Əli Nur - Mehriban qarşıdurmasına Mədəniyyət Nazirliyi necə müdaxilə edəcək…
Akademik Milli Dram Teatrında son günlər yaşanan qalmaqallar cəmiyyətdə geniş müzakirə olunur. “Azdrama”nın bir neçə aktyoru ilə teatrın bədii rəhbəri Mehriban Ələkbərzadə arasında qarşıdurma artıq idarəolunmaz həddə çatıb. Deyilənlər və müşahidələr bütün hallarda bunu düşünməyə əsas verir.
Əməkdar artistlər Mehriban Xanlarova və Münəvvər Əliyeva, xalq artisti Əli Nur M.Ələkbərzadəni kəskin ittiham edirlər. Maraqlıdır ki, bu istiqamətdə qruplaşma yaranıb, bir tərəf M.Ələkbərzadənin tərəfini tutur, o biri tərəf isə aktyor və aktrisaları haqlı sayır.
Teatrda yaşanan qalmaqalların miqyası kiçilmək əvəzinə daha da böyüyür, təəssüflər olsun ki, hələ ki, bu qarşıdurmaların qarşısını almaq üçün rəsmi səviyyədə hər hansı bir addım atılmır.
Bu günlərdə “Azdrama”da bədii şuranın iclasında da qalmaqal yaşandığı barədə yazılır. O da deyilir ki, teatrşünas, professor İlham Rəhimli müddəti bitdiyi üçün şuradan uzaqlaşdırılıb.
Belə bir məlumatlar var ki, xalq artisti Əli Nur baş verənlərdə teatrın bədii rəhbərini günahlandırır, bütün bu prosesləri onun idarə etdiyini deyir. Hətta onun M.Ələkbərzadəni məhkəmə ilə hədələdiyi də deyilir. Bunun nə dərəcədə doğru olduğunu deyə bilmərik. Ə.Nur mətbuata müsahibəsində "Bunu o yaradıb. Mehribanla bağlı bugünə qədər heç yerə şikayət etməmişəm. Amma indi edəcəyəm. Prezidentə, cənab nazirimizə müraicət edəcəyəm. Onları cəzalandırmalıyam. Mehriban, sən diz çöküb şükür etməlisən ki, "Azdrama" kimi nəhəng teatrdın kollektivi ilə işləyirsən. Burada oyunbazlıq etmə"-deyə bildirib.
“Azdrama”da baş verənlərə Mədəniyyət Nazirliyi nədənsə reaksiya vermir, baş verənlərin səbəbi açıqlanmır, ortada isə qarşılıqlı ittiham mövcuddur. Əslində, başdan nazirlik bu qalmaqalı, M.Ələkbərzadənin ünvanına səsləndirilən ittihamları nəzarətə götürməli idi ki, problem bu qədər şişməsin, nəzarətdən çıxmasın. Sanki hansısa gözəgörünməz əl bu teatrı qarışdırır və burda xoşagəlməz hadisələrin yaşanmasını həyata keçirir. Yoxsa nə oldu ki, bu teatrda heç vaxt qalmaqal ocağı sönmür? Bütün dövrlərdə burda böyük qalmaqallar, qarşıdurmalar, problemlər yaşanıb . Sanki biriləri bu teatrda daim qalmaqal olmasında maraqlıdır.
Teatr: “...İki aktyor arasında müəyyən gərginlik yaranıb”
Akademik Milli Dram Teatrının mətbuat xidməti ilə əlaqə saxladıq. Teatrdan verilən açıqlanada “Azərbaycan Dövlət Akademik Milli Dram Teatrı Bədii şurasının aprelin 4-də keçirilən iclasında iki aktyor arasında (söhbət Füzuli Hüseynov və Əli Nurdan gedir-L.Q) müəyyən gərginlik yaranıb. Onlar tamaşanın afişası, rejissorun əsərə yanaşması və aktyor oyunu ilə bağlı mübahisə ediblər. Hesab edirik ki, səhnə sənəti, tamaşa kollektiv əməyin məhsuludur və burada fərqli estetik baxışların eyni nöqtəyə gəlməməsi başadüşüləndir. Hazırda teatrda yaradıcı proses öz axarı ilə davam edir. Kollektiv tərəfindən üç yeni səhnə əsəri üzərində eyni anda məşq aparılır”-deyə bildirilir.
Teatrın mətbuat xidmətindən bizə Əli Nurun aprelin 8-də mətbuata verdiyi açıqlamasını da təqdim etdilər. Açıqlamada “Teatr rəsmi açıqlama verib, hər şeyi izah edib. Teatrda heç bir davadan söhbət gedə bilməz. Niyə belə qələmə verirlər, bilmirəm. Ağ yalandır. Teatr dava yeri deyil, yaradıcılıq məkanıdır. Bədii Şuranın iclasında rejissor işi, aktyor oyunu haqqında mübahisə oldu. Yaradıcılıq işində mübahisə həmişə mümkündür. Xahiş edirəm, məni bir də bu məsələ ilə bağlı narahat etməyin. Belə şeyləri şişirtməyin. Teatrımızın uğurları haqqında yazın, biz də oxuyub sevinək"-deyə Ə.Nur bildirib.
Maraqlıdır ki, Ə.Nur bu açıqlamadan sonra aprelin 9-da növbəti açıqlama verib və teatrın bədii rəhbərinin ünvanına kəskin ifadələr işlədib.
Mədəniyyət Nazirliyi bu problemi necə həll edəcək?
Nazirlik: “Cavab olacağı təqdirdə…”
Məsələ ilə bağlı Mədəniyyət Nazirliyinə sorğu göndərdik. Nazirlikdən “Bu məsələ ilə bağlı cavab olacağı təqdirdə sizə göndərəcəyik”-deyə bildirildi.
Yazımız çapa hazırlandığı müddətdə sorğuya cavab verilmədiyi üçün onu təqdim edə bilmədik. Amma ekspertlər hesab edir ki, Mədəniyyət Nazirliyi baş verənlərə ciddi yanaşmalıdır, çünki bu teatrda yaşananların sonu daha da mənfiyə doğru gedə bilər. Bəziləri isə hesab edir ki, teatrın bədii rəhbərini elə nazirlikdə himayə edənlər var və bu səbəbdən də baş verənlərə rəsmi münasibət bidirilmir. “Azdrama”nın kiminsə şəxsi mülkiyyəti olmadığını deyən ekspertlər qeyd edirlər ki, amma bu teatrın rəhbərlərinin əksəriyyəti bu teatrı öz şəxsi mülkü kimi idarə edib. “Azdarama”da yaşananlar bütün hallarda mənfi haldır və nazirliyin bu işə müdaxiləsi vacibdir.
Leyla QARAXANLI
