Naxçıvanda 19 milyon manatın taleyi hələlik qeyri-müəyyəndir...
Əkrəm Həsənov: “Müəyyən məbləğdə təhrifin qeydə alınması yeyinti, minimsəmə, cinayət əməli sayılır”
Milli Məclisin İqtisadi siyasət, sənaye və sahibkarlıq komitəsinin son iclasında Azərbaycan Respublikası Hesablama Palatasının 2024-cü il üzrə fəaliyyəti haqqında hesabatı müzakirə olunarkən maliyyə təhrifləri açıqlanıb.
Rəsmi məlumata görə, Hesablama Palatasının keçirdiyi kənar dövlət maliyyə nəzarəti tədbirləri nəticəsində 2 milyard 66,2 milyon manat məbləğində təhriflər aşkarlanıb. Qeyd edək ki, aşkarlanan təhriflərin 1 milyard 734,2 milyon manatı auditlər, 332 milyon manatı isə analitik fəaliyyət nəticəsində üzə çıxıb. Maliyyə hesabatlarında məlumatların əks etdirilməməsi və ya yanlış göstərilməsi kimi halların 807,3 milyon manatlıq hissəsi "əhəmiyyətli təhriflər" kimi qiymətləndirilib. Qalan 907,9 milyon manat isə digər maliyyə uyğunsuzluqları ilə bağlıdır. Bundan əlavə, qurumun Naxçıvan Muxtar Respublikası üzrə idarənin hesabatında da 19 milyon manatlıq təhrif qeydə alınıb.
Maraqlıdır, bu təhrif qanun pozuntusu sayılır?
“Təhrif olunan vəsait dövlət büdcəsindən ayrılmışdı, ancaq yeyinti faktının olduğu müəyyən edilib, bu səbəbdən də…”
Hüquqşunas Əkrəm Həsənov “Bakı-Xəbər”ə açıqlamasında qeyd etdi ki, təhrif o deməkdir vəsait oğurlanıb, təyinatı üzrə xərclənməyib: “Müəyyən məbləğdə təhrifin qeydə alınması yeyinti, minimsəmə, cinayət əməli sayılır. Qeydə alınan faktın əsasında Baş Prokurorluq cinayət işi açmalıdır, vəsaitin harda, necə xərcləndiyini müəyyən etməlidir. Nəzərə almaq lazımdır ki, təhrif olunan vəsait dövlət büdcəsindən ayrılmışdı, ancaq yeyinti faktının olduğu müəyyən edilib. Bu səbəbdən də təqsirkar şəxs müəyyən olunmalı və cinayət məsuliyyətinə cəlb olunmalıdır”.
Həmsöhbətimiz onu da əlavə etdi ki, Hesablama Palatası hər il büdcə xərcləmələri ilə bağlı arayışlar təqdim edir. Qanunvericiliyə görə, Hesablama Palatasının təqdim etdiyi arayışlar artıq hansısa araşdırma və istintaq işlərinin başlanması üçün təməl yaradır. Çünki qanun da bunu tələb edir.
Günel CƏLİLOVA
