Azərbaycan "yaşıl gübrə" istehsal edəcək...
Vüqar Bayramov: “Yaşıl məhsul istehsalı tələbin ödənilməsi baxımından da vacibdir”
Dünyada ətraf mühitin çirklənməsi, azalan təbii ehtiyatlar və artan tələbat fonunda dayanıqlı inkişafa nail olmaq üçün "yaşıl" iqtisadiyyatın genişləndirilməsi istiqamətində həyata keçirilən tədbirlər böyük əhəmiyyət daşıyır. Bu istiqamətdə ölkəmizdə böyük işlər görülür. Azərbaycanda "yaşıl gübrə" və "yaşıl metanol" istehsal edilməsi nəzərdə tutulur.
Bunu Energetika Nazirliyi yanında Bərpa Olunan Enerji Mənbələri Dövlət Agentliyinin direktor müavini Rəna Hümbətova Bakıda keçirilən “Daha yaşıl gələcəyə doğru innovativ yollar: Bərpa olunan enerji və emissiyaların azaldılması” mövzusunda tədbirdə bildirib.
O deyib ki, Azərbaycanda "yaşıl məhsul"lar da istehsal edilə bilər: Bu, təkcə enerji təhlükəsizliyi ilə deyil, sənaye təhlükəsizliyi ilə bağlı məsələdir: “Onlar bir-biri ilə əlaqəlidir. Azərbaycan "yaşıl gübrə"lər və "yaşıl metanol" istehsal edəcək. Daxili tələbat ödənildikdən sonra bu məhsullar ixrac olunacaq".
“Azərbaycanda "yaşıl məhsul"lar istehsal edilməsi sənaye təhlükəsizliyinin güclənməsinə və bu istiqamətdə tədbirlərin genişlənməsinə xidmət edir”
Millət vəkili Vüqar Bayramov “Bakı-Xəbər”ə şərhində bildirdi ki, Azərbaycan enerji siyasətini sənayedə yaşıl məhsulların istehsalına da yönləndirir. Yaşıl məhsul istehsalı tələbin ödənilməsi baxımından da vacibdir. Həmçinin, ixrac imkanlarını da artıracaq: “Bu baxımdan hesab edirəm ki, Azərbaycanda "yaşıl məhsul"lar istehsal edilməsi sənaye təhlükəsizliyinin güclənməsinə və bu istiqamətdə tədbirlərin genişlənməsinə xidmət edir. Onu da nəzərə almaq lazımdır ki, dünyada müasir çağırışlara uyğun olaraq yaşıl məhsulların ixracatına önəm verilir. Yaşıl məhsulların ixracı baxımında da bu yenilik ölkəmiz üçün əhəmiyyətlidir. Xüsusən də qeyri-neft sektorunda ixrac imkanları genişlənəcək və ölkəyə daxil olacaq valyutanın həcmi artacaq. Bu, regionda məhsul istehsalına yeni yanaşma kimi xarekterizə olunur”.
Günel CƏLİLOVA
