İmamoğluya görə Almaniya 40 “Eurofighter Typhoon” qırıcısını Türkiyəyə satmaqdan imtina etdi
Bu barədə Almaniyanın “Handelsblatt” qəzeti bir neçə mənbəyə istinadən məlumat yayıb. Bu qərara səbəb Türkiyənin aparıcı müxalifətçi siyasətçisi, İstanbul bələdiyyə sədri Əkrəm İmamoğlunun həbsi olub. Almaniya İstanbul bələdiyyə sədrinin həbsini kəskin tənqid edərək, bu addımı “Türk demokratiyasına hücum” adlandırıb. Və Türkiyəyə qırıcı təyyarələrin satışı ilə bağlı müqaviləni əvvəllər dəstəkləyən, hələ də səlahiyyətlərini icra edən kansler Olaf Şolz bunun qarşısını almaq qərarına gəlib.Ankara “Eurofighter Typhoon” qırıcılarının köməyi ilə hava qüvvələrini modernləşdirmək niyyətində idi. Türkiyədə 200-dən çox köhnə F-16 təyyarəsi xidmətdədir. Bundan əvvəl Ankara ABŞ-dan F-35 çoxməqsədli qırıcılar almaq niyyətində idi. Türkiyə bu təyyarənin istehsal proqramının bir hissəsi idi və hətta bu modelin 6 qırıcısı üçün 1,4 milyard dollar ödəmişdi. Lakin amerikalılar bu sövdələşmənin qarşısını aldılar, çünki Ərdoğan F-35 ilə birlikdə Rusiyadan S-400 hava hücumundan müdafiə sistemlərini almağa qərar vermişdi.
“Eurofighter Typhoon” dördüncü nəsil çoxməqsədli qırıcıdır. Yaxşı manevr qabiliyyəti, güclü silahları və qabaqcıl texnologiyaları ilə seçilir.
Surxay Əliyev
