“Azərbaycanda yaşa görə pensiyanın orta aylıq məbləği 500 manata və bundan da yüksəyə qaldırıla bilər”. Bunu "Sosial islahatlar və əldə olunan nailiyyətlər" mövzusunda keçirilən mətbuat konfransında çıxışı zamanı əmək və əhalinin sosial müdafiəsi nazirinin müavini Anar Kərimov bildirib.
Nazir müavini qeyd edib ki, hazırda yaşa görə pensiyanın orta aylıq məbləği 465 manatdır. Azərbaycanda orta aylıq əməkhaqqı 65 faiz artıb.
Maraqlıdır, yaşa görə pensiyanın orta aylıq məbləği hansı formada qaldırılmalıdır? Ümumiyyətlə, bu proses necə olacaq?
“Pensiya sisteminin təkmilləşdirilməsi istiqamətində islahatların davam etdirilməsi müşahidə olunur”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, orta aylıq pensiya məbləğinin artırılması növbəti dövrlər üçün prioritetdir: “Məlumat üçün bildirim ki, gələn ilin yanvar ayında pensiya məbləği yenidən indeksasiya olunacaq. Ümumiyyətlə, pensiya sisteminin təkmilləşdirilməsi istiqamətində islahatların davam etdirilməsi müşahidə olunur. Bu hal isə pensiya məbləğində özünü göstərir. Xüsusən də, orta pensiya məbləğinin artması müşahidə olunacaq”.
İqtisadçı Xalid Kərimli “Bakı-Xəbər”ə açıqlamasında bildirdi ki, pensiya qanunvericiliyinə görə, hər il yanvarın 1-də orta aylıq əmək haqqının orta faizinə baxılır: “Məlumat üçün bildirim ki, bu ilin 4 ayı ərzində ölkədə muzdla işləyənlərin orta aylıq əmək haqları 11,4 faiz artıb. Əgər 465 manatın üzərinə 11,4 faizi gəlsək, təxminən 520 manata yaxın pensiya məbləği əldə ediləcək. O da bəllidir ki, növbəti pensiya artımı 2024-cü iln yanvarın 1-də olacaq”.
Ekspert hesab edir ki, qanunvericilikdə nəzərdə tutulmuş indeksasiya əsasında pensiya məbləğinin ortalama 500 manatdan artıq olacağı gözlənilir.
Günel CƏLİLOVA
