Tanımış yazar Kənan Hacının yubileyi qeyd olunub
Tanınmış yazıçı-publisist Kənan Hacının 50 illik yubileyi Dünya Gənc Türk Yazarlar Birliyinin (DGTYB) təşkilatçılığı ilə qeyd olundu. Aprelin 5-də Gəncliyə Yardım Fondunun konfrans zalında baş tutan mərasimdə tanımış yazarın qələm dostları, həmkarları, onun yaradıcılığının dəyırini bilənlər toplaşmışdı. K. Hacının 50 illik yubileyinə həsr olunmuş
"Vaxt pəncərəsi" tədbirində onun eyni adlı kitabı da oxuculara təqdim olundu. 44 günlük Vətən müharibəsində şəhid olmuş cəsur Azərbaycan oğullarının ruhuna ithaf olunan kitabda onların qəhrəmanlığı, ölməzliyi əks olunub.
Özünəməxsus yaradıcılıq üslübü olan Kənan Hacının imzasını geniş oxucu kütləsi müxtəlif mətbu orqanlardan tanıyır. K. Hacı azsaylı yazarlardandır ki, ən müxtəlif janrlarda yazı nümunələri, maraqlı nəsr kitabları, şeir örnəkləri, bədii - publisistik, tərcümə nümunələri ortaya qoyub. Tarixi mövzulara da müraciət edən K. Hacının qəhrəmanları real həyatda tanıdığı, gördüyü, eşitdiyi insanlardır. Kənan gerçək bir Azərbaycançıdır. Bu onun qələmindən qopub gələn əsərlərin ruhunda özünü ehtiva edir.
K. Hacının 50 illik yubileyi münasibətilə keçirilən "Vaxt pəncərəsi" adlı tədbirdə İntiqam Yaşar çıxış edərək onun yaradıcılığından danışdı. Şair Səlim Babullaoğlu çıxışında bildirdi ki, K. Hacı ilə ədəbiyyata eyni dövrdə gəliblər və həmkarının yaradıcılığını hər vaxt yaxından izləyib, yüksək dəyər verib. S. Babullaoğlu yubilyarı Azərbaycan Yazıçılar Birliyi rəhbərliyi adından da təbrik etdi. Şair Qəşəm Nəcəfzadə, xalq artisti Əli Nur, yarar Vaqif Osmanov, şair İlham Qazaxlı, yazıçı Azad Qaradərəli, yazıçı Firuz Mustafa, sənətşünaslıq doktoru Arif Əsədullayev, tanınmış jurnalist Zemfira Məhərrəmli, şair Əkbər Qoşalı, şairə Kəmalə Abıyeva, "Yada düşdü" jurnalının baş redaktoru Nazaket Mammadova, yazar Nurəddin Əlioğlu, yazar Südabə Sərvi və başqaları çıxış edərək K
Hacının yaradıcılığından və şəxsi keyfiyyətlərindən danışdılar. Bildirdilər ki, K. Hacı istedadlı qələm sahibi kimi çağdaş ədəbiyyatımızda özünəməxsus yer tutur.
Tədbirdə həmçinin K. Hacının şeirləri bədii qiraətçilərin ifasında təqdim edildi, yubilyara diplomlar, ünvanına gələn təbrik məktubları təqdim olundu.
İradə SARIYEVA
