Almaniyanın məşhur avtomobil zavodları silah istehsalına başlayır - ilk addımı “Volkswagen” atdı...
Alman avtomobil nəhəngi “Volkswagen” Almaniya hökuməti ilə yeni müqavilə çərçivəsində müdafiə sənayesi sahəsinə daxil olur.
Şirkət istehsal gücündən hərbi texnika istehsalında istifadə edəcək və müxtəlif müdafiə vasitələrinin, ilk növbədə hərbi maşınların və logistik dəstək sistemlərinin istehsalına başlayacaq.
Bu addım Almaniyanın artan müdafiə xərclərinə və Avropanın təhlükəsizlik ehtiyaclarına uyğun olaraq strateji qərar hesab edilir. Bildirilir ki, bu yeni razılaşma ilə Almaniya hökuməti müdafiə sənayesini dəstəkləmək üçün strateji addımlar atır və yerli istehsalı təşviq etməyi hədəfləyir. “Volkswagen”in hərbi istehsal fəaliyyətləri istiqamətində atdığı yeni addımın təkcə Almaniyada deyil, Avropada da böyük səs-küy gətirəcəyi gözlənilir.
Alman avtomobil nəhəngi istehsal proseslərində ən müasir infrastrukturlardan istifadə etməklə yüksək keyfiyyətli və etibarlı hərbi texnikanı vaxtında çatdırmağı planlaşdırır. Bundan əlavə, istehsal proseslərinin ekoloji davamlılıq prinsiplərinə uyğun aparılması da şirkətin prioritetləri sırasındadır.
Bu hadisə avtomobil sənayesində qeyri-ənənəvi bir tendensiya olsa da, “Volkswagen”in təcrübə sahəsi və güclü istehsal infrastrukturu nəzərə alınmaqla, bu strategiyanın olduqca uğurlu ola biləcəyi düşünülür.
Almaniyada avtomobil ixracının Covid-19 epidemiyasından sonra iki dəfə azaldığına diqqət çəkən hərbi ekspertlərin fikrincə, avtomobil zavodları bu imkandan tam gücü ilə istifadə edə bilər.
Avropa Avtomobil İstehsalçıları Assosiasiyasının məlumatına görə, 2019-cu ildən bəri Avropa İttifaqında satılan yeni avtomobillərin sayı 15,1 milyondan 10,6 milyona düşüb. Almaniyanın illik avtomobil ixracı da iki dəfə azalaraq 1,2 milyona düşüb. Çin hazırda dünyanın ən böyük avtomobil ixracatçısıdır.
Artan tələbata uyğun olaraq, “Rheinmetall” və KNDS Group kimi bir çox böyük istehsalçılar avtomobil hissələri fabriklərini hərbi texnika istehsalı müəssisələrinə çevirməyə başlayıblar.
Tahir TAĞIYEV
