Bəndər Abbasdakı partlayışı İsrail törədib?
İran parlamentinin deputatı Məhəmməd Seraj Bəndər Abbasdakı Şəhid Rəcai limanında 36 nəfərin ölümü və 1139 nəfərin yaralanması ilə nəticələnən güclü partlayışda İsrailin əli olduğunu iddia etdi. Bu barədə “Ynet News” deputatın sözlərinə istinadən xəbər verir: “Bu, təsadüfi deyil, sübutlar baş verənlərdə İsrailin iştirakını açıq-aydın təsdiqləyir”-deyə deputat bildirib.
Aprelin 26-da baş verən hadisə İranda son illərdə baş verən ən böyük fəlakət olmaqla,ölkədə üç günlük matəm və fövqəladə vəziyyətə səbəb olub. Məhəmməd Seraj qeyd edib ki, partlayışlar limanın dörd fərqli yerində eyni vaxtda baş verib ki, bu da planlaşdırılmış təxribat aktından xəbər verir. Associated Press xəbər verir ki, səlahiyyətlilər əvvəlcə fəlakəti mart ayında Çindən Golbon və Jairan gəmilərində gələn raket yanacağı komponenti olan natrium perxloratın düzgün saxlanmaması ilə əlaqələndiriblər. Bununla belə, İsrailə qarşı ittihamlar siyasi kontekst əlavə edir. The New York Times-ın qeyd etdiyi kimi, İran İnqilabı Keşikçiləri Korpusu ilə əlaqəli bir mənbə təsdiqləyib ki, perxlorat İranın ballistik raketləri üçün nəzərdə tutulub və ona görə də bu, limanı İsrail kəşfiyyatının hədəfinə çevirə bilər. İran yüklərinin 70%-nin keçdiyi Şəhid Rəcai limanı dünya neft daşımalarının 20%-ni həyata keçirən strateji əhəmiyyətli marşrut olan Hörmüz boğazında yerləşir. Reuters xəbər verir ki, partlayış infrastruktura ciddi ziyan vurub, bir neçə kilometr radiusda pəncərələri uçurub və limanın fəaliyyətini dayandırıb. İranın Səhiyyə Nazirliyi ammonyak və kükürd dioksid də daxil olmaqla zəhərli qaz emissiyalarına görə 20 km radiusda xəbərdarlıq elan edib.
Surxay Əliyev
