Ermənistan KTMT-yə növbəti zərbəni vurdu - Rusiya məmurları ancaq danışırlar...
Ramil Məmmədli: “Ukraynada gedən müharibə ilə əlaqədar Rusiya sərt addımlar ata bilmir”
Rəsmi İrəvan Kollektiv Təhlükəsizlik Müqaviləsi Təşkilatının (KTMT) Katibliyinə təşkilatın maliyyələşdirilməsinə dair sazişi imzalamaqdan imtina etdiyini bildirib.
“Ermənistan tərəfi KTMT Katibliyinə “KTMT-nin 2024-cü il büdcəsi haqqında” qərarı imzalamadığını və müvafiq olaraq bu təşkilatın fəaliyyətinin maliyyələşdirilməsində iştirak etməyəcəyini rəsmən bildirib”, - deyə Ermənistan XİN-dən bildiriblər. Nazirliyin məlumatına görə, KTMT-nin daxili prosedurlarına uyğun olaraq, təşkilatın illik büdcəsi haqqında məlumat ictimaiyyətə açıqlanmayacaq. Qeyd edək ki, bundan əvvəl Rusiya xarici işlər nazirinin müavini bəyan etmişdi ki, Ermənistan 2025-ci ilin sonuna qədər müvafiq rüsumları ödəməsə, KTMT-yə üzv ölkələr vəziyyətin inkişafı üçün müxtəlif ssenarilər nəzərdən keçirə bilər. Ancaq Rusiya rəsmilərinin bu kimi açıqlamaları ümumi sözdən o tərəfə keçmir.
“Bütün hallarda güman edirəm ki, İrəvanın tezliklə təşkilatdan çıxmağa cəsarəti çatmayacaq”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, Ermənistan davamlı olaraq KTMT-ni iqnor etsə də yaxın vaxtlarda bu qurumdan çıxmağa cəsarət etməz. Hərbi ekspert Rusiyanın KTMT ilə bağlı Ermənistana qarşı sərt addımlar atmamasını bir sıra amillərlə əlaqələndirdi: “Məsələ ondadır ki, Rusiya indiki dövrdə sərt addımlar atsa, bu, Ermənistanın rəsmən KTMT-dən çıxması ilə nəticələnə bilər. Bu isə KTMT-nin dağılmasına yol aça bilər. Yəni digər üzv dövlətlər də bənzər addımlar ata bilər. Ukraynada gedən müharibə ilə əlaqədar Rusiya Ermənistanla bağlı sərt addımlar ata bilmir. Onu da nəzərə almaq lazımdır ki, Moskva bir sıra postsovet ölkəsini öz nəzarətində saxlamaq üçün KTMT-dən bir vasitə kimi istifadə edir. Rusiya postsovet ölkələrinin bir hissəsini nəzarətdə saxlamaq nöqteyi-nəzərdən təşkilatın fəaliyyətdə olduğunu nümayiş etdirmək istəyir. Bunun üçün il ərzində bir neçə təlimlər keçirilir, yığıncaqlar təşkil olunur, bəzi bəyanatlar səsləndirilir. Reallıq isə budur ki, təşkilatın üzvlərinin sayı artmır, genişlənmir. Yəni Rusiya KTMT-ni NATO-ya alternativ görə bilər, həqiqət isə bu, belə deyil. Çünki Şimal alyansı nəhəng bir gücdür. Son illərdə hər hansı ölkə KTMT-yə üzv olmayıb. Ancaq 2022-ci ildə iki Avropa ölkəsi hərbi təşkilatın üzvü olub. Dünyada yeni hərbi qütblər, bloklar yaranır. Burada söhbət təkcə NATO-dan getmir. O baxımdan, KTMT-nin mövcudluğu daha çox formal xarakterlidir. Ən son olaraq Qazaxıstan iğtişaşlarını yatırmaqda iştirak edib, bir də Ermənistanla olan qalmaqalı ilə gündəmə gəlməkdədir. İrəvan isə bu təşkilatı tərk etmək üçün bəhanə axtarır, amma Rusiya bunu onlara vermir. Bütün hallarda güman edirəm ki, İrəvanın tezliklə təşkilatdan çıxmağa cəsarəti çatmayacaq. Çünki geosiyasi şərait dəyişir. Bəzən görürsən ki, Ermənistan Rusiyaya doğru manevrlər edir. Üstəlik, Ermənistanın Rusiyadan iqtisadi asılılığı böyükdür”.
Vidadi ORDAHALLI
