Abdulla Qədirinin "Ötən günlər" əsərinin premyerası keçirilib
Bakı Bələdiyyə Teatrı özbək ədəbiyyatının klassiki Abdulla Qədirinin "Ötən günlər" əsərinin premyerasını keçirib. Azərbaycan Dövlət Akademik Milli Dram Teatrının səhnəsində təqdim edilən
tamaşa Azərbaycan və Özbəkistan arasında diplomatik münasibətlərin qurulmasının 30 iliyinə və Azərbaycan ərazi bütövlüyü uğrunda canlarından keçmiş qəhrəman vətən oğullarının ruhuna ithaf olunub.
Tamaşanın quruluşçu rejissoru xalq artisti Mərahim Fərzəlibəyovdur. Əsəri dilimizə Səid Xalid Xocayev və İshaq İbrahimov çevirib. "Ötən günlər"i eyni adlı romanın motivləri əsasında yazıçı Kənan Hacı səhnələşdirib, məsləhətçi isə professor Akif Azalpdır.
Tamaşada Tural Əhməd (Atabəy), Rəşad Kəsəmənli (Hacı Yusif bəy), Hüsniyyə Mürvət ova (Özbək xanım), Sabirə Rüstəmzadə (Gümüş), Əfqan Soltanov (Mirzə Kərim), Səmayə Sadıqova (Aftab xanım), Toğrul Rza (Divanə), İsmayıl Atakişiyev (Həsənalı lələ), Mehman Abdulla (Xudayar xan ), Elməddin Zakirli (Həmid), Zülfiyyə Məmmədova (Zeynəb), Firəngiz Babayeva (Cənnət), Aydın Əliyev (Çar polkovniki, Çar məmuru), Rəşid Soltanov (Nəməlum adam) rol alıblar.
Tamaşa öncəsi Milli Məclisin Mədəniyyət Komitəsinin sədr müavini Günay Əfəndiyeva, Özbəkistanın xalq artisti Ramiz Usmanov, xalq şairi Osman Əzim, habelə qardaş Özbəkistanın ölkəmizdəki səfirliyinin təmsilçisi çıxış edərək Özbəkistan və Azərbaycan mədəniyyəti arasında dərin və sarsılmaz bağlar olduğunu vurğuladılar.
Tamaşaya baxmaq üçün Özbəkistandan böyük nümayəndə heyətinin gəldiyi və onların içində Abdulla Qədirinin nəvəsinin də olduğu bildirildi. Tamaşanın premyerası çox böyük uğurla keçdi.
İradə SARIYEVA
