“Zəngəzur dəhlizinin açılması bölgədə Azərbaycanın iqtisadi hökmranlığını gücləndirəcək”
Mətləb Salahov: “iqtisadi maraqlar Ermənistanın özündən qat-qat yüksəkdə dayanır”
“Son bir ayda Ermənistan hakimiyyətinin Zəngəzur dəhlizinin açılması barədə ziddiyətli bəyanatları, ilk növbədə Nikol Paşinyan hakimiyyətinin siyasi iradəsizliyini açıqca ortaya qoyur. Baş nazir kiimi, bu adamın öz ölkəsinin iqtisadi mənafeyinə zidd olaraq Qərbdə oturan “dirijorlarının” və bölgədəki “dostlarının” əmri ilə Zəngəzur dəhlizinə qarşı çıxması həm də N.Paşinyanın Sülh Müqaviləsi barədə qeyri səmimiliyinə əyani sübutdur.” Bu sözləri “Bakı xəbər”ə açıqlamasında jurnalist-ekspert Mətləb Salahov bildirib. “Əlbəttdə, açıq-aydın görünür ki, Ermənistanın məqsədi Azərbaycanın əsas hissəsi ilə Naxçıvan arasında kommunikasiyanın bərpasına mümkün qədər əngəl olmaqdır. Irəvandakı siyasi rejim gözəl anlayır ki, Zəngəzur dəhliziniun açılması ilə bölgədə Azərbaycanın iqtisadi imperiyası formalaşacaq. Çünki bu halda bütün kommunikasiya və yükdaşıma sistemi dimanik və şaxələnmiş şəkildə inkişaf edəcək. Bu isə bölgədə Azərbaycanın iqtisadi hökmlülüyünü qat-qat artıracaq. Amma bu dəhlizin açılmasından sosial bataqlıqda və iqtisadi böhranda çapalayan Ermənistanın özü də kifayət qədər faydalanacaq. Real fakt odur ki, rəsmi İrəvan bu layihənin gerçəkləşməsinin qarşısını almaq gücündə deyil. Nəzərə almaq lazımdır ki, 2020-ci il 10 noyabr tarixli üçtərəfli Bəyanatın 9-cu bəndində bu məsələ öz əksini tapır. Buradan göründüyü kimi, indiki Ermənistanın ərazisində yerləşən Zəngəzurdan hərəkət maneəsiz olmalıdır.
Bir məqama xüsusilə diqqət edək. Zəngəzur dəhlizi Azərbaycanı region dövlətləri ilə yanaşı, Mərkəzi Asiya ilə Türkiyə və Avropanı birləşdirəcək. Çindən, Mərkəzi Asiya respublikalarından, eləcə də Cənub- Şərqi Asiyanın başqa ölkələrindən Avropaya daşınan yüklər Bakı Beynəlxalq Dəniz Ticarət Limanına, oradan isə Zəngəzur dəhlizi vasitəsilə Türkiyə və Şərqi Avropa ölkələrinə çatdırılacaq. Odur ki, rəsmi İrəvanın siyasi oyunbazlıqlarına baxmayaraq, Zəngəzur dəhlizinin reallaşması region ölkələrinin strateji maraq dairəsində olan məsələdir. Dayaz düşüncəli erməni hakimiyyətinin cılız etirazları heç nəyi dəyişməyəcək. Çünki iqtisadi maraqlar Ermənistanın özündən qat-qat yüksəkdə dayanır.”
Namiq Quliyev
