20 il əvvəl prorektorun qətli bu şayiələrlə ört-basdır olunurdu...
![Image](/uploads/posts/2023-11/1700492252_prorek.webp)
2011-ci il sentyabrın 16-da evinin yaxınlığında qətlə yetirilən “Təfəkkür" universitetinin prorektoru Tariyel Əhmədovun qətlinin yeni təfərrüatlarının ortaya çıxdığı, qətlin sifarişçisinin məsuliyyətə cəlb edildiyi məlumdur.
Qayıdaq 12 il əvvələ, prorektorun qətlə yetirliyi günə. Hadisənin baş verdiyi gün yerli mediada “...Hüquq-mühafizə orqanlarından verilən məlumata görə, mərhumun meyiti həmin ərazidəki idman meydançasından tapılıb. Hələlik ölümün səbəbi bilinməsə də, T.Əhmədovun turnikdən yıxılması və ya ürək tutmasından dünyasını dəyişməsi versiyaları irəli sürülür. Hazırda Bakı şəhər Baş Polis İdarəsinin, Yasamal RPİ-nin rəhbərliyi hadisə yerindədir. Faktla bağlı Yasamal rayon Prokurorluğunda araşdırma aparılır. Yasamal RPİ-nin 28-ci polis bölməsindən əldə etdiyimiz məlumata görə, meyitin baş nahiyəsində xəsarət izləri aşkar olunub. Hazırda bununla bağlı araşdırma aparılır. Xəsarət yıxılma nəticəsində və ya küt alətlə vurulması barədə hər hansı konkret rəy verilmir”-deyə bidirilirdi.
Hadisədən sonra Təfəkkür Universitetinin prorektoru Rəhim Hüseynov mətbuata bildirirdi ki, təmsil etdiyi ali məktəbin bu qətllə bağlı xüsusi versiyası yoxdur: “Yaşlı adam idi, kimsə ilə də düşmənçiliyi yox idi”.
Həmin dövrdə hadisə ilə bağlı bir neçə şəxsin, o cümlədən rektor Müşfiq Atakişiyevin də ifadəsi alındığı barədə mətbuatda informasiyalar var idi. O dövrdə mediada qeyd edilirdi ki, istintaq olayın səbəbi kimi bədbəxt hadisə versiyasını da araşdırır. “Zəif bir ehtimal var ki, mərhum idman etdiyi stadionda turnikdə hərəkət edərkən başı üstdə yıxılıb”-deyə yazılırdı.
2011-ci ildə mərhumun oğlu Zaur Əhmədov atasının öldürülməsi ilə bağlı konkret fikir söyləmirdi: “Hər gün orada idman edirdi. Bizim kiminləsə düşmənçiliyimiz və ya hansısa bir konfliktimiz olmayıb. Polis və prokurorluq işləyir, yəqin məsələni aydınlaşdırarlar”.
Z.Əhmədov deyirdi ki, atası ilə anası Şərifzadə küçəsi, 2a ünvanında yaşasa da ailənin digər üzvləri başqa yerlərdəki ünvanlarda yaşayıb. O deyirdi ki, atası və anası yayda Bilgəhdəki bağ evində yaşayıb, Hadisədən bir gün əvvəl atası bağ evindən Yasamaldakı evinə gəlib. Anası isə bağda qalıb. Z.Əhmədov deyirdi ki, atasının qətlindən sonra onun üstündən heç nə götürülməyib.
Qeyd edək ki, o vaxt müəmmalı ölümlə bağlı Yasamal Rayon Prokurorluğunda CM-nin 120.1-ci (qəsdən adam öldürmə) maddəsi ilə cinayət işi başlanmışdı.
Bildiyimiz kimi, mərhum prorektorun qətli ilə bağlı müəyyən şaiyələr olub, bu barədə mətbuat da yazıb. O ehtimalların, şaiyələrin bəzilərini təqdim etdik.
Bu ilin iyul ayında T.Əhmədovun qətli ilə bağlı diqqətçəkən informasiya meyadana çıxdı. Tariyel Əhmədovun qətli ilə bağlı şok iddialarla onun ailəsi ölkə rəhbərliyinə müraciət etdi. Bu müraciət mediada yer aldı. Qeyd olunurdu ki, “Təfəkkür” Universitetinin prorektoru və həmtəsisçilərindən biri olmuş Tariyel Əhmədovun qətlində sözügedən ali təhsil ocağının rektoru olmuş Müşfiq Atakişiyevin adı hallandırılır. Mətbuatda gedən məlumata görə, Tariyel Əhmədovun ailəsi qətlin təşkilatçısı kimi Müşfiq Atakişiyevin adını çəkir. Müraciətdə T.Əhmədovun ailəsi yazır: “Bu işin əsas təşkilatcısı və himayədarı Müşfiq Atakişiyevdir. O, cinayət məsuliyyətinə cəlb olunsun. Əlimizdən zorla aldığı əmlak geri qaytarılsın. Biz mərhumun ailəsi olaraq inanırıq ki, bu iş düzgün aparılarsa, qətlin icraçısı Dəyanət Quliyev qətlin sifarişcisi olan öz doğma dayısı Müşfiq Atakişiyevin adını çəkəcək. Bundan sonra Müşfiq Atakişiyev məsuliyyətdən kənarda qala bilməyəcək”.
