Avropa Parlamentinin binasını saxta “erməni genosidinin” “yas çadırına” döndərirlər...
Ramil Hüseynov: “Bütün bunlar Aİ-nin Türkiyəyə münasibətdə nə dərəcədə riyakar olduğunu ortaya qoyur”
Strasburqda Avropa Parlamentinin plenar iclası çərçivəsində qondarma “erməni soyqırımı”nın 110-cu ildönümünə həsr olunmuş debat keçiriləcək.
Bununla bağlı erməni mediası məlumat yayıb.
Yayılan məlumata görə, bununla bağlı Brüsseldə müzakirə aprelin 3-də baş tutacaq. Avropa Komissiyası adından komissar Oliver Varhelyi bəyanatla çıxış edəcək.
Burada diqqəti çəkən məqam odur ki, ABŞ prezidenti Donald Trampın NATO ilə bağlı məlum passiv siyasəti ilə əlaqədar Avropada ciddi narahatçılıq var. Avropa İttifaqı Rusiya təhdidindən qorunmaq üçün müxtəlif alternativlər axtarır. Bunlardan biri də Türkiyənin kollektiv müdafiədə fəal iştirakıdır. Təsadüfü deyil ki, Londonda keçirilən müzakirələrdə Türkiyə də iştirak edirdi. Avroittifaq bir tərəfdən qitənin Rusiya təhlükəsindən qorunmasında Türkiyənin fəal iştirak etməsini istəyir, o biri tərəfdən Avropa Parlamenti qondarma “genosidi” gündəmə gətirir.
“Bir sıra Avropa ölkələrinin qondarma “erməni soyqırımı”nı tanımaları azmış kimi, indi də...”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, bütün bunlar Aİ-nin Türkiyəyə münasibətdə nə dərəcədə riyakar olduğunu ortaya qoyur: “Əvvəl ondan başlayaq ki, illərdir müxtəlif bəhanələrlə Türkiyənin Avropa İttifaqına üzv olmasına imkan verilmir. Halbuki, neçə illərdir Türkiyə Aİ-yə namizəd olmaq statusuna malikdir. Aİ-nin tələb etdiyi kriteriyaların əksəriyyətini yerinə yetirib. Buna baxmayaraq, Türkiyə üzərinə bu yöndə yeni-yeni tələblər qoyulub. Ötən illər ərzində Türkiyədən qat-qat aşağı inkişaf səviyyəsinə malik olan ölkələri üzv qəbul ediblər. Çünki ortada həm də xristian amili faktoru var. Başda Fransa və Yunanıstan olmaqla bəzi Avropa ölkələri Türkiyənin Aİ-yə üzv olmasının əleyhinədilər. Qondarma “erməni genosidi” məsələsini də zaman-zaman buna görə gündəmə gətirirlər. Türkiyəni təzyiq altında saxlamaq, Aİ-yə üzv olmasını əngəlləmək üçün bunu ortalığa atıblar. Bir sıra Avropa ölkələrinin qondarma “erməni soyqırımı”nı tanımaları azmış kimi, indi də bunu Avropa Parlamentinin gündəliyinə çıxarırlar. Halbuki, bunun heç bir tarixi və hüquqi əsasının olmadığını onlar da yaxşı bilirlər. Ona görə də Türkiyə o vaxt Aİ-nin təhlükəsizliyində yaxından iştirak edəcək ki, bu ölkəyə qarşı ədalətsizliklər ortadan qalxsın. Türkiyə Aİ-nin tam hüquqlu üzvü olsun. Bunlar olmadan NATO dağılsa belə, Türkiyə Aİ-nin qarantoru olacağını düşünmürəm. Baxmayaraq ki, Avropanın Türkiyənin təhlükəsizlik çətirinə ehtiyacı böyükdür. Çünki NATO-da Birləşmiş Ştatlardan sonra ən böyük orduya malik olan ölkə Türkiyədir”.
Vidadi ORDAHALLI
