Vardanyan Bakıdan İrəvana məktub yazdı - “Qarabağdan erməniləri özümüz çıxardıq”...
Mübariz Göyüşlü: “Bütün məsələlər açılıb, hər şey ortadadır”
Sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın aclıq aksiyasını dayandırdığı məlumdur.
Bu barədə məlumatın olduğu Vardanyanın telefon mesajının səs yazısı onun adından saxlanılan Telegram kanalında yayımlanıb.
R.Vardanyan “aclıq aksiyası” keçirməsinin səbəblərini deyib. Guya onu burda asıb-kəsirmişlər və bunu çatdırmaq istəyib (?). Vardanyan deyib ki, ermənilər Qarabağdan köçüb getməsəydilər, qalıb yaşasaydılar, guya onları “böyük fəlakət” gözləyirmiş (?). “Hadisələr göstərir ki, onlar qalıb yaşasaydılar başlarına nələr gələcəkdi” deyə o iddia edib. Başlarına nə iş gələcəkdi ki? Qalıb yaşayanlar normal şəkildə yaşayırlar, heç kəs ölmədi, məhv olmadı, başına hansısa hadisə gəlmədi. Digər ermənilər də qalsaydılar heç nə baş verməyəcəkdi.
Vardanyan öz dili ilə bir daha təsdiqləyir ki, Qarabağdan erməniləri özümüz köçürüb aparmışıq. Vardanyanın bu bəyanatı da sübüt edir ki, ermənilərin Qarabağdan köçüb getməsini onlar özləri təşkil edir. İkincisi isə, yayılan səs yazısında Vardanyan Ermənistanın indiki rəhbərliyini ittiham edir ki, “Arsaxı” atdılar. Üçüncüsü də, Vardanyan 23 gün aclıq etdiyini iddia edib. 23 gün ac qalan adam ayaq üstə belə normal dura bilməz. Necə oldu ki, Vardanyan özünü yaxşı hiss edib?
Bir sözlə, göndərdiyi səs yazısında Vardanyan özünü də, erməniləri də ifşa edir.
“O da öz mesajında təsdiqləyir ki, erməniləri özləri köçürüblər”
Cross Media Təhlil Mərkəzinin analitiki, siyasi şərhçi Mübariz Göyüşlü "Bakı-Xəbər"ə şərhində bildirdi ki, vaxtilə müxtəlif ölkələrdən müxtəlif şirnikləndirici təkliflərlə Qarabağa köçürülüb gətirilən, orda məskunlaşdırılan, sonra isə könüllü olaraq ordan köçüb gedən ermənilərlə bağlı manipuliyasiyaları sonlandırmaq lazımdır. “Bütün məsələlər açılıb, hər şey ortadadır. Məhkəmədə səsləndirilən etiraflar, indiyə qədər olan faktlar, Azərbaycanın əlində olan səhih məlumatlar və sair sübut edir ki, Qarabağdakı proseslər necə başlayıb, hansı mərhələlərdən keçib, ermənilər azərbaycanlılara qarşı hansı cinayətlər törədiblər, soyqırım ediblər, əhalimizi ordan köçürüblər, özləri o torpaqlarda qanunsuz olaraq məskunlaşıblar. Ermənilər özləri bu məsələləri çox yaxşı bilirlər. Torpağa bağlı olmayan bir toplum kimi, nəinki bu əraziləri könüllü tərk etdilər, ümumiyyətlə orda heç düz-əməlli məskunlaşmamışdılar da. Ermənilərin könüllü şəkildə Azərbaycan ərazilərini tərk etməsi faktını o zaman özləri də etiraf edirdilər, deyirdilər ki, “bizə Qarabağdan köçün deyiblər”. O vaxt ermənilər müsahibələrində deyirdilər ki, bu göstərişi onlara Qarabağdakı qanunsuz “rejimin” “rəhbərliyi” verib.
Vardanyanın açıqlamasına gəlincə, o da öz mesajında təsdiqləyir ki, erməniləri özləri köçürüblər. Amma Vardanyan bu fikirləri məqsədli şəkildə deyib və bununla Azərbaycana qarşı təzyiq siyasəti həyata keçirilməsini istəyir. Əslində, Vardanyanın məqsədi özünü xilas etməkdir. Amma bu məsələdə hər şey aydındır və o bu cür açıqlamalarla heç nə əldə edə bilməz. Artıq məsələ sonlanıb”.
M.Göyüşlü vurğuladı ki, Vardanyanın Paşinyan hökumətini ittiham etməsinin kökündə də onun öz maraqları dayanır. Vardanyanın 23 gün aclıq aksiyası keçirməsinə gəlincə, ekspert bildirdi ki, bütün bunlar onun növbəti şousudur və məqsədi diqqəti cəlb etmək olub. M.Göyüşlü hesab edir ki, onun bütün açıqlamaları özünün ədalət mühakiməsindən yayınmaq istəyinə xidmət edir, amma bu alınası deyil, o, layiq olduğu cəzanı alacaq. “Məhkəmədə çıxış edən ermənilər Vardanyanın Qarabağda törətdiyi cinayət əməllərini bir-bir etiraf edirlər. Bu da Vardanyanı narahat edir” - deyə M.Göyüşlü əlavə etdi.
İradə SARIYEVA
