İrandan Ermənistanla ticarəti 300 milyondan 3 milyarda çatdırmaq çağırışı....
İran Azərbaycanın gedişatını və davranışını izləyir. Bunu aprelin 3-də jurnalistlərlə söhbətində Azərbaycana qarşı qərəzli yox,düşmənçilik mövqeyilə seçilən, ermənidən betər erməni olmaq istəyən, Ermənistan-İran Əməkdaşlığının İnkişafı Fondunun rəhbəri Pouya Hüseyni bildirib. Onun iddiasına görə, guya İsrail Azərbaycanı təkcə Ermənistana qarşı deyil, həm də İrana qarşı yönəlmiş silahlarla təmin edir. İsrail hesab edir ki, İran zəifləsə, vəziyyətdən istifadə edib ona qarşı Cənubi Qafqazdan ikinci cəbhə aça bilər. Hüseyni əlavə edib ki, İran və Ermənistan təhlükəsizlik sahəsində əməkdaşlıq etməlidirlər, çünki bu məsələdə onlar bir-birinə bağlıdırlar. “İran və Ermənistan oxşar regional təhdidlərlə üz-üzədirlər, ona görə də təhlükəsizlik sahəsində əməkdaşlıq pozulmuş tarazlığı bərpa edəcək səviyyəyə yüksəldilməlidir”, deyə vurğulayıb.
İranlı ekspert onu da bildirib ki,İran Ermənistana hərbi-texniki dəstək verməyə hazırdır. Ermənistan və İran silah təchizatı, kəşfiyyat məlumatlarının mübadiləsi və təhlükəsizlik sahəsində və digər aspektlərdə əməkdaşlıq qura bilər. "İran Ermənistana belə dəstəyi verməyə hazırdır. Bu cür əməkdaşlığa mane olan üçüncü tərəflər (bu, Qərb ölkələri də, başqa ölkələr də ola bilər) bizim əlaqələrimizə qarışmamalıdır", - deyə o qeyd edib. Pouya Hüseyni xatırladıb ki, Ermənistanla İran arasında ticarət dövriyyəsi 300 milyon dollardan 700 milyon dollara yüksəlib. “Ancaq hər iki ölkə bu rəqəmi əvvəlcə 1 milyard dollara, sonra isə 3 milyard dollara çatdırmaq niyyətindədir”, - deyə ekspert yekunlaşdırıb.
Surxay Əliyev
