Ərdoğanın partiyası Makronu "topa tutdu"
Türkiyənin hakim Ədalət və İnkişaf Partiyasının (AK Parti) sözçüsü Ömer Çelik Fransa prezidenti Emmanuel Makronu tənqid edib. O, Fransa liderinin İstanbulun keçmiş meri Ekrəm İmamoğluna qarşı korrupsiya ittihamlarına cavabını “ikili standartların təzahürü” adlandırıb. Belə ki, “A Haber” telekanalının efirində çıxış edən Çelik korrupsiya ilə bağlı aparılan istintaqın demokratik prinsiplərin qorunması mövzusu ilə heç bir əlaqəsi olmadığını bildirib.
AK Parti nümayəndəsi Makronun Fransa parlamentindəki ifrat sağçı Milli Birlik fraksiyasının lideri Marin Le Pen və digər 8 deputatı Avropa Parlamentinin vəsaitlərindən sui-istifadə etməkdə təqsirli bilən Paris məhkəməsinin qərarına münasibətinə diqqət çəkib.
“Fransa və bütövlükdə Avropadakı korrupsiya qalmaqalına münasibət bildirən Makron və onun kimiləri hadisələri demokratik dəyərlərin qorunmasına prinsipial münasibət kimi təqdim edirlər. Türkiyədə korrupsiya ittihamlarına dair məhkəmə prosesləri isə bir növ “demokratik prinsiplərin pozulması” kimi təqdim olunur. Bu, şübhəsiz ki, ikili standartların nümayişidir”.
Mətləb Salahov
