Ağ Evdəki qırğından sonra ilk görüş - Tramp Ukraynanın atom stansiyalarının ABŞ-a verilməsini istədi…
Trampla Zelenski arasında telefon danışığı olub. Təxminən bir saat davam edən telefon danışığı zamanı Tramp Ukraynaya atom elektrik stansiyalarının idarə edilməsində “kömək” təklif edib. “Reuters” xəbər verir ki, Tramp Zelenskiyə deyib ki, Ukraynanın atom elektrik stansiyalarını qorumağın “ən yaxşı yolu” onların Amerika mülkiyyətində olmasıdır.
Ağ Evin sözçüsü Karolayn Livitt də deyib ki, bu stansiyaların ABŞ-ın mülkiyyətində olması bu infrastrukturun qorunmasını və Ukraynanın enerji infrastrukturunun dəstəklənməsini təmin edə bilər: “Birləşmiş Ştatlar elektrik enerjisi və infrastrukturun idarə olunması sahəsində təcrübəsi ilə bu stansiyaların istismarında çox kömək edə bilər”.
Bildirilir ki, Zelenski “mülki insanları qorumaq üçün əlavə hava hücumundan müdafiə sistemləri, xüsusən Patriot raket sistemləri” istəyib. Tramp da “mövcud olanları, xüsusən də Avropada olanları tapmaq üçün birgə işləməyə razılaşıb”. Livittin sözlərinə görə, liderlər Rusiyanın Kursk vilayətindəki vəziyyəti də müzakirə ediblər.
Görüş barədə sosial mediada açıqlama yayan Tramp isə görüşün “çox yaxşı” keçdiyini deyib: "Söhbətin böyük hissəsi Rusiya prezidenti Putinlə söhbətimə əsaslanırdı və Rusiya və Ukraynanın tələb və ehtiyaclarını uyğunlaşdırmaq məqsədi daşıyırdı".
Qeyd edək ki, Ukraynada dörd aktiv atom elektrik stansiyası var: Zaporojye, Rivne, Xmelnitski və Cənubi Ukrayna Atom Elektrik stansiyaları. Ən böyük Zaporojye Atom Elektrik Stansiyası münaqişə başlayandan Rusiyanın nəzarətinə keçib və münaqişə səbəbindən tez-tez beynəlxalq diqqət mərkəzində olub.
CNN Tramp administrasiyasının rəsmilərinə istinadən xəbər verir ki, Zaporojye Atom Elektrik Stansiyası Ukraynadakı atəşkəs danışıqlarının bir hissəsi ola bilər. Zelenski elektrik stansiyaları məsləsində Ukraynanın rolunun əvəzsiz olduğunu vurğulayıb və əlavə edib ki, onların yenidən qurulması üçün pul, ekspertlər və bir neçə il vaxt lazım olacaq.
TAHİR
