Çin Trampa təslim olmaq fikrində deyil
Trampın Çin mallarına əlavə 50 faiz rüsum tətbiq etmək hədəsinə cavab olaraq, Çin səlahiyyətliləri “qətiyyətlə əks tədbirlər görəcəklərini” bildiriblər. Çinin Ticarət Nazirliyi ABŞ prezidenti Donald Trampın Çin idxalına əlavə 50 faizlik gömrük rüsumunun tətbiqi ilə bağlı hədəsini “səhv ardınca səhv” adlandırıb. Çərşənbə axşamı, aprelin 8-də Çinin Ticarət Nazirliyi yaydığı bəyanatda Pekinin "hüquq və maraqlarını qorumaq üçün qətiyyətlə əks tədbirlər görəcəyini" bildirib. Departament qeyd edib ki, Birləşmiş Ştatların tətbiq etdiyi qlobal idxal tarifləri “subyektiv birtərəfli qiymətləndirmələrə əsaslanır” və beynəlxalq ticarət qaydalarına uyğun gəlmir,o cümlədən “birtərəfli hədə-qorxu ilə bağlı tipik təcrübəni” təmsil edir. "Çin bunu heç vaxt qəbul etməyəcək. Əgər ABŞ öz yolunda israr etsə, Çin sona qədər mübarizə aparacaq", - deyə Çin xəbər agentliyi “Sinhua” xəbər agentliyi nazirliyin nümayəndəsinə istinadən yazır.
Surxay Əliyev
