Paşinyandan yeni iddia - "sərhədlərdə 3-cü qüvvə" anlayışının Avropa Birliyinin missiyasına aidiyyatı yoxdur...
"Ermənistan rəsmiləri istənilən vaxt mart ayında təsdiqlədikləri saziş layihəsindən imtina edə bilərlər. Bunu tək ona görə demirəm ki, son həftələrdə atəşkəsin pozulması hallarını və Azərbaycanın guya atəşkəsi pozması ilə bağlı dezinformasiyaları fəallaşdırıblar. Bu təbii ki, ciddi məqamdır və istənilən şəxsin "ermənilər həqiqətən sülh istəyirlərsə, sazişin az qala imzalanması ərəfəsində atəşkəsi niyə tez-tez pozurlar" deyə kəskin sual verməsinə əsaslar yaradır. Ermənilər xüsusilə də bu yaxınlarda qəbul etdikləri bir saziş maddəsi ətrafında çox həssas durum yaradıblar. Ümumi sərhədlərdə 3-cü qüvvələrin yerləşdirilməsindən imtina maddəsini nəzərdə tuturam".
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
"Gətirəcəyim iki fakt sübut edir ki, ermənilər istənilən vaxt bu sazişdəki həmin maddədən imtina edə bilərlər.
Paşinyan hökumət iclasında deyib: "Biz bu müddəa ilə razılaşdıq ki, sülh sazişi imzalanandan sonra (bura xüsusi fikir verin - A.Q.) ümumi sərhədlərimizdə 3-cü qüvvələri yerləşdirməyəcəyik”. İfadəyə baxın, "sazişdən sonra..." Belə çıxır ki, sazişin bu maddəsinin Avropa Birliyinin mülki missiyasına aidiyyatı olmayacaq, çünki həmin missiya sərhədlərdə sazişə qədər artıq yerləşdirilib. Paşinyanın bu yayğın ifadə tərzi digər erməni məmurları tərəfindən də inkişaf etdirilir. Məsələn, XİN müavini Ovanesyan bəyan edib ki, 3-cü qüvvə anlayışı Avropa İttifaqının hazırda Azərbaycan - Ermənistan sərhədlərində fəaliyyət göstərən mussiyasına aid deyil, çünki sazişdə söhbət "qüvvədən" getdiyi halda, Avromissiya sadəcə mülki təsisatdır, eyni zamanda Avromissiyanın fəaliyyəti gələcəkdə Ermənistanın seçki və daxili siyasi məsələlərinə də yönəldilə bilər.
Bütün bunlar onu göstərir ki, Paşinyan hakimiyyəti Avropa Birliyinin missiyası məsələsində Azərbaycanla prinsipial razılaşmaya qəti hazır deyil və istənilən vaxt mövqeyini dəyişdirə bilər. Hətta mümkündür ki, saziş layihəsində "sərhədlərdə 3-cü qüvvə razılaşmasından" imtina etsin".
Mətləb
