Yerli seçkidə biabırçı pozuntular baş verdi - seçki mövzusunda hay-küyçü Avropa susdu...
Xəyal Bəşirov: “Ermənistanda keçirilən seçkilərdə baş verən qanun pozuntularına Avropa təsisatlarının heç bir münasibət bildirməməsi onların ikiüzlü siyasətindən, ikili yanaşmasından irəli gəlir”
Ermənistanın Gümrü və Parkar icmalarının yerli idarəetmə orqanlarına keçirilən seçki başa çatıb. Sözügedən seçkilərində ciddi qanun pozuntuları baş verib. Nikol Paşinyan hökumətinin represiya maşınını işə saldığı və siyasi resurslardan sui-istifadə etdiyi bildirilir.
“Ermənistan” fraksiyası Gümrü və Parakar şəhərlərində seçkilər zamanı baş verən qanun pozuntuları ilə bağlı bəyanat yayıb. “Ermənistan” fraksiyası bildirib ki, 2025-ci il martın 30-da Gümrü şəhərində və genişləndirilmiş Parakar icmasında sakinlər öz seçimlərini ediblər və “Mülki müqavilə” partiyasının yerli hakimiyyəti ələ keçirməsinə imkan verməyiblər.
Bəyanatda qeyd olunur ki, buna baxmayaraq Nikol Paşinyan hakimiyyəti seçicilərin səslərinə məhəl qoymayıb, digər yerli özünüidarəetmə orqanlarında olduğu kimi, vətəndaşların əvvəlki seçiminə əhəmiyyət verməyib və və yerli hakimiyyəti ələ keçirib. “Bu dəfə rejim sonsuz olaraq inzibati resurslardan istifadə etdi, repressiv qurumların köməyi ilə müxalifət namizədlərinə təzyiq göstərdi, seçiciləri qorxu mühitində yönləndirməyə çalışdı...” - deyə bəyanatda vurğulanır.
Bəyanatda o da vurğulanır ki, Paşinyan hökuməti bütün məmur korpusunu həmin icmalara ezamiyyətə göndərib. “Uğursuzluqdan sonra isə riyakarlıqla bəyan edirlər ki, azad, ədalətli seçkilərin qarantı onlardır, vətəndaş seçimi onlar üçün qanundur. Yerli özünüidarə şurasına seçkilərdə heç vaxt siyasi resurslardan belə sui-istifadə halı olmayıb”. Bu fikirlər bəyanatda yer alıb.
Ermənistanda keçirilən seçkilərdə ciddi qanun pozuntuları baş verib, yerli müxalifət Paşinyan hökumətini necə deyərlər, yıxıb sürüyüb, amma Avropa strukturlarından-Avropa Şurasından, Avropa Parlementindən hər hansı bir reaksiya yoxdur.
Belə bir hal Azərbaycanda baş versəydi indi Avropa təsisatları susmurdu, çığır-bağır salırdı. Bu ikili standat nədən qaynaqlanır? Niyə Ermənistanda baş verən bu boyda seçki pozuntusuna, müxalifətin etirazlarına reaksiya vermirlər?
Siyasi Hüquq və Araşdırmalar Mərkəzinin rəhbəri Xəyal Bəşirov “Bakı-Xəbər”ə şərhində bildirdi ki, Ermənistanda baş verən qansuzluqlara Avropa təsisatlarının reaksiyasız qalmasının ilk dəfə deyil şahidi oluruq, bu hər zaman müşahidə olunan bir yanaşmadır. “Ermənistanda keçirilən seçkilərdə nə qədər ciddi qanun pozuntuları baş versə də belə, Avropa təsisatları heç zaman sərt reaksiya vermir, sanki bu ölkədəki qanuna zidd məsələrdən xəbərsiz olurlar.
