Türkiyə "Kürəcik radarını" söndürsə, İsrail İran raketlərinə "kor" qalacaq...
Vətən Partiyası Mərkəzi Komitəsinin üzvü, təqaüddə olan Hərbi Hava Qərargahı polkovniki İhsan Sefa “Müstəqil Türkiyə” üçün məqalə yazıb, İsrail təhlükəsini və Türkiyənin ona qarşı atmalı olduğu tədbirləri araşdırıb: - Netanyahunun başçılıq etdiyi İsrail təcavüzkar siyasətləri ilə bütün Yaxın Şərqi və müsəlman dünyasını böyük müharibənin içinə çəkmək istəyir. İsrail Cənubi Livanın, Cənubi Suriyanın və təbii ki, Fələstin Dövlətinin torpaqlarını işğal etməkdə davam edir. Təbii ki,Təl-Əviv bununla kifayətlənməyəcək və işğalını genişləndirəcək.
TÜRKİYƏ PRİORİTET HƏDƏFDİR
Biz hər cəhətdən bunun əlamətlərini görürük. Bütün dünyada “növbəti ölkə hansıdır?” sualı verilir. Artıq sual verilməyə başlanıb. “İran” cavabı göz qabağında olsa da, Türkiyə də ən az Tehran qədər İsrailin hədəfindədir. Bunu anlamaq üçün astroloq olmağa və ya gizli planları deşifrə etməyə ehtiyac yoxdur.
BOMBARDMANLAR İLƏ TÜRKİYƏYƏ MESAJ
İsrail bəyanatları və hətta hərəkətləri ilə bunu açıq şəkildə nümayiş etdirir: İsrail Ordusu Suriyada Əsədin devrilməsindən sonra başlayan işğalını intensiv bombardmanlarla davam etdirir. İsrail dekabrdan bəri Suriyada 700-dən çox hücum həyata keçirib. Bu yaxınlarda onların xüsusi hədəfi T4 (Tiyas) aviabazasI oldu. Dünya mətbuatında Dəməşq hökumətinin bu bazanı Türkiyəyə vermək istədiyi barədə məlumatlar yayılıb. İsrailin bundan narahat olduğu aydındır. Təl-Əviv Türkiyənin Suriyadakı mümkün bazasını öz təcavüzkar məqsədlərinə maneə kimi görür. İsrail müdafiə naziri Katz Dəməşqi “Düşmən qüvvələrin Suriyaya girməsinə icazə versəniz, bunun əvəzini ağır ödəyəcəksiniz” deyib.İsrail radiosu isə bu bombardmanların Ərdoğana mesaj olduğunu açıqlayıb. Oxşar bəyanatlar bir-birinin ardınca gəlir
.
NETANYAHUNUN BAŞ MÜTTƏFİQİ
Təbii ki, Netanyahu bu aqressiv münasibətdə tək deyil. Ukrayna cəbhəsindən çəkilməyi planlaşdıran ABŞ Şərqi Aralıq dənizinə diqqət yetirir. Əbəs yerə deyil ki, İsrail mətbuatı Suriyadakı bombardmanları təhlil edərkən Türkiyənin artıq ruhən NATO müttəfiqi olmadığını vurğulayır. İsrailin ABŞ-dakı görüşləri və Netanyahunun Vaşinqtona səfəri bir-birini izləyir. İsrailin Suriyada sabit və unitar hökumətin olmasını istəmədiyi şübhəsizdir. Burada da İsrail qarşısında ən böyük maneə kimi Türkiyəni görür.
