Demokrat senator:- “Putin Trampı “asanlıqla manipulyasiya oluna bilən uşaq” kimi görür”
ABŞ prezidenti Donald Tramp Rusiya lideri Vladimir Putinə qarşı sadəcə olaraq “qəzəbli davranır”, o da öz növbəsində Trampı “asan manipulyasiya edilən uşaq” hesab edir. Bu fikirləri “Foreign Policy” nəşrinə müsahibəsində ABŞ prezidentinin ən sərt tənqidçilərindən biri, demokrat senator Adam Şiff deyib. Schiff, Trampın Ukrayna prezidenti Vladimir Zelenskiyə qarşı “dəhşətli rəftarını” və Ukraynaya hərbi yardımı dayandırmasını əsas gətirərək, onun Ukrayna ilə Rusiya arasında sülh sazişinin əldə edilməsinə yanaşmasını “Ukraynaya mütləq xəyanət” kimi dəyərləndirib. "Prezident (Tramp) indi özünü Rusiyaya qarşı qəzəbli kimi göstərir. Lakin bu inandırıcı deyil" deyən Schiff, tariflərin qeyri-ardıcıl tətbiqi və davam edən xarakterini nəzərə alaraq, Rusiyaya qarşı tarif təhdidlərinin qeyri-ciddi olduğunu əlavə edib. "Hətta Tramp nə vaxtsa Rusiyanı cəzalandırmaq istəsə belə, Putinə Tramp haqqında bir neçə xoş söz deməsi kifayətdir ki o, Trampı geri çəkilməyə vadar etsin", - deyə o vurğulayıb.
Senator Trampın Putinə qarşı durmaq istəyini və ya qabiliyyətini də şübhə altına alıb, çünki Tramp ona “çox heyrandır”: Bir sözlə “Putin Trampı manipulyasiya edilməsi asan olan uşaq hesab edir və təəssüf ki, o, bu zənnində haqlıdır”. Adam Şiff həmçinin qeyd edib ki, Tramp administrasiyası “müharibəyə məsuliyyətlə son qoymaq üçün, tam olaraq yanlış yanaşmaya əl atıb” və bununla Rusiyanın öz məqsədlərinə nail ola bilmə ehtimalını xeyli artırıb. “Rusiyanın gələcək təcavüzünün qarşısını alan mənalı sülhə nail olmağın yolu Ukraynaya hərbi, diplomatik və kəşfiyyat dəstəyini geri çəkməkdən deyil, əksinə ona daha güclü dəstək verməkdən keçir”, - deyə senator yekunlaşdırıb.
Surxay Əliyev
