Makron İsraili Qəzzaya hücumları dayandırmağa və atəşkəs rejiminə qayıtmağa çağırdı
Fransa prezidenti Emmanuel Makronla İsrailin baş naziri Benyamin Netanyahu arasındakı telefon danışığı zamanı Makron İsraili Qəzzada atəşkəs rejiminə qayıtmağa çağırıb. Bu barədə Makron X sosial hesabında yazıb. Fransa prezidenti bütün girovların azad edilməsinin və İsrailin təhlükəsizliyinin Fransa üçün prioritet olduğunu vurğulayıb. Sitat-“İsrailin baş nazirini Qəzzaya hücumları dayandırmağa və HƏMAS-ın qəbul etməli olduğu atəşkəsə qayıtmağa çağırdım və humanitar yardımın dərhal bərpa edilməli olduğunu vurğuladım” –sitatın sonu.Makron əlavə edib ki,"Mən həmçinin İsraili Livanda öhdəlik götürdüyü atəşkəsə ciddi şəkildə riayət etməyə çağırdım. Bu tələb mülki əhalinin təhlükəsizliyini təmin etmək üçün bütün tərəflərə şamil edilir", - deyə o vurğulayıb. Makron həmçinin İsrailin baş naziri ilə Suriyadakı durumun sabitləşməsi və onun tam suverenliyinin bərpasını müzakirə etdiyini deyib. "Biz bütün bu prioritet məsələlərdə İsrail hakimiyyəti ilə yaxından əlaqələndirməyə davam edəcəyik. Yaxın Şərqin sabitliyə ehtiyacı var. Yalnız ədalətli və davamlı sülh hamı üçün gələcəyi təmin edə bilər", - deyə Fransa prezidenti yekunlaşdırıb.
Surxay Əliyev
