Putinin xüsusi nümayəndəsinin ABŞ-a səfəri gözlənir
Trampın sülh səylərindəki məyusluğundan sonra Rusiya Vaşinqtona yüksək səviyyəli danışıqlar aparan Kirill Dmitriyevi göndərir. Rusiya Birbaşa İnvestisiya Fondunun rəhbəri və prezident Putinin beynəlxalq iqtisadi məsələlər üzrə xüsusi nümayəndəsi Kirill Dmitriyev bu həftə ABŞ nümayəndəsi Stiv Vitkoffla danışıqlar aparmaq üçün Vaşinqtona gələcək. Bu, Rusiyanın daxili işlər naziri Vladimir Kolokoltsevin 2024-cü ildə BMT-nin polis xidməti sammitində iştirakını nəzərə almasaq, 2022-ci ildə Ukraynada müharibə başlayandan bəri belə yüksək rütbəli rusiyalı rəsminin ABŞ-a ilk səfəri olacaq. Məsələ ilə tanış olan mənbələr Reuters agentliyinə bildiriblər ki, görüş çərşənbə günü baş tuta bilər və burada ikitərəfli əlaqələrin bərpası və Ukraynadakı münaqişənin həllində mümkün irəliləyiş müzakirə olunacaq. Dmitriev özü X sosial şəbəkəsində təsdiqləyib ki, “köhnə rəvayətlərdən qaynaqlanan müqavimətə” baxmayaraq dialoq mümkündür.
Səfər Donald Trampın Moskvanın sülh danışıqları ilə bağlı mövqeyindən narazılığının artması fonunda baş verir. CNN-in məlumatına görə, Ağ Ev administrasiyası bu səfərə görə Dmitriyevə qarşı sanksiyaları müvəqqəti olaraq ləğv edib. Müzakirə zamanı Ukrayna mövzusu ilə yanaşı, Rusiyada birgə mədən layihələri, eləcə də Arktikanın inkişafında xarici investorların iştirakına da toxunula bilər. Son zamanlar Moskva ənənəvi ticarət yollarına alternativ olaraq Şimal Dəniz Marşrutunu fəal şəkildə təbliğ edir. “Reuters”in məlumatına görə, Tramp belə qənaətə gəlib ki, yaxın aylarda Rusiya və Ukrayna arasında sülhə nail olmaq mümkün olmayacaq və administrasiya hər iki ölkəyə yeni təzyiq tədbirləri hazırlayır. Fox News xəbər verir ki, Tramp neft məhdudiyyətlərindən yayınan Rusiyanın “kölgə donanmasına” qarşı sanksiyalar tətbiq edə bilər. Martın 30-da NBC telekanalına müsahibəsində Tramp Putinin Zelenskinin qeyri-legitimliyi ilə bağlı sözlərindən “qəzəbləndiyini” bildirib və bir ay ərzində barışıq əldə olunmasa, Rusiya neftinə 25% rüsum tətbiq edəcəyi ilə hədələyib.
Surxay Əliyev
