Papa xristianlığa saxta "erməni genosidinin" yalançı qurbanı ilə daha bir ləkə vurdu...
Qasım Hacıyev: “Hanısa erməni keşişinin “soyqırım qurbanı”, “şəhidi” kimi “müqəddəsləşdirilməsi” Roma kilsəsinin özünə baş ucalığı gətirmir”
Ermənilər qondarma “soyqırımın qurbanlarını” ilə xristian dünyasının başını qatmaqda davam edir. Çox təəssüflər olsun ki, Roma Katolik Kilsəsi də erməni yalanına havadarlıq edənlər sırasında boy göstərməkdədir.
Roma Papası Fransiskin qərarına əsasən, qondarma "erməni soyqırımı"nın "şəhidi" sayılan "mübarək" İqnatius Maloyan kanonlaşdırılacaq - "müqəddəsləşdiriləcək”. Bu barədə Vatikana istinadən Aysor.am məlumat yayıb.
Roma Papası Fransiskin İqnatius Maloyanın kanonlaşdırılması ilə bağlı qərarı martın 28-də verdiyi yazılır.
Qeyd olunur ki, “mübarək” İqnatius Maloyan 1869-cu il aprelin 19-da Türkiyənin Mardin şəhərində anadan olub. Onun 14 yaşında Livandakı Bzomar monastırında ruhaniliyə daxil olduğu və 1896-cı ildə ona “İqnati” adı verildiyi yazılır. Yazırlar ki, o, Qahirənin “patriarxal vikarı” təyin edilib, 1911-ci ildə Mardinin “patriarxal vikarı” olub.
"Müqəddəs" İqnatius Maloyan guya "soyqırımı" zamanı onlarla xristianla birlikdə həbs edilərək məhkəmə qarşısına çıxarılıb. Guya məhkəmədə Maloyana “İslamı qəbul etsən həyatını xilas edə bilərsən” deyiblər, o isə “biz heç vaxt dövlətə xəyanət etməmişik. Amma bizdən dinimizə xəyanət etməyi tələb etsəniz, bu, heç vaxt baş verməyəcək” , -deyib. Bu sözü deyəndən sonra o, guya işgəncələrə məruz qalıb və bir müddət sonra edam edilib. 2001-ci ildə Papa II İohann Pavel onu “mübarək” elan edib.
“Ermənilər öz davranışları, yalan və uydurmaları ilə Roma Papasını da torlarına salıblar”
Professor Qasım Hacıyev “Bakı-Xəbər”ə bildirdi ki, ermənilərin məkrli niyyətlərini həyata keçirmək üçün xristian dinindən istifadə edərək Roma Papasına qədər gedib çıxıblar. “Ermənilər qondarma “soyqırım” iddiası ilə bütün dünyanı aldatmaqda davam edirlər. Çox təəssüflər olsun ki, onların bu saxta təbliğatının toruna xristian dini icmaları çox asanlıqla düşür. Siyasi uğursuzluqları, tarixi saxtakarlıqları bir işə yaramadığı üçün son zamanlar dini amillərdən istifadə edirlər. Amma ermənilərin xristian dininə münasibəti özü belə saxtadır. Onlar bu dindən öz çirkin məqsədlərini həyata keçirmək üçün sui-istifadə edirlər.
Təsəvvür edin ki, bunlar nə qədər keşiş, patriarx uydurub hamısını “müqəddəs” élan edirlər. Uydurma keşişləri, uydurma din xadimləri çoxdur. Elə şişirtmə fikirlər irəli sürürlər ki, gerçək xristian müqəddəsləri, Roma Papası belə, onların kölgəsində qalır. Giya ermənilər həmişə barışdırıcı mövqe tutub, guya xristianlığın təəssübünü çəkib. Amma əslində bunlar yalandır. Tarixən xristianların içində narazılıq salan erməni Qriqoryan kilsəsi olub. Ermənilər öz davranışları, yalan və uydurmaları ilə Roma Papasını da torlarına salıblar. Təsəvvür edin ki, bunlar necə hiylə işlədib İqnatius Maloyan deyilən keşişi Roma Papalarına “mübarək şəhid” kimi təqdim ediblər. O şəxsi 2001-ci ildə Papa II İohann Pavel “mübarək” elan edib. İndi də Papa Fransisk onun “müqəddəsləşdirilməsi” barədə qərar qəbul edib”.
Q.Hacıyev qeyd etdi ki, ümumiyyətlə, tarixdə “erməni soyqırımı” deylən hadisə olmayıb, bu ermənilərin və onların havadarlarının, böyük güclərin, antitürk qüvvələrin uydurmasıdır. “Bu “soyqırımın” özü kimi göstərilən rəqəmlər də, insan sayı da tamamilə saxtadır. Belə qələmə verirlər ki, guya Maloyan öz dindən dönmədiyi, islamı qəbul etmədiyi üçün öldürülüb. Guya İqnatius Maloyan xristian “təəssübkeşliyindən” imtina etməyib, buna görə də, “şəhid” edilib. Bu tamamilə absurddur, yalandır, böhtandır”.
Q.Hacıyev qeyd etdi ki, Roma Papasının belə bir qərar verməsi müsbət hal deyil. “Hanısa erməni keşişinin “soyqırım qurbanı”, “şəhidi” kimi “müqəddəsləşdirilməsi” Roma kilsəsinin özünə baş ucalığı gətirmir. Çox təəssüf ki, erməni yalanlarına, saxtakarlıqlarına Roma Papası da uyub.
Hansısa bir erməni keşişinə bu qədər yüksək dəyər verilməsi xristianlığın özünə və gerçək dini müqəddəslərə hörmətsizlikdir. Xristian dinin müqəddəslərinə hər zaman böyük ehtiramla yanaşmışıq. Amma onların sırasında hansısa uydurma “soyqırım qurbanının”, “şəhidinin” olması təəssüf doğurur”-deyə Q.Hacıyev bildirdi.
Q.Hacıyevin sözlərinə görə, Ermənistan bir tərəfdən Türkiyə ilə əlaqələrin bərpasından, sərhəddin açılmasından, xoş qonşuluq münasibətlərindən danışır, Azərbaycanla sülh müqaviləsi bağalamaq istədiyini deyir, o biri tərəfdən də hansısa bir keçişi əlində bayraq edib Roma Papasını onu “müqəddəsləşdirməyə” məcbur edir, bunlar isə bir-birinə zidd məsələlərdir. “Qondarma erməni “soyqırımını” indi də “şəhid” keşişin adı altında xristian dünyasında təbliğ edirlər” - deyə Q.Hacıyev qeyd etdi.
Q.Hacıyev əlavə etdi ki, halbuki, Birinci Dünya Müharibəsində erməni qudurları, silahlı dəstələri təkcə Türkiyənin Van şəhərində 40 min türk-müsəlmanı qətlə yetirib, bu qətliamları digər şəhərlərdə, kəndlərdə də davam etdiriblər. O dövrdə türklərə qarşı soyqırımın olduğunu deyən Q.Hacıyev bildirdi ki, xristian dünyası erməniləri buna görə qınamalıdır, nəinki saxta genosidin dalınca getməlidirlər.
İradə SARIYEVA
