Azərbaycanın Zəngəzur dəhlizinə hücum hazırlığı fikrini kimlər uydurur?..
![Image](/uploads/posts/2023-11/1700492530_mehri-1612851581.webp)
- Məhərrəm Zülfüqarlı: “Qərb yaxşı bilir ki, Azərbaycan Ermənistana hücum etməyəcək”
Qarabağda lokal xarakterli antiterror əməliyyatlarının başlamasının və bitməsinin düz iki ayı tamam oldu. Burada diqqəti çəkən vacib məqam odur ki, ötən iki ay ərzində Azərbaycan-Ermənistan sərhədində sakitlikdir və demək olar bir dəfə də olsun atəşkəs pozulmayıb.
Halbuki, antiterror əməliyatlarına qədər sərhəddə atəşkəs pozulurdu. Xüsusən də Laçın və Kəlbəcər rayonları istiqamətində atəşkəsin pozulması halları daha intensiv xarakterli olurdu. İndi bunların heç biri baş vermir.
Aylardır Qərb bizi Zəngəzur dəhlizini zor gücü ilə ələ keçirməyə hazırlaşmaqda günahlandırır. Bununla bağlı xəbərdarlıq edur, Konqres dinləmələr keçirir və s. Adətən belə bir şey olanda sərhəddə gərginlik olur, buna hazırlıq görülür və s. Əgər doğrudan da belə idisə, o zaman bəs niyə iki aydır dövlət sərhədində sabitlikdir, atəşkəs pozulmur?
- “Sadəcə, süni şəkildə vəziyyəti qızışdırmaqla öz planlarını həyata keçirmək istəyirlər”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-prezidenti, professor Məhərrəm Zülfüqarlı hesab edir ki, Azərbaycanın uğurlarını həzm edə bilmədiklərindən Qərb belə yalançı kampaniya aparır: “Azərbaycanın 44 günlük Vətən müharibəsində əldə etdiyi zəfərdən sonra 19 sentyabrda həyata keçirdiyi antiterror əməliyyatı hərb tarixlərinə qızıl hərflərlə yazılmalıdır. Yəni bu əməliyyat o qədər dəqiq, müasir beynəlxalq hüquq normalarına uyğun həyata keçirildi ki, bununla bağlı Qərb ilk dövrlərdə hər hansı nöqsan tapa bilmədi. Azərbaycanla sərhəddə atəşkəsin pozulması heç də hər zaman erməni tərəfinin istəyi ilə olmayıb. Bunu əsasən böyük dövlətlər tətikləyib. Bu gün Rusiyanın Ermənistana təsiri azalıb. Əvəzində Fransanın bu ölkədə rolu artıb. Qərbin əsas məqsədi odur ki, Rusiyanı Ermənistandan çıxarsın. Avropa İttifaqı müşahidə missiyasının Ermənistana yerləşdirilməsinin arxasında məhz bu niyyət dayanır. İndiki dövrdə Azərbaycana qarşı Qərbin təzyiqi heç də bizim ölkəyə görə deyil. Məsələ ondadır ki, Azərbaycan-Rusiya münasibətlərinin normal olması Qərbi narahat edir. Qərbin əsas məqsədi odur ki, Azərbaycana təzyiq göstərməklə Rusiya ilə münasibətləri körlasınlar. Nəticədə bizi Ukraynanın vəziyyətinə salsınlar. Yaxud da 2008-ci ildə Gürcüstanın vəziyyətinə salsınlar. Ondan sonra da öz istədikləri kimi hərəkət etsinlər. Çünki onların məqsədi Cənubi Qafqazda Rusiyanın zəifləməsindən sonra təşəbbüsü ələ almaqdır. Qərb yaxşı bilir ki, Azərbaycan Ermənistana hücum etməyəcək. Sadəcə, süni şəkildə vəziyyəti qızışdırmaqla öz planlarını həyata keçirmək istəyirlər. Aparılan kampaniyanın kökündə bu dayanır. Məqsəd odur ki, Azərbaycanı zəiflətsinlər və özlərinin bir marionet rejiminə çevirsinlər. Nə qədər insan qırılsa da, evlər dağılsa da onları maraqlandırmır. Ukrayna kimi ölkəni bunlar viran qoydular. Qarabağda suverenliyimiz tam bərpa olunandan sonra Ermənistanla sərhəddə atəşkəs niyə pozulsun ki? Zatən Qrabağ Ermənistana böyük yük idi. Bu səbəbdən Ermənistanın da inkişafı yerində sayırdı. Regionda sabitlik, Ermənistan-Azərbaycan sərhədində atəşkəsin pozulmaması ermənilər üçün vacib əhəmiyyət kəsb edir. Ağılları olsa böyük dövlətlərin əlində maşa olmazlar”.
Vidadi ORDAHALLI