ABŞ-dan Suriyada olan vətəndaşlarına təcili xəbərdarlıq: Dərhal ölkəni tərk edin
ABŞ Dövlət Departamenti Ramazan bayramı zamanı mümkün hücum təhdidləri səbəbindən bütün vətəndaşlarına Suriyaya səfər etməmələri ilə bağlı ciddi xəbərdarlıq edib. Departament həmçinin hələ də ölkədə olan Amerika vətəndaşlarını Suriyanı dərhal tərk etməyə çağırıb. ABŞ-ın Suriyadakı səfirliyi cümə günü rəsmi internet saytında verdiyi açıqlamada Dəməşqdəki səfirliklərin, beynəlxalq təşkilatların və dövlət qurumlarının bayram zamanı ciddi hücuma məruz qalma riski altında olduğunu vurğulayıb. Səfirlik bəyanatında, "Mümkün hücumlar silahlı basqınlar, bombalı hücumlar və partlayıcıların istifadəsi şəklində baş verə bilər"-deyə xəbərdarlıq edib. Vətəndaşları üçün hərtərəfli təhlükəsizlik təlimatları verən Amerika səlahiyyətliləri aşağıdakı tədbirləri sadalayıb:
*Suriyada olanlar dərhal ölkəni tərk etməlidir.
*İclaslardan və insanların çox olduğu yerlərdən uzaq durun
*Turizm bölgələrində xüsusilə diqqətli olun
* Fövqəladə vəziyyətdə sığınacaq üçün təhlükəsiz yerlər əvvəlcədən müəyyən edilməlidir.
*Mobil qurğular həmişə şarjlı saxlanmalıdır
2012-ci ildə Suriyada başlayan vətəndaş müharibəsi səbəbindən fəaliyyətini dayandıran ABŞ səfirliyi vətəndaşlarına fövqəladə hallarda Çexiyanın Dəməşqdəki səfirliyi nəzdində fəaliyyət göstərən ABŞ Maraqlar Bölməsi ilə əlaqə saxlamağı tövsiyə edib. Bəyanatda həmçinin vurğulanıb ki, Suriyada hazırda “terror aktları, xaos, adam oğurluğu, girov götürmə, silahlı qarşıdurma və əsassız həbslər” kimi ciddi təhlükəsizlik riskləri mümkündür.
Surxay Əliyev
