Alman deputat Şvabe Azərbaycana qarşı istədiyi qərarı verdirə bilir - "oyuncaq AŞPA"...
Mirkazım Seyidov:”Özləri təsdiq edirlər ki, verdikləri qərarlar əvvəlcədən müəyyən olunur və formal olaraq səsə qoyulur”
Almaniya Sosial Demokrat Partiyasının üzvü, Bundestaqın Xarici Əlaqələr Komitəsinin üzvü, Almaniyanın AŞPA-dakı nümayəndə heyətinin rəhbəri və Almaniya hökumətinin dini etiqad azadlığı üzrə nümayəndəsi Frank Şvabe QHT rəhbəri Anar Məmmədlinin saxlanmasına görə Azərbaycan rəhbərliyini tənqid edib. O bəyan edib ki, Azərbaycan üçün AŞPA-ya geriyə yol yoxdur: nə indi, nə də yanvarda”.
Qeyd edək ki, Avropa Şurası Parlament Assambleyasının (AŞPA) deputatları yanvarda Azərbaycan nümayəndə heyətinin mandatını ratifikasiya etməkdən imtina ediblər.
Göründüyü kimi, Şvabe deyir Azərbaycan nə indi, nə də yanvarda AŞPA- ya qayıda bilməyəcək. Sanki AŞPA kimi seçkili qurumun qərarını bu başdan Şvabe müəyyən edir. Bu faktın özü AŞPA-nın oyuncaq bir quruma çevrildiyinin təsdiqi ola bilərmi?
Müstəqil siyasətçi Mirkazım Seyidov “Bakı-Xəbər”ə açıqlamasında bildirdi ki, Avropa institutlarının Azərbaycana qarşı qərəzli mövqe tutması danılmaz faktdır: “Çox maraqlıdır ki, bu cür qərəzli addımlar ölkəmizin qazandığı hansısa uğurlardan sonra atılır. Əldə etdiyimiz qələbədən sonra belə təzyiqlər artdı. AŞPA hətta bizə sanksiya tətbiq etdi.
Bu ilin yanvar ayında Avropa Şurası Parlament Assambleyasının (AŞPA) Azərbaycanla bağlı qərəzli qətnamə qəbul etməsinə, ölkəmizi bu qurumda təmsil edən nümayəndə heyətinin etimadnaməsinin ratifikasiya edilməməsinə cavab olaraq, rəsmi Bakı AŞPA ilə əməkdaşlığı və təşkilatda iştirakını qeyri-müəyyən müddətə dayandırıb. Prezident İlham Əliyev isə fevralın 1-də Parlamentlərarası İttifaqın Baş katibi Martin Çunqonqu qəbul edərkən bildirib ki, nümayəndə heyətimizin hüquqları bərpa olunmayacağı təqdirdə, Azərbaycan tərəfindən Avropa Şurası və Avropa İnsan Haqları Məhkəməsində iştirak məsələsinə yenidən baxılacaq. Prezident AŞPA-da anti-Azərbaycan xarakteri daşıyan və Azərbaycan nümayəndə heyətinin etimadnaməsinin ratifikasiya edilməməsi ilə bağlı azlıq olan bir qrupun təşəbbüsünün dialoqa xidmət etmədiyini vurğulayaraq bildirib ki, bu, ümumiyyətlə, parlament platformasının ənənələri ilə ziddiyyət təşkil edir.
AŞPA-nın Azərbaycana qarşı qətnamələrin qəbulunun əsasında Azərbaycanofob, türkfob və islamofob siyasət dayanır. Belə qurumlar üçün insan haqları, demokratiya və digər hüquqlar maraqlı deyil. Onlar bu hüquqları sadəcə Azərbaycana və digər müsəlman ölkələrinə təzyiq vasitəsi kimi istifadə edirlər. Əgər insan haqları və demokratiya, vətəndaş cəmiyyətinin hüquqları ilə bağlı AŞPA narahat olub ədalətli mövqe sərgiləsəydi, Fransada müsəlman uşaqların məktəblərə buraxılmaması, açıq aksiya keçirənlərə qarşı şiddətin işlədilməsi və insanları həbslərə məruz saxlamaları ilə bağlı səslərini çıxardardılar. Yaxud da Ermənistanda jurnalistlərin, müxalifətçilərin həbs olunmasına reaksiya verərdilər. Onlar üçün bu gün Azərbaycan maraqlıdır. Parlamentarilər erməni diasporunun sifarişlərini icra etməklə qarşıdan gələn seçkilərdə yenidən mandat qazanmaq istəyir. Ona görə də Azərbaycana təzyiq göstərilməsi üçün siyasi məhbus, vətəndaş cəmiyyətinin hüquqları məsələsini ortaya atıb belə tələblər irəli sürürlər. Azərbaycanda törətdikləri cinayətlərinə görə həbs olunanlara siyasi məhbus donunun geyindirməsi və ondan ölkəmizə təzyiq kimi istifadə olunması riyakarlıq və düşmənçilkdir. Şvabenin səsləndirdiyi fikirlər bu qurumun hansı dərəcədə “demokratik” olduğunu üzə çıxardı. Deməli, özləri təsdiq edirlər ki, verdikləri qərarlar əvvəlcədən müəyyən olunur və formal olaraq səsə qoyulur”.
Məhəmmədəli QƏRİBLİ
