Ermənistan Ukraynaya silah yardımına başladı...
"Ermənistan ABŞ-ın köməyi və vasitəçiliyi ilə Ukraynaya "Toçka-U" raketləri ötürməyə razılıq verib". Bu barədə ABŞ-ın Müharibə Araşdırmaları İnstitutu yazıb.
Bildirilib ki, belə bir iddia ilə Kremlə yaxın mənbələr çıxış edib: "Amma hələ ki, bu iddianı təsdiqləyəcək sübut yoxdur. Ermənistanın Ukraynaya ötürə biləcəyi silahların sayı da məlum deyil". Həmçinin qeyd olunub ki, Ermənistan Kollektiv Təhlükəsizlik Müqaviləsi Təşkilatından (KTMT) çıxmağa hazırlaşır. Vurğulanıb ki, bu proseslər İrəvanla Moskva arasında münasibətlərin pisləşməsi fonunda baş verir.
Şübhə yoxdur ki, Ermənistandan Ukraynaya silah ötürülməsi Rusiyada xoş qarşıalnmayacaq. Hətta Kremlin buna olduqca sərt reaksiya verməsi qaçılmaz hesab olunur. Bugünədək erməni tərəfinin Ukrayna rəsmiləri ilə görüşü Moskvada böyük qıcıq yaradırdı. Elə bu günlərdə Rusiya Xarici İşlər Nazirliyinin rəsmi nümayəndəsi Mariya Zaxarova qeyd etmişdi ki, Ermənistan Təhlükəsizlik Şurasının katibi Armen Qriqoryanla Ukrayna Prezidenti Ofisinin rəhbəri Andrey Yermakın görüşü nümayişkaranə antirusiya addımıdır: "Əgər siz Maltada qondarma Kopenhagen formatında görüşdən danışırsınızsa, biz bunu rəsmi İrəvanın nümayişkaranə antirusiya jesti kimi qiymətləndiririk". O xatırladıb ki, bundan əvvəl Ermənistanın baş nazirinin arvadı Anna Akopyan Kiyevə gedib: "Ermənistan parlamentinin sədri Alen Simonyan Dublində Ukrayna Ali Radasının sədri Ruslan Stefançukla əlaqə saxlayıb. Ermənistanın baş naziri Paşinyan özü Qranadada Ukrayna prezidenti Vladimir Zelenski ilə danışıb. Məncə, İrəvanda ölkəmizə aqressiv şəkildə qarşı çıxanlarla nümayişkaranə flört etdiklərini bilməlidirlər. Təəssüflə qeyd etmək lazımdır ki, respublikanın indiki rəhbərliyi bir müddət əvvəl Ermənistanın sabitliyi və rifahının ən mühüm amili adlandırdığı müttəfiqlik münasibətlərimizi məqsədyönlü və israrla pozur". Zaxarova qeyd edib ki, Ermənistanın media resurslarına və onların antirusiya ritorikasına gəlincə, burada açıq rusofob kontekst var: "Oxuyuram, baxıram. Bunlar sadəcə təhqir deyil, ört-basdır edilməmiş rusofobiyadır. Bu resursların maliyyələşdirilməsinin arxasında kimin dayandığını bilirik. Əgər onlar hesab edirsə ki, biz bunların kimin tərəfindən maliyyələşdirildiyini bilmirik, səhv edirlər". İndi belə vəzyyətdə İrəvanın Kiyevə silah yardımı Kremli daha çox qəzəbləndirəcək. Baş verənlər fonunda "Kommersant" qəzeti yazır: "İrəvanın Moskva ilə münasibətlərinin durğunluğu və hətta deqradasiyası və ölkənin Qərb istiqamətində təsirli fəaliyyəti, Qərbin qarşılıqlı münasibəti nəticəsində deyə bilərik ki, Ermənistan özünəməxsus vəziyyətdədir. Moskva ilə eyni ittifaqda olan (KTMT-dən başqa, Ermənistan həm də Aİİ-nin üzvüdür) İrəvan Avropaya inteqrasiyada maraqlı olduğunu açıq şəkildə danışır və eyni zamanda, Avropa İttifaqının öz ərazisində olması üçün konkret addımlar atır. Xüsusilə Ermənistan-Azərbaycan sərhədində vəziyyətin monitorinqini aparan Aİ-nin Ermənistandakı