Biz günü gündən beynəlxalq hüququn deqradasiyaya uğradığını görürük. Qərbdən olan bəzi dövlətlərin, beynəlxalq qurumların insan hüquq və azadlıqlarına, demokratiyaya, seçkilərə necə münasibət göstərdiyini görürük. Bu təbii ki, ikili standartlardan, ikiüzlü yanaşmadan və öz maraqlarını hər şeydən üstün tutmaqlarından irəli gəlir. Söhbət hansısa qüvələrin, güclərin dar mənada maraqlardan gedir ki, onlar bu maraqları hər şeydən üstün tuturlar. Bu ondan xəbər verir ki, həmin Qərb təşkilatlarının özlərinin “standartları” var və ondan yanaşaraq belə ikiüzlü siyasət ortaya qoyurlar. Əgər seçki anlayışı varsa və bu beynəlxalq səviyyədə ümumi olaraq qəbul edilirsə, bu seçkilərə münasibət bütün dünyada eyni cür olmalıdır. O seçkilərin keçirilməsi ilə bağlı tələblər və onların nəticələrinin dəyərləndirilməsi bütün dövlətlərdə, regionlarda eyni şəkildə olmalıdır. Məsələn, müqayisə üçün deyim, Gürcüstanda parlament seçkiləri keçirildi. Parlament seçkisindən sonra Gürcüstanın daxili qanunvericiliyinə uyğun olaraq ölkə prezidenti seçildi. Keçirlən o seçkilərin nəticələri Qərbin bir sıra dövlətləri, qurumları, gücləri tərəfindən qəbul olunmur, tanınmır. Gürcüstandakı seçkilərə sərt reaksiya verən həmin təsisatlar Ermənistanda yerli özünüidarəetmə orqanlarına keçirilən seçkidəki ciddi qanun pozuntularına reaksiya verməyib susurlar. Mən iki ölkənin timsalında kiçik bir müqayisə verdim. Biz burda nə qədər qərəzli, ədalətsiz, ikili yanaşmanın şahidi oluruq. Biz bu amilə görə deyirik ki, seçkilərin keçirilməsi ölkənin daxilində baş verən bir proses kimi xalqın haqqıdır, hüququdur, xalqın o prosesə münasibətidir. Bu şəkildə dəyərləndirilməlidir”.
X.Bəşirov qeyd etdi ki, Ermənistanda keçirilən seçkilərdə hər zaman ciddi qanun pozuntuları olub və həmin təşkilatlar da bunu görməzdən gəlib. “Seçkilər zamanı qanun pozuntuları Ermənistanda dəfələrlə təkrar olunub. Bu ölkədə Paşinyan hökumətinə qarşı keçiş Baqrat Qalstyanın rəhbərli altında etiraz aksiyaları keçirildi. O etiraz aksiyalarının hansı şəkildə boğulmasını gördük. Biz demirik ki, keşişin etirazı haqlı idi, yaxud qanuni, ədalətli idi. Söhbət aksiyalara qarşı Ermənistan hökumətinin və dövlətin müvafiq qurumlarının yanaşmasından, o etirazlara yanaşmasından gedir. Dünyanın ayrı-ayrı bölgələrində baş verən analoji hadisələrə etiraz edən, səsini qaldıran, ard-arda bəyanatlar verən beynəlxalq təşkilatlar, beynəlxalq aləm Ermənistana gələndə susur. Avropadan bu prosesə göstərilən münasibətin şahidi olduq”. X.Bəşirov qeyd etdi ki, dünyanın müxtəlif ölkələrində seçki pozuntuları baş verərsə, o beynəlxalq qurumlar ona dərhal sərt reaksiya verir: “Gürcüstanda keçirilən seçkilərdə həmin qurumların hansı reaksiyalar verdiyi məlumdur. Amma Ermənistanda keçirilən seçkilərdə baş verən qanun pozuntularına Avropa təsisatlarının heç bir münasibət bildirməməsi onların ikiüzlü siyasətindən, ikili yanaşmasından irəli gəlir. Ermənistanda baş verən istənilən qanun pozuntusuna, hökumətin repressiv davranışlarına göz yumurlar.
Azərbaycana münasibətdə də onlar Ermənistan kimi dövlətlərdən tamam başqa münasibət sərgiləyiblər. Buna görə də hesab edirəm ki, bu beynəlxalq hüququn deqradasiyaya uğramasının göstəricisidir. Bu eyni zamanda BMT başda olmaqla beynəlxalq təşkilatların mexanizmlərinin çürüməsindən xəbər verir. Təbii, bu ona gətirib çıxaracaq ki, bütün dövlətlər bu seçki prosesində, ümumiyyətlə siyasi proseslərdə beynəlxalq aləmin mövqeyini qəbul etməyəcəklər. Çünki dövlətlər arasında fərq qoyulması, ayrı-seçilik edililməsi həmin o münasibəti göstərən təsisatların şəffaf, ədalətli olmamasından, qərəzli olmasından xəbər verir ki, bu da onlara etimadı, etibarı sıfra endirəcək” - deyə X.Bəşirov qeyd etdi.
İradə SARIYEVA
