ABŞ Ukraynanın hər şeyini qamarlayır, ancaq təhlükəsizliyinə zəmanət vermir
Reuters agentliyi şənbə günü, aprelin 12-də mənbəyə istinadən xəbər verir ki, Ukrayna ilə mineral ehtiyatlara dair sazişin yeni variantında ABŞ Kiyevdən Rusiya qazının Avropaya tranziti üçün istifadə edilən Rusiyanın “Qazprom” şirkətinin qaz kəmərinə nəzarəti ABŞ Maliyyə Korporasiyasına verməyi tələb edib. Aprelin 11-də Vaşinqtonda minerallar üzrə başlayan ABŞ-Ukrayna danışıqlarını təsvir edən Reuters-in mənbəsi ABŞ-ın “maksimalist” tələbləri üzündən danışıqlarda atmosferin “çox ziddiyyətli” olduğunu bildirib. ABŞ Maliyyə Nazirliyinin sözçüsü danışıqları “texniki xarakterli” adlandırıb. New York Times (NYT) daha əvvəl qeyd etmişdi ki, ABŞ-Ukrayna danışıqları iki gün, 11 və 12 aprel tarixlərində davam edəcək. Ukrayna öz maraqlarını müdafiə etmək üçün Hogan Lovells hüquq firmasını işə cəlb edib. Ukrayna prezidenti Vladimir Zelenski aprelin 9-da mineral ehtiyatlar üzrə sazişin hər iki ölkə üçün faydalı olması və Ukraynanın modernləşdirilməsinə töhfə verməli olduğunu vurğulayıb. Vaşinqton həmçinin Kiyevdən tələb edir ki, Ukrayna dövləti və özəl şirkətləri tərəfindən alınan təbii sərvətlərin istismarından əldə olunan bütün gəlirləri birgə fondda yerləşdirsin. Eyni zamanda, müqavilə layihəsində, Zelenskinin təkidli tələblərinə baxmayaraq, ərazisinin demək olar ki, 20 faizini işğal etmiş Rusiya qoşunlarından özünü müdafiə edən Ukrayna üçün ABŞ-ın təhlükəsizlik zəmanətləri barədə heç nə demir.
Surxay Əliyev
