İsveçrə parlamenti Qarabağ ermənilərini geri qaytarmaq üçün “əməliyyata başladı”...
Akif Nağı: “Açıq görsənir ki, onlar erməni mərkəzlərinin, lobbi təşkilatlarının sifarişlərini yerinə yetiriblər, çünki onlardan maliyyələşirlər”
İsveçrə parlamentinin də erməni diaspor və lobbi təşkilatlarının təsiri altında olduğu gizlin deyil. Belə olmasaydı, bu ölkənin Federal Assambleyasının yuxarı palatası olan Dövlətlər Şurası “Dağlıq Qarabağ üçün Sülh Forumu: Ermənilərin geri qayıtma imkanlarının təmin edilməsi” adlı 24.4259 saylı qanun layihəsini qəbul etməzdi.
Palatanın 46 üzvündən 29-u İsveçrə hakimiyyətini keçmiş “Dağlıq Qarabağ” və Azərbaycan nümayəndələri arasında dialoq üçün ayrıca platforma yaratmağa çağıran təşəbbüsün lehinə səs verib. Onların məqsədi könüllü olaraq Azərbaycan ərazisini tərk edən erməni əhalisinin Qarabağa “təhlükəsiz, kollektiv və ləyaqətlə qayıtmasını” təmin etməkdir (?).
Bildirək ki, Dövlətlər Şurasının bu bədnam qərarı eyni təklifin 17 dekabr 2024-cü il tarixində İsveçrə Milli Şurasının Aşağı Palatası tərəfindən qəbul edilməsindən sonra verilib. Hər iki palata tərəfindən təsdiq edildikdən sonra 24.4259 saylı qanun layihəsi Federal Şuranın onu həyata keçirməyə başlaması öhdəliyi qoyur.
Məlum, bu məsələnin İsveçrəyə heç bir aidiyyəti olmadığı halda o, Azərbaycanın daxili işlərinə qarışır və hansısa tələblərdə bulunur.
“Bu siyasi alverdir və bundan pul qazanırlar”
Azad Vətən Partiyasının sədri Akif Nağı “Bakı-Xəbər”ə bildirdi ki, sözügedən qərarın qəbul edilməsi yolverilməzdir və qəbuledilməzdir. Bu qərarın qərəzli olduğunu deyən A.Nağı hesab edir ki, bu kağız parçası erməni mərkəzlərinin sifarişi ilə qəbul edilib. “Avropa ölkələri, xüsusən də İsveçrə özünü “demokratik” ölkə kimi göstərməyə çalışır. Amma onların hər birinin məkrli niyyətləri, çirkin maraqları var. Özlərinin maraqları olan yerdə demokratiya da yaddan çıxır, başqa şey də. İsveçrənin kantonlarından birində bir neçə il əvvəl mühacirlərin ictimai yerlərdə görünməsini qadağan edən qanun qəbul olundu. Mühacirlərə qarşı belə bir rəsmi qadağa qoyuldu. İsveçrənin özündə də, Avropanın başqa öılələrində də hüquq müdafiəçiləri bu qanuna etiraz etdilər, onu qeyri-insani, qeyri-humanist addım adlandırdılar, diskriminasiya olduğunu dedilər. Sonra qəbul olunmuş qanuna əhalinin rəyini öyrənmək üçün İsveçrə Federel hökuməti bütün ölkə ərazisində sorğu keçirdi. Sorğuda iştirak edənlərin 85 faizi hökumətin bu qərarına müsbət yanaşdı. Bu, İsçevrə mühitinin göstəricisi idi ki, bunların mühacirlərə, insanlığa yanaşmaları budur, yaratdıqları görüntü ilə fərqlidir.
