Netanyahu Macarıstanda təmtəraqla qarşılandı
İsrailin baş naziri Benyamin Netanyahu Haaqa məhkəməsinin onun haqqında beynəlxalq həbs qərarına baxmayaraq, aprelin 3-də səhər saatlarında Budapeştə rəsmi səfərə gəlib.Hava limanında İsrailin baş nazirinin qarşılanma mərasimində Macarıstan əsgərlərindən birinin əlində İsrail bayrağı olub. Netanyahunu Macarıstanın müdafiə naziri Krystof Szalay-Bobrovnicki müşayiət edib. “Budapeştə xoş gəlmisiniz, İsrailin Baş naziri Benyamin Netanyahu!” deyə o, Facebook-da bu görüşün fotosunu yerləşdirərək yazıb. Netanyahu Macarıstanın baş naziri Viktor Orbanla danışıqlar aparmağı planlaşdırır. Birgə mətbuat konfransı yerli vaxtla saat 12:30-da gözlənilir. Səfər aprelin 6-dək davam edəcək. Maraqlıdır ki,Orban Netanyahuya 2024-cü ilin noyabrında Beynəlxalq Cinayət Məhkəməsinin İsrailin baş naziri və keçmiş müdafiə naziri Yoav Qalantın həbsinə order verdikdən bir gün sonra dəvət göndərib. Hansı ki,onların hər ikisi Qəzzada hərbi və insanlığa qarşı cinayətlər törətməkdə ittiham olunurlar. Macarıstan Roma Statutunun tərəfi olsa da, Orban orderi yerinə yetirməkdən imtina etdi və Netanyahuya qarşı heç bir həbs olmayacağına söz verdi. Macarıstanın baş nazirinin iddiasına görə, BCM “siyasi məqsədlər üçün münaqişəyə müdaxilə edir”. Bu, Netanyahunun 2023-cü ildən bəri Avropaya ilk səfəridir. Macarıstan 1999-cu ildə Roma Əsasnaməsini imzalayıb və 2001-ci ildə ratifikasiya edib. İndi Orbanın ofisində bildirildiyi kimi, ölkə Beynəlxalq Cinayət Məhkəməsindən çıxmağa hazırlaşır. Bundan əvvəl həm Polşa, həm də Almaniya da İsrailin baş nazirini səfər edəcəyi təqdirdə həbs etməyəcəklərini açıq şəkildə bildirmişdilər.
Surxay Əliyev