ŞƏRQİ ARALIQ DƏNİZİNDƏN MUHASİRƏ
Suriyada unitar quruluşun tərəfdarı olan Türkiyənin maneəsini aradan qaldırmaq istəyən İsrail Suriyanı işğal edib bombalamaqla yanaşı, Şərqi Aralıq dənizindən Türkiyəni mühasirəyə almağa çalışır. Bu bölgədə son hərbi təlimlər və İsrailin Kipr Rum Administrasiyasıyla sıx fəaliyyətləri diqqət çəkir. İsrail hətta Qətəri də özü ilə apara bilər. Yunan Kiprinin Yunanıstandan daha çox İsrailə güvənməsi də bu səbəbdəndir. Xatırlayırsınızsa, Cənubi Kiprin müdafiə naziri Vasilis Palmas ölkəsindəki bazalardan istifadə etməkdə İsrailin imtiyazlı olacağını bildirərək, "Yunanlar bizim qardaşımız ola bilər, amma İsrail bizim qonşumuzdur. İsraillilər tam yanımızdadır. Üç dəqiqəyə Kiprə gələ bilərlər" demişdi. Ötən gün ABŞ Nümayəndələr Palatasına təqdim edilən “Amerika-Yunan-İsrail Şərqi Aralıq dənizində 2025-ci il Terrorla Mübarizə və Dəniz Təhlükəsizliyi Tərəfdaşlığı Aktı” adlı qanun layihəsi mahiyyət etibarı ilə Türkiyəyə qarşı qurulan ittifaqın rəsmiləşdirilməsinə yönəlib. Trampın Ərdoğanı tərifləməsinə fikir verməyin. Türkiyə Şərqi Aralıq dənizindəki mühasirəyə regional ittifaqlarla cavab verməlidir. Misir, Livan, Suriya, İraq, İran, Azərbaycan və Rusiya Türkiyənin müttəfiqlik potensialıdır. Türkiyə bu potensialı dəyərləndirməlidir.
“İKİNCİ İSRAİL” PLANI HƏRƏKƏTDƏDİR
Digər tərəfdən, İsrail Suriyadakı piroksi qüvvələrini gücləndirməkdə davam edir. İsrail baxımından PKK/PYD-nin silahı yerə qoyması tamamilə qəbuledilməzdir. Hətta Əsədin devrilməsindən sonra yaranmış fürsətdən öz xeyirlərinə istifadə etmək istəyirlər. İsrail “İkinci İsrail”lə qonşu olacağı yeni xəritə cızmağa çalışır. Suriya torpaqlarındakı işğallara nəzər saldıqda bunu görmək mümkündür. PKK/PYD-yə silah göndərilməsi davam edir. Ağ Ev həmçinin Suriyadan çəkilməkdənsə, Yaxın Şərqdə hərbi gücünü artıracağını açıqlayıb.
İSRAİLİN MÜHARİBƏ HAZIRLIQLARI
Aydındır ki, bütün bunlar müharibəyə hazırlıqdır. İsrailin sülh və öz təhlükəsizliyinin arxasında olduğuna inanan yoxdur. Lakin Netanyahu müharibəni bitirməkdən çox uzağa, daha böyük bir müharibəyə başlamağa hazırlaşır. İsrail Türkiyə üçün ciddi təhlükəsizlik probleminə çevrilir. Çıxışlarla,bəyanatlarla nə İsrailin təcavüzünü, nə də hər hansı müharibəni dayandırmaq mümkün deyil. Təcrübə ilə bu sabitlənmişdir. Əslində İsrail bunu zəiflik kimi qiymətləndirir. Və İsrail ciddi bir hərəkət və ya sözlə ifadə edilə bilməyəcək “Dəmir yumruq” görmədikcə, geri çəkilmək bir yana, daha şiddətli hərəkət etməyə davam edəcək.
MÜHARİBƏNİ DAYANDIRACAQ ƏSAS GÜC: TSK
Türk Ordusu Türkiyənin bu təhlükəyə qarşı ən böyük zəmanətidir. Türk Ordusu bu təhlükə ilə üzləşməyə hər zaman hazır olmalıdır. Bu hazırlıq həm də NATO-ya alternativ silahlar və müdafiə texnologiyaları ilə dəstəklənməlidir. Milli müdafiə sənayemiz bu baxımdan göz bəbəyimizdir. Təbii ki, NATO-dan kənar real tərəfdaşlarımızla münasibətlər də bu çərçivədə inkişaf etdirilməlidir. Digər tərəfdən, Türkiyənin əlində bir kozır var, Kürecik Radarı. Bu, söndürülərsə, İranın ballistik raketlərinə qarşı İsraili kor edəcək və onun Dəmir Qübbəsini təsirsiz hala gətirəcək.
