Makronun təşəbbüsü reallaşmadan fiaskoya uğrayır – heç bir ölkə ABŞ-sız Ukraynaya qoşun göndərmək istəmir…
Fransa prezidenti Makron Parisdə keçiriləcək sülh və təhlükəsizlik sammitinə hazırlıq çərçivəsində Ukrayna lideri Zelenskini Yelisey sarayında qəbul edib. Sammitdə Makronun təşəbbüsü ilə yaradılacaq və mümkün atəşkəs zamanı Ukraynaya qoşun göndərmək istəyən ölkələrin daxil olacağı “könüllülər koalisiyası”nın çərçivəsi müəyyən ediləcək.
Görüşdən sonra təşkil edilən ortaq mətbuat konfransında Makron Fransanın Ukraynaya 2 milyard avro dəyərində yeni hərbi yardım paketi təklif edəcəyini və bu paketə “Mistral” hava hücumundan müdafiə raketləri, AMX-10 RC tankları və sursatların daxil olduğunu açıqlayıb. Makron Avropanın Rusiyanı çəkindirə biləcək bir müdafiə gücü yaratmasının vacib olduğunu da vurğulayıb.
“Reuters” agentliyi Avropadakı diplomatlara istinadən bildirir ki, Ukraynaya Fransa və Britaniyanın rəhbərlik etdiyi və 30-a yaxın ölkəni əhatə edən “könüllülər koalisiyası”nın bir hissəsi kimi xarici qoşunların göndərilməsi ideyasına maraq getdikcə daha da azalır. Avropada bu mövzuda müzakirələri Kiyevə müxtəlif vasitələrlə dəstək vermək planları üstələyir. Qeyd edilir ki, vəziyyətin Ukrayna əleyhinə dəyişməsi və ABŞ prezidenti Donald Trampın Avropanın təhlükəsizlik tələblərini dəstəkləməməsi koalisiyanın çəkindirici gücünü zəiflədir. Bundan başqa, ABŞ-ın kəşfiyyat və maddi-texniki dəstəyi olmadan sülhməramlı missiyanı yerinə yetirməyin çətin olacağı bildirilir. Bu səbəbdən Avropa ölkələri daha çox Ukrayna ordusunun daha yaxşı silahlanması və NATO üzvlüyünə alternativ təhlükəsizlik təminatları kimi variantlara üstünlük verirlər.
TAHİR
