Allahdan qorxmayanın yardım paylamasının adı nədir?... İllah da deputat ola...
Bəzi "millət vəkillərinin" əlamətdar günlərdə şəhid ailələrinə və qazilərə, ümumiyyətlə imkansız adlandırdıqları vətəndaşlarımıza 1-2 tikə-parça yardım paylayaraq, ya göndərərək bunu mediada və sosial şəbəkələrdə geniş təbliğ etməsinin adı sizcə nədir? Yardımı da reklam edərlər? Bir şeyi ki, Allah görür, onu reklam etməyin mənası var?
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Müqəddəs Quranın, Məhəmməd peyğəmbərin və imam Əlinin qiymətli zəka və əməli irsindən belələrinə tutarlı cavab nümunələri gətirməyi din xadimlərimizin öhdəsinə buraxıram. Peyğəmbər və İmam buna nə deyərdilərsə, bunu dindarlarımızdan eşitmək daha yaxşıdır... Əgər danışmağa cəsarət və vicdanları yetəcəksə... Məcburiyyət yoxdur...
Mən öz fikrimi, vicdanımın hökmünü ifadə edə bilərəm.
Əvvəla, bu kimi əməllər sadəcə günahdır... Ver, ancaq car çəkmə... Edilən yardımı car çəkmək insanları sevindirmək yox, sındırmaqdır...
2. Bu kimi əməllər cəmiyyətimizin gözünün qarşısında insanların yaşayış səviyyələri arasındakı fantastik fərqi saymazcasına nümayiş etdirməkdir. Azı min nəfərə yardım paylayan deputatın qonşuluğunda, kəndində, rayonunda və şəhərində minlərlə işsiz, yoxsul və möhtac insanın bu mənzərəni müşahidə etməsi nəinki vətəndaş həmrəyliyi yaratmır, əksinə, vətəndaşların arasında bir-birinə kin-küdurəti körükləyir...
3. Azərbaycanda vətəndaş həmrəyliyinin sadəcə söz olduğunu iddia və sübut etmək istəyən dairələrə bununla əla material vermiş olursunuz. Sağa-sola yardım, həm də təmənnalı yardım səpən biri ilə gün çörəyi üçün gündəlik tər tökən birinin arasında nə həmrəylik ola bilər?!
4. Belə əməllər eyni cür "əl tutmaq" imkanı olmayan digər millət vəkillərindən çox qüsurlu formada fərqlənmək həvəsidir... Ən dəhşətlisi odur ki, belə "yardımçı deputatlar" daldada insanlara "mən başqaları kimi boş-boş danışmaqdansa, əməli iş görməyi üstün tuturam" deyərək lovğalanır və öz deputat həmkarını(?) aşağılamaqdan zövq alır... Kimsə də bir gün ona demir ki, "sənin lovğalandığın bu imkandan məndə niyə yoxdur"?!...
Nə bilim, belələri insanların nifrətindən qorxmur, öz deputat həmkarının(?) iradından qorxmur, Allahdan isə qorxub-qorxmadığını özü bilər...
Məncə Allahdan qorxan belə iş görməz, işi görürsə demək qorxmur... Allahdan və bəndələrdən qorxmayanın nəzir-niyaz paylamasına ehtiyac var?!...
Tahir TAĞIYEV