Tariyel Əhmədov 2011-ci il sentyabrın 16-da evinin yaxınlığında amansızcasına qətlə yetirilib. 2023-cü ilin aprelində Daxili İşlər Nazirliyi rəsmi məlumat yayaraq Tariyel Əhmədovu qətlə yetirən sabiq polis əməkdaşı Dəyanət Quliyevin həbs olunduğunu açıqlayıb. Məlum olub ki, Dəyanət Quliyev həbsindən 2 il qabaq təqaüdə çıxıb. O, DİN-in 7-ci bölməsinin əməkdaşı olub. Həbsindən sonra Dəyanət Quliyevə Cinayət Məcəlləsinin 120.2.5 - tamah məqsədi ilə qəsdən adam öldürmə maddəsi ilə ittiham irəli sürülüb.
Mərhumun ailəsi isə Dəyanət Quliyevin sifariş yerinə yetirdiyini iddia edir: “Tariyel Əhmədov səhər saat 6-da idman formasında məşq eləyən zaman qətlə yetirilib. Yəni qətlə yetirilən zaman onun əynindəki geyim idman forması olub. İdman formasının cibində təbii ki, hansısa böyük məbləğin olması ağlasığmazdır. İstintaq Dəyanət Quliyevə düzgün ittiham verməyib. Səhər saat 6-da idman formasında olan insanı tamah məqsədi ilə qətlə yetirmək olardı? Bu işdən az da olsa məlumatlı olan hər kəsə məlumdur ki, qətlin təşkilatcısı "Təfəkkür" universitetin rektoru və həmtəsisçilərdən biri olan Müşfiq Atakişiyevdir. Müşfiq Atakişiyev bu cinayəti ört-basdır etmək üçün milyonlar xərcləyib. Bunu özü deyir və gizlətmir. O deyir ki, buna görə mənə heç kim heç nə edə bilməz.
Tariyel Əhmədovun qətlindən sonra universitetin ətrafındakı boş torpaq sahəsi və idman kompleksi özəlləşdirilib. Halbuki, qətlə qədər Atakişiyev bunu edə bilmirdi. 12 ildir bu iş düzgün aparılmır, qətlin sifarişcisi kənarda qalıb, adı heç bir yerdə hallanmır. Onun qətli gizlətmək üçün milyonlar xərclədiyi adamlar bu gün də vəzifədədirlər və onu yenə də himayə edirlər”.
Məlum olduğu kimi, Elm və Təhsil Mərkəzi Təfəkkür Universitetinin mərhum prorektoru Tariyel Əhmədovun qətlə yetirilməsi faktı ilə bağlı sözügedən təhsil müəssisəsinin sabiq rektoru Müşfiq Atakişiyev saxlanılıb. Məhkəmənin qərarı ilə Müşfiq Atakişiyev barəsində vəzifədən kənarlaşdırılmaqla həbs-qətimkan tədbiri seçilib.
Qeyd olunur ki, sabiq rektor prorektorun qətlini bacısı oğlu Dəyanət Quliyevə sifariş verib. Sonuncu isə, həmkəndlisi ilə əlbir olaraq Tariyel Əhmədovu qətlə yetirib.
Mətbuatda Müşfiq Atakişiyevin saxlanılması ilə bağlı detallar yayılıb. Mətbuatın məlumatına görə, Baş Prokurorluq, Daxili İşlər Nazirliyi və Ədliyyə Nazirliyinin Penitensiar Xidməti tərəfindən birgə keçirilən çoxsaylı istintaq və əməliyyat-axtarış tədbirləri nəticəsində cinayət əməlinin sifariş əsasında törədilməsinə dair sübutlar əldə edildikdən sonra Müşfiq Atakişiyevin həbsinə qərar verilib.
İş yoldaşlarından biri mətbuata açıqlamasında deyib ki, Müşfiq Atakişiyev saxlanılacağından tamamilə xəbərsiz olub. “O, dünən yüksək əhval-ruhiyyə ilə işə gəlib. Ənənəvi tapşırıqlarını verəndən sonra 16-18 noyabr tarixlərində “Beynəlxalq nəqliyyat-logistika dəhlizi: Zəngilandan inkişaf impulsları” mövzusunda keçiriləcək beynəlxalq konfransda iştirak etmək üçün Heydər Əliyev adına Beynəlxalq Hava Limanına yola düşməyə hazırlaşıb. Bu vaxt hüquq-mühafizə orqanlarının əməkdaşları professorun AMEA-dakı iş otağına daxil olaraq onu həbs ediblər.
Məlumatlara görə, Müşfiq Atakişiyevin qəfil həbsi İqtisadiyyat İnstitutunun kollektivi arasında şok effekti yaradıb...”-deyə media qeyd edir.
Beləliklə, 2011-ci il sentyabrın 16-da evinin yaxınlığında başına küt alətlə vurulan zərbə nəticəsində həyatını itirən, daha dəqiq desək, qətl edilən T.Əhmədovun müəmmalı sayılan ölümü ilə bağlı artıq hər şey ortadadır. Artıq buna görə M.Atakişiyev saxlanılıb, barəsində cinayət işi açılıb, hansı səbəbdən keçmiş prorektorun qətlinə “fərman” verildiyi tam olaraq aydın olacaq...
Əli TURABOV