı konkret koordinasiya vermir, yaxud onun verdiyi xəritələr reallıqla üst-üstə düşmür. Mən bunu həm də onunla izah etmək istəyirəm ki, Ermənistan başıpozuq bir dövlətdir, ordusu da başıpozuq bir ordudur. Müxtəlif adamların hakimiyyətə gəlmək, ya orduda, ya siyasi tribunalarda sözünü demək, təşəbbüsü ələ almaq istəyi həmişə olub, bundan sonra olacaq.
Ermənistan XİN-in sözçüsü çox söz deyə, çox saxtakarlıq edə bilər, amma bu qətiyyən reallığı əks etdirmir. Reallıq ondan ibarətdir ki, Ermənistanın Azərbaycana verdiyi xəritələrlərlə bağlı ciddi problem yaşanır, o xəritələr yanlışdır. Ermənistan Azərbaycana minlərlə xəritə verə bilər, o xəritələr reallığı əks etdirmirsə onların bizim üçün heç bir əhəmiyyəti yoxdur”.
İ.Rüstəmli bildirdi ki, düzgün mina xəritələrinin Azərbaycana verilməməsi ermənilər arasında Azərbaycana və türklərə qarşı mövcud olan nifrətin, qisasçılıq hissinin, terrorun ən bariz nümunəsidir. “Saysız mina basdırasan, amma xəritəni verməyəsən, bu onların riyakarlığının göstəricisidir. Onlar Azərbaycana nə qədər xəritə versələr də mən onun obyektivliyinə inanmayacağam. Bilirsiz, ərəblərin bir ata sözü var, deyirlər ki, bir hadisə baş veribsə, ola bilər, o ikinci dəfə baş verməsin, amma bir hadisə ikinci dəfə baş veribsə demək üçüncü, dördüncü dəfə də baş verəcək. Ermənilər bizi bir neçə dəfə aldadıblar, buna görə də onların səmimiyyətinə inanmıram. Belə çıxır ki, mina problemlərini Azərbaycan öz daxili resursları hesabına həll etməli olacaq. Çox təəssüf ki, Ermənistan bu istiqamətdə də obyektivliyini qorumur, atəşkəs prinsiplərinin daha davamlı özüllər əsasında formalaşmasına nəinki şərait yaratmır, əksinə, ona saysız zərbələr endirir. Çox təəssüf ki, bu, Azərbaycan üçün instisnasız olaraq insan resursları baxımından çox ciddi problem yaradacaq. Yəni insan itkisi olacaq, sağlamlığını itirmiş insanlar olacaq. Bu həm də təbiətə sarsıdıcı zərbələr vurur. Belə deyək, vəhşi təbiətin də həyatında rol oynayır. Meşələrimizdə, dağlarımızda yaşayan canlıların məhvinə səbəb olur. Ona görə də, Ermənistan nə bir dövlət, ermənilər nə bir xalq kimi heç vaxt formalaşmayacaq” - deyə İ.Rüstəmli bildirdi.
İradə SARIEVA