İndi də durub ermənilərlə bağlı qərar qəbul ediblər. İsveçrəyə nə düşüb ki, başqa ölkənin daxili işlərinə qarışır? Sizin nə haqqınız var ki, başqa ölkənin daxili işləri ilə bağlı qərar qəbul edəsiniz, erməniləri əlinizdə bayraq tutub onlardan Azərbaycana qarşı təzyiq vasitəsi kimi istifadə edəsiniz? İsveçrədə ifrat millətçilik baş alıb gedir, öz millətçiliklərini də xoşları gəlməyən ölkələrə bu şəkildə göstərməyə çalışırlar. Guya bunlar ermənilərin müdafiəçiləridir. Dünyada o qədər problemlər var ki, onların heç biri qaldırılmır. Qəzzada baş verənlərə, başqa yerlərdə insanlara qarşı törədilən kütləvi qırğınlara, terror aktlarına və sairə münasibət bildirmirlər, amma yeri gələndə ermənilərin müdafiəsinə qalxırlar”.
A.Nağı hesab edir ki, burda söhbət heç də ermənilərin müdafiəsindən getmir, Azərbaycan bütövlükdə Avropa cameəsinin əlində alət olmadı, onlara ondan regionda alət kimi istifadə etmələri üçün şansı vermədi. “Bu təkcə İsveçrənin qərarı deyil, ümumavropa qərarıdır. Avropa Parlamentinin tutduğu xətdir ki, ayrı-ayrı ölkələrdən, istər Belçika, Niderland, istər Almaniya, istərsə də İsçeçrə olsun, Azərbaycana qarşı istifadə etsin. Fransa onsuz da Azərbaycana düşməndir. Bununla bağlı Avropa İttifaqında Avropa Parlamenti tərəfindən bir xətt qəbul olunub və o xəttə uyğun vaxtaşırda bu cür qətnamələr, sənədlər qəbul edib Azərbaycana təzyiq etməyə çalışırlar”.
A.Nağı bildirdi ki, Avropa ölkələri “dəyərlərlə” bütün ölkələri öz nəzarətində saxlamağa cəhd edir, daxillərindəki proseslərə müdaxilə etmək istəyirlər. A.Nağının fikrincə, hətta bu istiqamətdə milyonlarla pul da xərcləyirlər. Azərbaycanın daxilində bunların fəaliyyətinin məhdudlaşdırıldığını deyən A.Nağının sözlərinə görə, o ölkələr ölkəmizin daxilindəki bəzi qrupları öz nəzarətlərində saxlamaq üçün milyonlarla vəsait xərcləyirlər. A.Nağı deyir ki, onlar ölkələrdə öz maraqlarına xidmət edən proksi qüvvələr saxlayırlar və onlar vasitəsilə hakimiyyətlərə nəzarət edib onların qəbul etdiyi qərarlara təsir etmək niyyəti güdürlər. Müsahibimiz qeyd etdi ki, Avropa ölkələri onların sözündən çıxan, maraqlarına xidmət etməyən ölkələri qara rəngdə təqdim edirlər. “Bu baxımdan, İsveçrə parlamentinin Qarabağdan könüllü getmiş ermənilərin geri qaytarılması ilə bağlı qərarı absurddur, bunun əsasında saxta iddialar dayanır. Açıq görsənir ki, onlar erməni mərkəzlərinin, lobbi təşkilatlarının sifarişlərini yerinə yetiriblər, çünki onlardan maliyyələşirlər. Bu siyasi alverdir və bundan pul qazanırlar. Bu bizə aydındır. Azərbaycan Avropa Şurası Parlament Assambleyasının, Avropa Parlamentinin, eləcə də İsveçrənin, ona bənzər ölkələrin qərarlarını bir kağız parçası sayır. Belə də olmalıdır. Bu bizim daxili işimizdir. Heç bir təzyiq olmadan ermənilər ölkəmizi tərk edib və onların geri qayıtması üçün də Azərbaycan konkret şərt qoyub ki, Azərbaycan vətəndaşlığını, qanunlarını, bayrağını qəbul etməlidirlər, geri qayıdanlar arasında hərbi cinayətlərdə iştirak edənlər cəzalarını alacaqlar. Azərbaycanın şərtləri bundan ibarətdir. Buna kiminsə müdaxiləsinə ehtiyac yoxdur. Azərbaycan siyasətini bu cür də davam etdirməlidir, bu kimi qərəzli qətnamələrə heç reaksiya da verməməlidir” - deyə A.Nağı bildirdi.
İradə SARIYEVA
