Aprel döyüşləri Vətən müharibəsinin ilk mərhələsi oldu...
Şakir Ağayev: “Aprel döyüşləri Vətən müharibəsində qazandığımız möhtəşəm qələbənin əsasını, təməl daşını qoydu”
44 günlük Vətən müharibəsində qazandığımız tarixi qələbənin təməli dörd günlük Aprel döyüşlərində qoyulub. O tarixi gündən başlanan yol Azərbaycan xalqını şanlı qələbəyə, möhtəşəm Zəfərə qovuşdurdu.
Doqquz il əvvəl baş verən müharibə ordumuzun qüdrətini, gücünü bütün dünyaya göstərməklə yanaşı həm də “güclü Ermənistan ordusu” mifini darmadağın etdi, dünya erməniliyini pərişan duruma saldı, məyusluğa uğratdı. Xalqımız ordumuzun gücünə bir daha inandı və onunla qürur duydu.
Doqquz il əvvəl, 2016-cı il aprel ayının 1-dən 2-nə keçən gecə Ermənistan silahlı qüvvələrinin təxribatlarına cavab olaraq Azərbaycan Ordusu uğurlu əks-həmlə əməliyyatı həyata keçirib. Aprel ayının 4 günü ərzində bölmələrimiz tərəfindən yerinə yetirilən adekvat cavab tədbirləri nəticəsində düşmən ağır məğlubiyyətə uğrayıb, Ermənistan silahlı birləşmələrinin işğalı altında olan Füzuli, Cəbrayıl və Ağdərə rayonlarının 2 min hektardan çox hissəsi azad edilib, həmçinin minlərlə hektar strateji əhəmiyyətli ərazi Ordumuzun tam nəzarətinə keçdi.
Azərbaycan ordusunun əzəmətinin, əsgər və zabitlərimizin şücaətinin, qələbə əzminin gerçək nümunəsi kimi Aprel döyüşləri tariximizə yazıldı. Bu, eyni zamanda xalqımızda qəti inam formalaşdırdı ki, şanlı ordumuz işğal altındakı torpaqlarımızı da mütləq azad edəcək, elə də oldu. Aprel döyüşlərindən dörd il sonra 44 günlük Vətən müharibəsi baş verdi və nəticədə torpaqlarımızın böyük hissəsi işğaldan azad olundu, 2023-cü ilin sentyabrında isə lokal antiterror tədbirləri zamanı ərazi bütövlüyümüz və suverenliyimiz tam bərpa olundu.
Aprel döyüşləri torpaqlarımızın azad edilməsi yolunda ilk cığırları açdı, 44 günlük Vətən müharibəsinə və möhtəşəm Zəfərə aparan uğurlu yolun başlanğıcı oldu.
Aprel döyüşləri göstərdi ki, qüdrətli Azərbaycan Ordusu, şücaətli, rəşadətli Azərbaycan əsgəri və zabiti Ermənistanın mifik ordusunu bir göz qırpımında necə darmadağın etdi, onların dizini qırdı, taqətini kəsdi. Məhz Aprel döyüşləri nəticəsində revanşist erməni ordusunun canına vəlvələ düşdü, sonları da məğlubiyyət oldu.
“Novoye Vremya” qəzetinin baş redaktoru Şakir Ağayev “Bakı-Xəbər”ə bildirdi ki, Aprel döyüşləri böyük Zəfərimizin başlanğıcı oldu: “Aprel döyüşləri Vətən müharibəsində qazandığımız möhtəşəm qələbənin əsasını, təməl daşını qoydu. Bu döyüşün tariximizdə xüsusi yer tutur. Bu mübağiləsiz olaraq belədir. Torpaqlarımızın işğaldan azad edilməsinin təməli Aprel döyüşlərində Tərtər rayonunun Talış kəndi ətrafındakı yüksəkliklərin, Cəbrayıl rayonunun Lələtəpə yüksəkliyinin və Cocuq Mərcanlı kəndinin işğaldan azad edilməsi ilə qoyuldu. Qələbəmizin ilk qaranquşu, ilk müjdəçisi bu döyüşlər oldu. Məhz bu döyüşlərdən sonra dünyaya sübut etdik ki, Azərbaycan Ordusu torpaqlarımızı işğaldan azad etməyə qadirdir. Aprel döyüşlərində Ordumuz düşmənə çox ağır zərbə vurdu. Azərbaycan tarixinin qəhrəmanlıq salnaməsindən biri də Aprel döyüşləridir”.
İradə SARIYEVA