İSRAİL TƏCAVÜZÜNÜ YALNIZ SURİYA HÖKUMƏTİ DAYANDIRA BİLƏRMİ?
Bu ekvivalent gücün yaradılması həm də bir sıra beynəlxalq ittifaqların qurulmasını tələb edir. Xüsusən də İsrail və ABŞ kimi böyük dövlətlərin rəhbərlik etdiyi blokla qarşılaşdığınız zaman. Şaraa hökuməti ilə əlaqələr, əlbəttə ki, vacibdir. Lakin yeni Dəməşq hökuməti İsrail işğalına qarşı barmağını belə tərpətməyib və bacarmayıb. Şəriət qüvvələri Dəməşqə daxil olarkən, fürsətçi İsrail Suriyanın Əsəddən qalan bütün hərbi infrastrukturunu, hava hücumundan müdafiə sistemlərini və silah-sursat anbarlarını məhv etdi. Bu gün Şaaranın piyada silahlarından başqa heç nəyi yoxdur. Türkiyə Suriyanın ərazi bütövlüyü ilə bağlı razılığa gələ biləcəyi Rusiya və İranla soyuqlaşan münasibətlərini təcili şəkildə canlandırmalı, səpələdiyi Astana masasını təmizləməli və Şərqi Aralıq dənizində möhkəm müttəfiqlər qazanmalıdır. Yoxsa nə qədər iradə və gücünüz olsa da, quru çıxışlar etməkdən başqa çarəniz yoxdur.
“İKİNCİ İSRAİL” LAYİHƏSİNİ DƏFN ETMƏK LAZIMDIR
İsrailin planlarına vurulan ən mühüm zərbə “ikinci İsrail” layihəsinin dirçəlmədən dəfn edilməsidir. Yəni PKK/PYD-ni tamamilə məhv etmək lazımdır. Bu həm də silah biznesidir. Görünür, tərksilah təkcə məktublarla, yaxud ictimai rəylə mümkün deyil. PYD-nin bağlı olduğu KCK-nın lideri Abdullah Öcalanın qrupların silahı yerə qoymasını tələb edən məktubu İsrailin dəstəyi ilə diqqətdən kənarda qalır. PYD-nin artan tələbləri ilə Mazlum Abdi ilə Şaara arasındakı razılaşmanın nəticə verməyəcəyinə dair əlamətlər yavaş-yavaş ortaya çıxır. Prezident Ərdoğanın danışdığı “dəmir yumruq” variantı artıq gündəmə gəlməlidir. Yəni İsrailin bölgədəki nümayəndəsi olan PKK/PYD-yə lazımi zərbəni vurmaq üçün əzmkarlıq nümayiş etdirilməli, geriyə addım atmamaqla, çəkinmədən dəmir yumruq hədəfə vurulmalıdır. Bunun beynəlxalq şərtləri var. Əhəmiyyətli olan o strategiyaya sahib olmaq və hərbi şəkildə hərəkətə keçməkdir.
BÜTÜN BƏŞƏRİYYƏTİN ÖNCÜLÜ OLMALI
Yalnız bu yolla Türkiyənin təhlükəsizliyi təmin oluna bilər və yalnız bu yolla İsraili öz yerinə oturdula bilər. Prezident Rəcəb Tayyib Ərdoğan ötən il bayram namazından sonra verdiyi açıqlamada “Allah sionist İsraili bədbəxt etsin” demişdi. Lakin paylaşdığımız bu arzunun vəd olaraq qalacağı və gerçəkləşəcəyi atılacaq addımlardan asılıdır. Üstəlik, Türkiyə bu addımı ilə təkcə öz təhlükəsizliyini təmin etməyəcək, həm də bölgədə İsrail ekspansionizminin qarşısını almaqla sözün əsl mənasında Yaxın Şərqdə müsəlmanların himayəçisi roluna yiyələnəcək. Əslində, bununla Türkiyə təkcə müsəlmanlar və Yaxın Şərq üçün deyil, həm də Avrasiyadan Afrikaya və Latın Amerikasına qədər bütün bəşəriyyət üçün bir öncül olacaq.İsrail sionizminə lazımi dərs verilməlidir! Türkiyə İsraili məğlub edəcək
Surxay Əliyev
