Çin şirkətləri Azərbaycanda həm də bu fəaliyyət növünə çox maraq göstərirlər....
Vüqar Bayramov: “Çin şirkətləri Azərbaycanda bir sıra sektorlara investisiya yatırmaqda maraqlıdır”
“İndi Çin şirkətləri təkcə xidmət və texnologiyaların təmin edilməsində yox, həmçinin Azərbaycana investisiya yatırmaqda maraqlıdırlar və bu proses artıq gedir”. Bu sözləri Prezident İlham Əliyev Davosda Çinin CGTN (China Global Television Network) telekanalına müsahibəsində deyib.
Maraqlıdır, Çin şirkətlərinin investisiya yatırmaq istədiyi sahələr hansılardır?
“Çin investorlarının Azərbaycanda həyata keçirilən yaşıl enerji layihələrinə cəlb edilməsi ilə bağlı danışıqlar aparılır”
Millət vəkili Vüqar Bayramov “Bakı-Xəbər”ə şərhində bildirdi ki, Azərbaycanla Çin arasında strateji əməkdaşlıq formalaşıb: "Nəzərə almaq lazımdır ki, Çin şirkətləri Azərbaycanda bir sıra sektorlara investisiya yatırmaqda maraqlıdır. Xatırladım ki, bir neçə il öncə Prezident İlham Əliyev Pekinə səfər edən zaman imzalanan anlaşmada məhz bəzi layihələrin reallaşdırılması müzakirə edildi. Onu da deyim ki, Çinlə Azərbaycan arasında tək xarici ticarət və siyasət deyil, eyni zamanda, sərmayə qoyuluşlarının həyata keçirilməsinə şərait yaradılıb".
Həmsöhbətimiz onu da əlavə etdi ki, ölkəmizin Çinlə iqtisadi əlaqəsi yalnız iqtisadiyyatın texnologiya cəhətdən daha innovativ inkişafına təkan verəcək: "Bu, ölkə iqtisadiyyatının şaxələndirilməsinə və digər sahələrə də texnologiyanın tətbiqinə şərait yaradacaq. Qeyd edim ki, burda təcrübə mübadiləsi də rol oynayır. Düşünürəm ki, iqtisadiyyatımızın Çinlə iqtisadi inteqrasiyası xeyli müsbət imkanlar yarada bilər.
Son illər yaşıl enerji istehsalına 1 milyard dollardan artıq xarici investisiya cəlb olunub. Həm günəş, həm də külək enerjisindən intensiv şəkildə istifadə edilir. Bu isə Azərbaycan üçün yeni ixrac imkanları deməkdir. Digər tərəfdən Azərbaycan, Gürcüstan, Rumıniya və Macarıstan regionun alternativ mənbədən əldə edilən yaşıl enerjisinin Avropa bazarlarına nəqlilə bağlı razılıq əldə ediblər. Güman edilir ki, 2027-ci ildən etibarən Azərbaycan və bütövlükdə regionun yaşıl enerjisi Avropa bazarlarına çıxarıla bilər. Sözsüz ki, Azərbaycan, Qazaxıstan və Özbəkistan arasındakı əməkdaşlığı da xüsusilə qeyd etmək lazımdır. Çünki bu təkcə Azərbaycan və Gürcüstanın deyil, Mərkəzi Asiya ölkələrinin yaşıl enerjisinin də Avropa bazarlarına nəqli deməkdir. Eyni zamanda Çin dünyada ən çox yaşıl enerji istehsal edən ölkələrdəndir. Bu istiqamətdə Çin-Azərbaycan əməkdaşlığının güclənəcəyi də gözlənilir. Çin investorlarının Azərbaycanda həyata keçirilən yaşıl enerji layihələrinə cəlb edilməsi ilə bağlı danışıqlar aparılır. Bu, iqtisadi əməkdaşlığı gücləndirərək yeni iş yerlərinin yaradılmasına və texnoloji inkişafın sürətlənməsinə səbəb olacaq. Amerika, Azərbaycan və Çin arasında strateji əməkdaşlıq var. Strateji əməkdaşlıq birmənalı şəkildə ölkələr arasında münasibətlərin cəmləşməsinə, yaşıl enerji daxil olmaqla fərqli istiqamətlərdə yeni əməkdaşlıq platformasının qurulmasına şərait yaradır”.
Günel CƏLİLOVA
