ABŞ-ın gizli planları ortaya çıxdı, Ermənistan qarışdı - İrəvanda gizli biolaboratoriyalara qarşı etirazlar başladı…
ABŞ-ın Ermənistana gizli hərbi yük göndərməsi xəbərləri bu ölkədə gərginliyi artırıb. ABŞ-ın gizli planı üzə çıxdıqdan sonra Ermənistanda başlayan təpkilər, bioloji fəaliyyətlərə qarşı genişmiqyaslı etirazlara çevrilib. Paytaxt İrəvanda ABŞ səfirliyi qarşısına toplaşan etirazçılar Amerika hərbi laboratoriyalarının bağlanmasını tələb ediblər.
“Türkiye” qəzeti yazır ki, ötən həftə Türkiyə və Azərbaycan mətbuatında geniş əks-səda doğuran ABŞ-ın Gürcüstan üzərindən Ermənistana hərbi yük göndərməsi xəbəri Ermənistanda böyük ictimai narazılıq yaradıb. Göndərilən hərbi yükdə bioloji avadanlıqlar və hərbi ləvazimatların olduğu iddiası insanları küçələrə çıxarıb.
Xüsusilə də ABŞ-ın biolaboratoriya qurmağa hazırlaşdığına dair iddialar etirazları daha da alovlandırıb. Etirazçılar laboratoriyaların Ermənistanın milli təhlükəsizliyinə təhdid yaratdığını bildirərək, ABŞ bioloji laboratoriyalarının ölkədən çıxarılmasını tələb ediblər.
Nümayişlər zamanı çıxış edən hərbi ekspert Hayk Nahapetyan bildirib ki, Ermənistan sınaq meydançası ola bilməz: “Bu laboratoriyaların ölkəmizdə olması xalqımız və region üçün ciddi təhlükədir. ABŞ-ın bioloji risqlərin azaldılması proqramı adı altında həyata keçirdiyi fəaliyyətlər araşdırılmalı və mümkün qədər tez dayandırılmalıdır".
Etirazçılar baş nazir Paşinyanı və hökuməti ABŞ-ın hərbi və bioloji fəaliyyətlərinə dərhal son qoymağa çağırıblar. Nahapetyan bəyan edib ki, Ermənistanın milli təhlükəsizliyini qorumaq üçün bazaların və laboratoriyaların bağlanması vacibdir.
Keçmiş qida təhlükəsizliyi direktoru Qriqor Qriqoryan isə bildirib ki, USAID tərəfindən həyata keçirilən bioloji risq proqramları insan sağlamlığı üçün böyük təhlükə yaradır: "Ermənistan ərazisində aparılan bioloji tədqiqatların təfərrüatları açıqlanmalıdır. Bu fəaliyyətlər Bioloji Silahlar Konvensiyasına ziddir və beynəlxalq nəzarətə açılmalıdır".
Etirazçılar həmçinin ABŞ səfiri Kristina Kvinin Ermənistandan çıxarılması üçün petisiyaya başlayıblar. Kampaniya çərçivəsində martın 24-də ABŞ səfirliyinə rəsmi bildiriş veriləcəyi açıqlanıb. Aksiya iştirakçıları ABŞ-dakı erməni diasporunu isə Ermənistan səfiri Lilit Makuntsa qarşı analoji kampaniyaya başlamağa çağırıblar.
ABŞ-ın Ermənistandakı fəaliyyətinə artan etirazlara baxmayaraq, Vaşinqton administrasiyası tərəfindən hələlik rəsmi açıqlama verilməyib.
Ermənistandakı nümayişlərin yaxın günlərdə daha da böyüyəcəyi gözlənilir.
TAHİR
