Ermənistanla saziş məsələsində Ştaynmayer də yanlış təsəvvürdə imiş - Əliyev vaxtında işə qarışdı...
Afsəddin Nəbiyev: “Qərb dairələri bu məsələdə əksər hallarda dürüst davranış göstərmirlər”
Prezident İlham Əliyev mətbuata bəyanatında ona verilən sualı cavablandırarkən Qərb dairələrinin Azərbaycanı müqaviləni imzalamamaqda günahlandırmağının əsassız olduğunu konkret arqumentlərlə əsaslandırıb:
“Mən Prezident Ştaynmayerlə söhbət əsnasında bildirdim ki, Azərbaycan bilərəkdən bu müqaviləni həddindən çox yükləmək də istəməmişdi, ona görə o, çox yığcam müqavilədir, əsas prinsipləri əhatə edir. Yenə də deyirəm, hər bir məsələ orada ciddi əhəmiyyət daşıyır. Bu sənəd üzərində iki ölkənin mütəxəssisləri, hüquqşünasları, Xarici İşlər nazirliklərinin nümayəndələri fəal işləyiblər və hesab edirəm ki, hər iki tərəf xoş niyyət göstərib. Əks təqdirdə, bu sənəd ərsəyə gəlməzdi. Bu, birincisi. İkincisi, Ermənistanda və bəzi Qərb dairələrində Azərbaycanı müqaviləni imzalamamaqda günahlandırmaq istəyirlər. Bu da tamamilə əsassızdır. Çünki artıq qeyd etdiyim kimi, bu prosesin təşəbbüskarı Azərbaycan olub. Əsas prinsipləri işləyən də Azərbaycan olub və biz xoş niyyət göstərərək bu danışıqlarda iştirak etmişdik. Əgər biz müqaviləni imzalamaq istəməsəydik, elə qeyri-real bir şərt qoyardıq ki, Ermənistan onu qəbul etməzdi”.
“Rusiyanın Ukraynada işğalçılıq siyasətini qəbul etməyən Avropa dövlətləri bəs Azərbaycanı müdafiə etməkdən niyə çəkinirlər?”
Sözügedən məsələni “Bakı-Xəbər”ə şərh edən AMİP-in sədr müavini Afsəddin Nəbiyevin fikrincə, son 35 ildə münaqişənin ilk illərindən etibarən Azərbaycan tərəfi Ermənistana ən çox sülh çağırışları edən tərəf olub: “Azərbaycan tərəfindən Ermənistana qarşı heç bir hərbi təhdid olmayıb. Ermənistan təcavüzkar işğalçılıq planlarını, eləcə də Ermənistanın təcavüzkar keçmişini, hərbi gücdən məsuliyyətlə istifadə edə bilmədiyini etiraf etməyib. Azərbaycana qarşı törətdiyi hüquq pozuntularına görə məsuliyyətini etiraf etmədiyini və səmimi peşmançılığını ifadə etmədiyini, siyasi dairələrində və cəmiyyətində revanşist əhvali-ruhiyyənin hökm sürdüyünü bildiyimiz halda, bütün bunlara baxmayaraq sülh təşəbbüsləri hər zaman Azərbaycanın tərəfindən təqdim olunub. Ştaynmayerlə görüşü zamanı Prezident İlham Əliyev bu məsələnin çox dolğun və aydın şəkildə izahını verib. Bizim Ermənistan tərəfinə çox sadə şərtlərimiz irəli sürülüb. Ermənistan tərəfinin yığcam müqavilədən imtina etməsi, təbii ki, bu dövlətin gələcək taleyini sual altında qoya bilər. Məsələnin əsas mahiyyəti ondan ibarətdir ki, Qərb dairələri bu məsələdə əksər hallarda dürüst davranış göstərmirlər. Burada çox sadə bir məntiq var, dəyər şkalası kəmiyyət tanımır. Avropa dövlətləri Rusiyanın Ukraynaya işğalçılıq siyasətini birmənalı olaraq qəbul etmirlər, düz də edirlər, biz də o mövqedəyik. Bəs Ermənistanın işğalçılıq siyasətinin nəticəsi olaraq Azərbaycanı müdafiə etməkdən niyə çəkinirlər? Əksinə, Ermənistana dəstək olmağa çalışırlar, əksər hallarda təxribata əl ataraq Azərbaycanı günahlandırmağa cəhdlər edirlər. Bütün bunlar onu göstərir ki, Azərbaycanı doğru yoldan heç bir qüvvə çəkindirə bilməz. Ermənistan yaxın bir vaxtda reallıqları qəbul edib, Azərbaycanın xoşməramlı sülh təşəbbüslərini qəbul edəcəksə, bundan yararlanan tərəf ən çox özləri ola bilər”.
Vidadi ORDAHALLI
