Mehriban Ələkbərzadəni aramsız "vuranlar" nazirlə görüşdən sonra susdular....
"Azdramadakı" vəziyyətlə bağlı xeyli müddətdir ki, Mehriban Ələkbərzadəyə qarşı mübarizə aparan, onu ittiham edən və teatrı məhv etməkdə suçlayan adamların nədənsə bu kollektivin nazir Adil Kərimli ilə görüşündən sonra səsləri gəlmədi. Mediaya heç bir konkret açıqlama vermədilər ki, nazirlə görüşdə Mehriban xanımın məsələsini müzakirə ediblər, ya etməyiblər. Müzakirə ediblərsə, niyə bu barədə mediaya konkret açıqlama vermədilər və yayındılar. Müzakirə olunmayıbsa, deməli bu mövzunu nazirin yanında qaldırmağa cəsarət etməyiblər Üçüncü variant da var. Ola bilsin ki, nazirin yanındakı müzakirədə Mehribanın haqlı olduğu sübut edilib və bu üzdən Mehriban xanıma qarşı üsyankarlar bir daha bu mövzuya qayıtmaqdan imtina ediblər.
Bu variantlardan hansının doğru olduğunu qətiyyətlə iddia etmək mümkün deyil. Ancaq indi mədəniyyət cameəsi üçün çox maraqlıdır ki, cəmi bir neçə gün əvvəl "dil qəfəsə" qoymadan "Azdramadakı" vəziyyətə görə Mehriban Ələkbırzadəni inanılmaz mətləblərə ittiham edən, hər gördüyü media orqanına həvəslə açıqlamalar verən tənqidçilər nazirlə görüşdən sonra niyə bu qədər qaradinməz olublar?!...
Bütün hallarda danışıb danışmamaq hər kəsin hüququdur. Ancaq hansı sahə olursa olsun, teatr da daxil, orada "mövsümi tənqid" də, " mövsümi tərif" də yumşaq desək yaxşı üsul deyil. Cəmiyyətin, insanların başını "mövsümi reaksiyalarla" qatmaq olmaz. Təcrübə göstərir ki, tənqid də, tərif də o halda davamlı olur ki, obyektiv olur və heç bir qərəzli motivə bağlı deyil. Hərdən baş qaldırıb tez də sönürsə, deməli, tənqid obyektiv deyilmiş...
Əli Turabov
