Fransanın müstəmləkə qurbanları Bakıdan dünyaya səsləndilər - kömək etməsəniz...
Azər Həsrət: “Bakı müstəmləkəçilikdən əziyyət çəkən xalqların ümid yerinə çevrilib”
Məlum olduğu kimi, Bakıda Bakı Təşəbbüs Qrupunun təşkilatçılığı ilə keçirilən "Kolonializm: Dini-Milli Kimliyin Silinməsi" adlı beynəlxalq konfrans keçirilib. Konfransda müstəmləkəçilikdən əziyyət çəkən xalqların nümayəndələri iştirak edib.
Beynəlxalq Dekolonizasiya Cəbhəsinin katibi Joze Marten Jan-Pyer çıxışı zamanı deyib ki, Bakı Təşəbbüs Qrupunun yaradılması və bir sıra konfransların keçirilməsi bizə imkan verdi ki, müstəmləkə, insanlara qarşı zülmlər barədə daha çox məlumat ötürə bilək: “Müstəmləkəçiliyin aradan qaldırılması üçün səylərimizi birləşdirməliyik. Bizim xalqlar artıq qətiyyətlə vuruşurlar. Hər bir mübarizə imkan verir ki, biz birgə azadlığımızı daha da möhkəmləndirək. Biz xaricdən dəstək almalıyıq. BMT bu məsələdə bizim üçün strateji tərəfdaş ola bilər. Biz bütün beynəlxalq təşkilatlarına, qeyri-hökumət təşkilatlara çağırış edirik ki, müstəmləkədən əziyyət çəkənlərə dəstək olsunlar. Müstəmləkədən əziyyət çəkən xalqların hüquqlarının qorunması təmin olunmalıdır".
“Azərbaycan dövləti müstəmləkəçilikdən əziyyət çəkən xalqlara hər zaman olduğu kimi kömək etməyə davam edəcək”
Siyasi şərhçi Azər Həsrət “Bakı-Xəbər”ə şərhində bildirdi ki, Bakı müstəmləkəçilikdən əziyyət çəkən xalqların ümid yerinə çevrilib: “Azərbaycan əzilən, istibdad, zülm görən xalqların səsini dünyaya çatdırmaq üçün bir platformaya çevrilib. Azərbaycan üzərindən dünyaya bu xalqların səsləri bəyan edilir və yavaş-yavaş eşidilir. Bu səbəbdən də həmin çağırışlar təsadüfi deyil. Xüsusi olaraq qeyd edim ki, Fransa müstəmləkəçiliyindən əziyyət çəkən insanlar da Azərbaycanın onlara yardımçı olacağından əmindir. Məlumdur ki, Azərbaycanın özü uzun illər istibdaddan əziyyət çəkib, müstəmləkə şəraitində yaşayıb, haqq və hüquqlarımız ayaqlar altından olub. Mücadilə və mübarizə aparıb, qalib olmuşuq. Dövlətimizi dünyaya tanıdırıq, yetərincə də sanballı bir dövlət kimi dünyada söz sahibi kimi hörmətimiz var. Əlbəttə, müstəmləkəçilikdən əziyyət çəkən xalqlar bu örnəyi görüb, Azərbaycan üzərindən dünyaya çağırışlar edirlər. Bu yaxşı bir haldır”.
Həmsöhbətimiz hesab edir ki, Azərbaycan dövləti müstəmləkəçilikdən əziyyət çəkən xalqlara hər zaman olduğu kimi kömək etməyə davam edəcək ki, onların səsi beynəlxalq tribunalardan daha çox eşidilsin.
Günel CƏLİLOVA
