USAİD-in Azərbaycanda əməkdaşlıq etdiyi şəxslərin səsi çıxmır... Halbuki...
Yadigar Məmmədli: “Görünür onlar bu korrupsiyanın bir parçası olduqlarından susurlar”
ABŞ Beynəlxalq İnkişaf Agentliyinin (USAİD) bütün əməkdaşları sentyabrın 30-dək ixtisar olunacaq. Məlumata görə, USAİD-in bütün xaricdəki nümayəndəlikləri 2025-ci maliyyə ilində bağlanacaq. Dövlət katibi Marko Rubio, iyulun 1-dək USAİD-in bəzi funksiyalarının Dövlət Departamentinə veriləcəyini və administrasiyanın prioritetlərinə uyğun gəlməyən digər funksiyaların dayandırılacağını bildirib.
Qeyd edək ki, bu ilin fevral ayının əvvəlində ABŞ prezidenti Donald Tramp beynəlxalq təşkilatların maliyyələşdirilməsinə əhəmiyyətli məbləğdə vəsait ayıran USAİD-in fəaliyyətini dayandırıb.
O da məlumdur ki, Azərbaycanda illər boyu USAİD-lə əməkdaşlıq edən adamlar var, bir sıra layihələrdə iştirak ediblər və böyük qrantlar alıblar. Maraqlıdır, bu adamlardan biri bu və ya digər formada USAİD-in Azərbaycandakı fəaliyyətini ifşa etməyə cəhd etmir. Niyə?
“Yəni bu səbəbdən USAİD-in Azərbaycandakı fəaliyyətini ifşa etməyə maraq göstərmirlər”
Sözügedən məsələyə aydınlıq gətirən media eksperti Yadigar Məmmədli “Bakı-Xəbər”ə açıqlamasında həmin şəxslərin susmasını bir sıra amillərlə əlaqələndirdi: “Bunun bir neçə səbəbi var. Əvvəla, USAİD korrupsiyalaşmış bir təsisatdır. Dünyanın müxtəlif ölkələrində geniş şəbəkəyə malik idi. Bu səbəbdən USAİD böyük büdcəyə malik idi və bu da ABŞ tərəfindən maliyyələşdirilirdi. USAİD-ə ayrılan böyük vəsaitlərin təyinatı üzrə xərclənməməsi Tramp administrasiyasının məsələyə yenidən baxmasına səbəb oldu. Problem onda idi ki, USAİD təmsilçiləri ayrılan vəsaitləri tamamilə başqa məqsədlər üçün xərcləyirdilər. Yəni mənimsəyirdilər. O cümlədən, terrorçuların maliyyələşdirilməsindən tutmuş digər qeyri-leqal fəaliyyətlərdə USAİD-in adı hallanır. Azərbaycana gəldikdə isə, USAİD 90-cı illərdən başlayaraq bir sıra layihələr həyata keçirib. Həmin layihələrin bir çoxu ölkədə fəaliyyət göstərən QHT-lərlə olub. Ancaq məsələ ondadır ki, USAİD-in korrupsioner fəaliyyəti Azərbaycandan da yan keçmirdi. Bəzi QHT təmsilçiləri USAİD hesabına böyük pullar qazanırdılar. Hətta bəziləri həmin pullar hesabına xaricdə özlərinə mənzil almaları barədə məlumatlar dolaşırdı. Bir sözlə, görünür onlar bu korrupsiyanın bir parçası olduqlarından susurlar. Yəni bu səbəbdən USAİD-in Azərbaycandakı fəaliyyətini ifşa etməyə maraq göstərmirlər. Çünki USAİD-lə əməkdaşlıq edənlərin müəyyən hissəsi bu işin içində olublar. Belə olmasaydı hesab edirəm ki, onlar bu günə qədər susqun mövqe sərgiləməzdilər. USAİD-in hansı nöqsanlı fəaliyyətlə məşğul olduğunu onlar yaxşı bilirlər. Sadəcə, qeyd etdiyim səbəblərdən hələ də susurlar. Hesab edirəm ki, USAİD-lə bağlı araşdırmalar davam etdikcə bir sıra qaranlıq məqamlar ortaya çıxacaq”.
Vidadi ORDAHALLI
