Problem yaşayan daha bir milli kino sahəmiz - uşaq filmləri...
Sevinc Nuruqızı: "Bildiyim qədər, son illər uşaq filmi çəkilməyib"
Yusif Şeyxov: "Uşaqlar üçün iki tammetrajlı film çəkilib"
Azərbaycan kinosuna göstərilən dövlət qayğısı sayəsində son illər bir sıra bədii filmlər meydana gəlib. Dövlət dəstəyi ilə ərsəyə gətirilən film və seriallar sırasında uşaq mövzusuna təsadüf edilmir. Ən həssas, isti, doğma mövzuya bu cür münasibət, əslində, hər birimizi narahat etməlidir. Dövlət Azərbaycan kinosuna vəsait ayırır, filmlər, seriallar çəkilir, burada uşaqlara da rollar verilir, amma bu onların dünyasını tam olaraq əks etdirmir.
Uşaq filmlərinin çəkilməsi uşaqların mənəvi tərbiyəsinin formalaşmasına xidmət edərdi. Müasir uşağın dünyagörüşü, həyata baxışı, maraq dünyası, insanlara münasibəti çox fərqlidir. Bunu kinoya gətirmək və əks etdirmək həqiqətən də maraqlı olardı. Bu gün uşaq rejissorları da yetişmir desək, yanlışlığa yol vermərik. Vaxt vardı ki, uşaq kinosunda peşəkar insanlar işləyirdi və onlar uşaq dünyasını duyaraq o aləmi kinoya gətirirdi.
İllər əvvəl yaranan "Asif, Vasif, Ağasif", "Qaraca qız", "Mən mahnı qoşuram", "Qərib cinlər diyarında", "Şərikli çörək", "Ögey ana", "Skripkaçının sərgüzəştləri", "Bir qalanın sirri", "Sehirli xalat" və sair filmlər geniş tamaşaçı auditoriyası tərəfindən sevilə-sevilə qəbul edilirdi. Onlar bu gün də böyük maraq kəsb edir. Əlbəttə, bu filmlərin ictimai məzmun və əhəmiyyəti, mənəvi-tərbiyəvi rolu böyükdür.
Bu gün dünya kinosunda uşaq mövzusuna çox böyük önəm verilir və müasir uşağın mənəvi aləmini əks etdirən filmlər çəkilir. Biz o filmlərə telekanallar vasitəsilə, eləcə də internet saytlarında tamaşa edirik.
Uşaq filmlərinin istehsalı sahəsində böyük uğurlar qazanan Azərbaycan kinosunda hazırda bu janrın inkişaf etməməsi nə ilə bağlıdır?
Tanınmış uşaq yazıçısı Sevinc Nuruqızı bizimlə söhbətində bildirdi ki, uşaq mövzusu həddən artıq aktual olduğu üçün, kinematoqraflar bu sahəyə böyük maraq göstərməlidir. O qeyd etdi ki, son illər bu sahədə mövcud olan vəziyyət ürəkaçan deyil. Ancaq uşaq dünyasına bələd olan, müasir uşağın düşüncəsinə ayna tutmağı bacaran uşaq yazıçıları var, müraciət olunarsa, onlar bu işə dəstək verə bilər: "Bildiyim qədər, son illər uşaq filmi çəkilməyib. Bir neçə il bundan əvvəl Feyruz Şamıyev uşaq filmi çəkmək istəyirdi və bununla bağlı mənə müraciət etmişdi. Mənim ssenari yazmağımı istəyirdi. Lakin müəyyən səbəblərdən filmin çəkilişi alınmadı. İndi mənə bu işlə bağlı müraciət edən yoxdur. Son vaxtlar uşaq filmlərinin çəkilməsi ilə bağlı məlumata rast gəlməmişəm. Keçən il Mədəniyyət və Turizm Nazirliyi "Azanfilm"lə birgə cizgi filmləri ssenarisi ilə bağlı müsabiqə elan etmişdi. Müsabiqənin yeganə qalibi mən oldum. Müsabiqədə mənim "Qaz balası qaqa" nağıl-povestim yer tutdu. Bu cizgi filmi 23 seriadan ibarət olmalı idi. Yəqin çəkilişlərə başlayarlar. Ümumiyyətlə, uşaq mövzusunda çəkilən filmlər çox maliyyə tələb edir. Mənim elə ssenarilərim var ki, onlar uşaq filmləri üçün yararlıdır. Ancaq müraciət edən yoxdur. Bizim çoxlu istedadlı rejissorumuz var. Bu sahədə düşünmək lazımdır. Uşaq filmlərinin meydana çıxarılması vacib işdir. Bütün ölkələrdə bu sahədə ciddi işlər görülür. Arzu edərdim ki, bizdə də uşaq filmləri çəkilsin".
Müsahibimiz bildirdi ki, "Sualtı səltənətdə 7 gün", "Kamranla Əriştənin sərgüzəştləri" adlı, kiçik yaşlı uşaqlar üçün əsərləri var. S.Nuruqızı bu əsərlərin maraqlı uşaq filmi mövzusu olacağını qeyd edir.
Mədəniyyət və Turizm Nazirliyinin kino sektorunun müdiri Yusif Şeyxov isə mövzu ilə bağlı "Bakı-Xəbər"ə açıqlamasında bildirdi ki, uşaq kinosu sahəsində uzun illərdən bəri davam edən durğunluğa artıq son qoyulub. Sektor müdirinin sözlərinə görə, son illər bu sahədə iki film çəkilib. "Bilirsiniz ki, son illər ardıcıl olaraq bədii filmlər çəkilir. Uşaqlar üçün iki tammetrajlı film çəkilib. "Dərs" filmi Bakı məktəblərində nümayiş olunub, xaricdə təqdim edilib. Bu film təxminən 7-8 beynəlxalq festivalda iştirak edib. Filmin müəllifləri Rafiq Əliyev və Cavid Təvəkküldür. Bir neçə il əvvəl də "Buta" filmi çəkildi. Bu film kənd uşaqlarının həyatından bəhs edir. İlqar Nəcəflinin "Buta" filmi uşaqlar arasında mehriban dostluq münasibətlərindən bəhs edir. Çox uğurlu filmdir. Film saysız festivallarda iştirak edib. Beynəlxalq "Okean" film festivalında baş mükafat qazanıb. Ardıcıl olaraq cizgi filmləri çəkilir. Son illər çəkilən cizgi filmləri maarifləndirici əhəmiyyət daşıyır. "Əlifba", "Say", "Rənglər" və başqa mövzularda çəkilən cizgi filmləri çox maraqlıdır. Onlar televiziyalarda nümayiş olunur".
Y.Şeyxov onu da bildirdi ki, uşaq filmləri sahəsində böyük canlanma var. Onun sözlərinə görə, az da olsa, uşaq filmləri çəkilir, bu da pis göstərici deyil.
İradə SARIYEVA
