Kişinyov məhkəməsi Qaqauziya Muxtar Vilayətini 20 sutka başsız qoydu
Moldovanın Qaqauziya Muxtar Vilayətinin rəhbəri Yevgeniya Hutsul 2023-cü il seçki kampaniyası zamanı qanunsuz maliyyələşmə və saxtakarlıqda ittiham olunur. İttiamları qəbul etməyən Hutsul, onları qurama və siyasi motivli adlandırıb, dəstək üçün Vladimir Putinə və Rəcəb Tayyib Ərdoğana müraciət edib. İttiham tərəfi Hutsul üçün 30 gün həbs tələb etsə də, məhkəmə vəsatəti qismən təmin edərək siyasətçini 20 sutka həbs cəzasına məhkum edib. “Bu gün Qaqauziyanı başsız qoydular” deyən Hutsul mühafizəçilərin müşayiəti ilə məhkəməni tərk edib.
“2023-cü ildə Qaqauziyanın rəhbəri vəzifəsinə seçki kampaniyasının qanunsuz maliyyələşdirilməsi, rəsmi sənədlərin saxtalaşdırılması, bəyannamələrin saxtalaşdırılması, kampaniyanın maliyyə hesabatlarının saxtalaşdırılması”, - deyə məhkəmədə prokuror Adrian Skutaru ittihamları sadalayıb. Hutsulun müdafiəsi onun həbsinə etiraz etməyi planlaşdırır. Həbsini absurd və ittihamları siyasi motivli adlandıran Yevgeniya Hutsul hesab edir ki, ona qarşı təqib Moldova prezidenti Maya Sandu tərəfindən başlanıb. Hutsul martın 25-də İstanbula uçmaq istərkən Kişinyov hava limanında saxlanılıb. Həbsindən az sonra müraciətini Qaqauziya sakinlərinə çatdıran Hutsul bildirib ki,ona, “başkan [region rəhbəri] vəzifəsindən imtina edib dərhal ölkəni tərk edəcəyi təqdirdə cinayət təqibini dayandırmaq təklif edilib” Hutsulun vəkili Sergey Moraru əlavə edib ki, ona cinayət işinin hələ 2023-cü ildə bağlanması müqabilində istefa vermək təklif olunub. Hutsul isə təkcə muxtariyyət sakinlərinə deyil, həm də Rusiya prezidenti Vladimir Putin və Türkiyə prezidenti Rəcəb Tayyib Ərdoğana müraciət edib. O, Putindən “Moldova hakimiyyətinə təzyiq göstərmək üçün bütün diplomatik, siyasi və hüquqi mexanizmlərdən istifadə etməyi” və “müstəqil Moldova Respublikası tərkibində Qaqauz muxtariyyətinin xüsusi statusuna qəti və birmənalı dəstək ifadə etməyi” xahiş edib. Ərdoğana müraciətində isə Hutsul Ankaranın 30 il əvvəl Qaqauziyanın Moldova tərkibində xüsusi status almasına necə kömək etdiyini xatırladaraq muxtariyyət əhalisinin Türkiyə prezidentinin yardımına ümid bəslədiyini bildirib.
Surxay Əliyev