monitorinq missiyasının sayı yaxın gələcəkdə artırıla bilər". Məqalədə Ermənistanın Qərbə doğru siyasi yönlənməsinin artıq baş verdiyini düşünən Ermənistan Araşdırmalar Fondunun elmi direktoru Sergey Melkonyanın fikrinə istinad edilir: "Biz sammitlərdə iştirak etmirik, təlimlərdə iştirak etmirik. Eyni zamanda, Qərb məkanlarında tədbirlərdə iştirak etmək fürsətini əldən vermirik. Ermənistan Avropa ilə bağlı bütün sammitlərdə iştirak edir. Aydın siyasi oriyentasiya özünü göstərir". Eyni zamanda, Melkonyan hesab edir ki, "Qərbə dönüş"ün nə olduğuna qərar vermək lazımdır: "Artilleriya NATO standartlarına keçir. Hindistandan alınan silahların hamısı NATO çaplıdır, Sovet çaplı deyil. Fransa Ermənistanda müdafiə auditi aparır. Yəni islahatlar NATO üzvü olan ölkənin iştirakı ilə olacaq. Bir tərəfdən biz bunu görürük. Digər tərəfdən, hərbi təminatlar vacibdir. Və hələ heç kim bunu İrəvanla müzakirə etməyə hazır deyil. Nə ABŞ, nə də Fransa. Yəni hələlik bu komponent sıradan çıxır". Melkonyan iqtisadi faktora da işarə edib: "Çətin ki, Ermənistan Aİ ilə Rusiya ilə eyni həcmdə ticarət apara bilsin. İqtisadiyyatı şaxələndirmək, qazla nəyisə həll etmək lazımdır. Siz diversifikasiya etməyincə, geri dönüş ölümcüldür."
Beynəlxalq Böhran Qrupunun Cənubi Qafqaz üzrə baş analitiki Olesya Vartanyan hesab edir ki, kursun kəskin dəyişməsindən danışmaq hələ ki, yersizdir: "Hələlik hər şey, baş verənlər ağlın hüdudları daxilindədir. Ermənistanın mövqeyini kökündən dəyişdirəcək heç bir addım yoxdur və Rusiya ilə ittifaqdakı erməni komponentinin çıxması üçün heç bir ilkin şərt yoxdur. Hər şey hələ də ədəb çərçivəsindədir".Onun fikrincə, indiyə qədər iki xəbər önəmlidir: birincisi, Ermənistandakı Avropa missiyasının sayını artırmaq qərarı, ikincisi, Aİ-nin Ermənistanın Avropa Sülh Fonduna daxil olması məsələsini nəzərdən keçirməsi. Amma elə bütün bunlar da rusların kəskin reaksiyası üçün bəs edir. Ermənistanın keçmiş baş naziri Xosrov Arutyunyan qeyd edir ki, Ermənistanın dövlət idarəetmə sistemi yaranmış fövqəladə vəziyyətə qətiyyən uyğun gəlmir: "Müttəfiqlərin və dost qonşuların etimadı sarsıldı. Nəticədə Ermənistan bəzi Qərb dövlətlərinin siyasi bəyanatlarına arxalanmaq məcburiyyətində, praktikada isə təcrid olunmuş vəziyyətdə qalır. İroniya odur ki, dövlətimiz üçün həyati əhəmiyyət kəsb edən məsələlər çox vaxt bizim iştirakımız olmadan üçüncü dövlətlər tərəfindən müzakirə və həll edilir. Üstəlik, Ermənistan hakimiyyəti beynəlxalq platformalarda öhdəlik götürərsə, qonşularımız üçün hər hansı ermənipərəst hərəkət və ya təşəbbüs hərbi əməliyyatların bərpasına qanuni səbəb kimi qəbul edilə bilər. Etiraf etmək məcburiyyətindəyik ki, bölünmüş cəmiyyət, məhdud iqtisadi, hərbi resurslar və etibarlı beynəlxalq tərəfdaşların olmaması fonunda qəbuledilməz sülh və dağıdıcı müharibə arasında seçim qarşısındayıq. İndiki vəziyyətdə hərbi əməliyyatların bərpası üçün əsas təhlükənin İrəvan hakimiyyətinin siyasəti olduğu göz qabağındadır".
Samirə SƏFƏROVA
