“Trampın Ukrayna barədə “A” planı və “B” planı” – Son xəbər
ABŞ dövlət katibi Marko Rubio Rusiyanın Ukraynaya qarşı müharibəni dayandırmaq üçün Amerika tərəfinin “A” və “B” planını açıqlayıb. O, bu barədə CBS News-a müsahibəsində bildirib. Rubionun fikrincə, “A” planını həyata keçirmədən “B” planına keçid etmək mümkün deyil. "Bu müharibə uzun müddət davam edən, çoxlu fəsadlarla dolu üç illik çətin müharibədir. Ona görə də heç kim bunun asan olduğunu düşünmür, amma mən istəyirəm ki, hamı başa düşsün ki, bu bir plandır. A planı atəşi dayandırmaqdır ki, B planına - ikinci mərhələyə keçə bilək". Dövlət katibinə görə, məqsəd mərhələ diplomatiyası vasitəsilə hər kəsi danışıqlar masasına oturtmaq və müharibəni həmişəlik bitirmək üçün bir yol tapmaqdır. Rubio bunun uzunmüddətli və "hər kəsin ehtiyaclarını qarşılayan " bir şəkildə edilməsinin vacibliyini vurğulayıb. Rubio onu da qeyd edib ki, ikinci hissəyə yalnız "birinci mərhələ arxada qaldıqda" nail olmaq olar. "Tərəflər bir-birinə atəş açan zaman müharibənin sona çatması üçün danışıqlar aparmaq çətindir. Buna görə də prezident atəşkəs istəyir.Bu heç də asan olmayacaq. Beləliklə biz daimi və davamlı danışıqlar aparacağımız ikinci mərhələyə keçirik", - deyə Rubio bildirib. Dövlət katibi əlavə edib ki, bu, hər iki tərəfdən gərgin iş və güzəştlər tələb edəcək.
Məlum olduğu kimi Trampın xüsusi nümayəndəsi Steve Witkoff Rusiyada ABŞ-ın 30 günlük atəşkəs təklifini müzakirə etmək üçün keçən həftə Vladimir Putinlə görüşüb. Trampın özü bildirib ki, Amerika tərəfi Kreml rəhbəri ilə “çox yaxşı və məhsuldar müzakirə” aparıb. Onun sözlərinə görə, hazırda “bu dəhşətli, qanlı müharibənin başa çatması üçün çox yaxşı imkanlar var”. Vitkoff əmin olduğunu bildirib ki, yaxın həftələrdə Amerika tərəfi Rusiyanın Ukraynaya qarşı müharibəsinin həllində irəliləyiş əldə edə biləcək.
Surxay Əliyev
