Trampın müşaviri Bakıda məhkəməsi gedən ermənilərin statusu ilə bağlı ciddi yanlışa yol verdi...
Ramil Hüseynov: “Bayden dönəmində Departamentə doluşmuş ermənipərəst məmurlar hələ də oradadır”
ABŞ prezidentinin milli təhlükəsizlik üzrə müşaviri Mayk Uoltsla Azərbaycan prezidentinin köməkçisi Hikmət Hacıyev arasında təmas olub.
X hesabında paylaşım edən Uolts Cənubi Qafqazda münaqişəyə son qoyulması gərəkdiyini bildirib.
“Biz Azərbaycan və Ermənistanın irəliyə doğru böyük addım atmasından və sülh müqaviləsi ilə bağlı razılıq əldə etməsindən məmnunuq. Mən ona bildirdim ki, biz bu sülh sazişini indi yekunlaşdırmalıyıq, məhbusları azad etməli və regionun daha təhlükəsiz, firavan olması üçün birlikdə çalışmalıyıq. Amerikanın Qızıl Dövrü dünyaya sülh və firavanlıq gətirəcək və bu baş verənə qədər biz işləməyi dayandırmayacağıq”, - Uolts paylaşımında yazıb.
Burda diqqət çəkən məqam odur ki, Trampın müşaviri əsas olmadan separatçıları məhbus kimi təqdim edir və onların buraxılmasını təklif edir. Erməni mediası da bunu əlində bayraq edib manşetə çıxarır. Üstəlik, Uolts separatçıları məhbus adlandırdığı halda, erməni tərəfi bunu əsir kimi tərcümə edir. Ruben Vardanyanın vəkili Jared Genser isə Trampın müşavirinin ziyanlı çağırışından çıxış edərək “əsirlər”in azad olunması tələbi ilə çıxış edir. Məgər onların içində “əsir” var? Ermənistan xarici işlər naziri Ararat Mirzoyan da Uoltsun çağırışından cuşa gələrək “ümidverici” danışır: “Ümid edirəm ki, bu bəyanatdan sonra sadəcə söz xatirinə sözlər deyil, real əməllər gələcək”. Bir sözlə, bütün ermənilərin hədəfi birdir: cinayətkarlar cəza almadan azad edilsinlər.
Maraqlıdır, nə əcəb ABŞ rəsmisi onları məhbus hesab edir? Halbuki, həmin separatçılar ağır cinayətlərdə ittiham edilir. Azərbaycana qarşı misilsiz cinayətlər törədənləri, üstəlik məhkəmə hökmü də elan edilmədən necə buraxmaq olar?
“Trampın müşavirinin mühakimə edilən separatçılarla bağlı çağırışı hüquqi və siyasi baxımdan doğru deyil”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Trampın müşavirləri əvvəlki adminstrasiyanın yalan üzərində qurulan hesabatlarına söykənir: “Yoxsa bu Mayk Uolts niyə bu dərəcədə məsuliyyətsiz açıqlama ilə çıxış etsin ki? Məsələ ondadır ki, Bayden dönəmində Dövlət Departamentinə doluşmuş ermənipərəst məmurlar hələ də oradadır. Onlardan biri də Luis Boonodur və hazırda Tramp administrasiyası ilə işləyir. Məhz onların hazırladığı hesabatlardan, arayışlardan çıxış edərək Uolts belə açıqlama ilə çıxış edir. Bunlar anlamaq istəmirlər ki, Azərbaycanla təzyiq dilində danışmaq olmaz. Belə çağırışlar tam əks effekt verəcək. Çünki Azərbaycanın əlində kifayət qədər faktlar var. Mühakimə olunan separatçılar konkret cinayətlərdə ittiham olunurlar. Qarabağda azərbaycanlıların kompakt yaşadığı kənd və şəhərlərdə soyqırımlar törədiblər. Mülki insanları qətlə yetiriblər, etnik təmizləmə törədiblər. Hərbi əsirlərə gəldikdə, Azərbaycan onların hamısını 44 günlük müharibədən sonra təhvil verib. Konkret cinayət əməllərində ittiham edilən separatçıların hərbi əsir kimi təqdim edilməsinin heç bir hüquqi əsası yoxdur. Üstəlik, məhkəmə hökmü olmadan onları azad etmək də doğru olmaz. O baxımdan hesab edirəm ki, ABŞ prezidentinin milli təhlükəsizlik üzrə müşaviri Mayk Uoltsun mühakimə edilən separatçılarla bağlı çağırışı hüquqi və siyasi baxımdan doğru deyil. Bununla ermənilərin əlinə əsas verirlər”.
Vidadi ORDAHALLI
